ភ្នំពេញៈ គិតត្រឹមថ្ងៃទី ៣០ ខែឧសភា ឆ្នាំ ២០២២ គណៈកម្មាធិការជាតិរៀបចំការបោះឆ្នោត (គជប )បានដឹកជញ្ជូនសម្ភារ និងបរិក្ខារផ្សេងៗ សម្រាប់បម្រើឱ្យការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី ៥ ទៅដល់ខេត្តចំនួន ២៣ ដើម្បីត្រៀមដឹកបន្តទៅកាន់គណៈកម្មការឃុំ សង្កាត់រៀបចំការបោះឆ្នោត ដឹកបន្តទៅកាន់ការិយាល័យបោះឆ្នោត លើកលែងតែរាជធានីភ្នំពេញ និងខេត្តកណ្តាល ព្រោះរាជធានី-ខេត្តទាំង ២ នេះនៅជិតជាងគេ។
លោក សោម សូរីដា អ្នកនាំពាក្យ គជប ប្រាប់ ភ្នំពេញ ប៉ុស្តិ៍ នៅថ្ងៃទី ៣០ ខែឧសភា ថា សម្ភារ ឯកសារសំខាន់សម្រាប់បម្រើនៅតាមការិយាល័យបោះឆ្នោត ដែលបានដឹកទៅដល់ ២៣ ខេត្តនោះមានសន្លឹកឆ្នោតផ្លូវការ បញ្ជីបោះឆ្នោត ទឹកខ្មៅលុបមិនជ្រះ ត្រាសម្ងាត់ ហិបឆ្នោត បន្ទប់សម្ងាត់ និងឯកសារសំខាន់ៗផ្សេងទៀត ដើម្បីឱ្យគណៈកម្មការខេត្តរៀបចំការបោះឆ្នោតទាំងនោះ ដឹកបញ្ជូនបន្តទៅឱ្យគណៈកម្មការឃុំ សង្កាត់រៀបចំការបោះឆ្នោត និងដឹកបន្តទៅការិយាល័យបោះឆ្នោត។
លោកបានថ្លែងថា៖ «សម្រាប់ការិយាល័យបោះឆ្នោត គឺសម្ភារទាំងអស់នោះនឹងត្រូវផ្តល់ទៅឱ្យគ្រប់ការិយាល័យបោះឆ្នោតយ៉ាងយូរ ៣៦ ម៉ោង មុនថ្ងៃបោះឆ្នោត។ អ៊ីចឹងទេ! តាមកម្មវិធីនៃការដឹកជញ្ជូន គឺ គជប បានអនុវត្តកិច្ចការនេះរលូនល្អ និងការរក្សាទុកដាក់ទៀតសោតក៏បានល្អ ពីព្រោះយើងមានឃ្លាំង ដើម្បីរក្សាទុក ដើម្បីធានាទាំងគុណភាព និងសុវត្ថិភាព និងមានការយាមកាមពីកម្លាំងមានសមត្ថកិច្ច»។
បើតាមលោក សោម សូរីដា ក្នុងករណីដែលមានការឆកល្វែងណាមួយ ចំពោះការគ្រប់គ្រង សមាសភាព ឬបុគ្គលអ្នកគ្រប់គ្រងនោះនឹងទទួលរងនូវទណ្ឌកម្ម ដែលមានចែងនៅក្នុងបទបញ្ជាផ្ទៃក្នុងរបស់ គជប។
លោក គិន ជាន ប្រធានគណៈកម្មការ ខេត្តមណ្ឌលគិរីរៀបចំការបោះឆ្នោតប្រាប់ភ្នំពេញប៉ុស្តិ៍នៅថ្ងៃទី ៣០ ខែឧសភាថា គណៈកម្មការរៀបចំការបោះឆ្នោតខេត្តបានទទួលសម្ភារសម្រាប់រៀបចំការបោះឆ្នោតកាលពីយប់ថ្ងៃទី ២៩ ខែឧសភា និងបានរក្សាទុកនៅក្នុងឃ្លាំង ដោយមានកងកម្លាំងនគរបាលខេត្ត យាមកាម និងបន្តបែងចែកទៅកាន់ឃុំទាំង ២១ និង ១៣៧ ការិយាល័យ។
គណៈកម្មការខេត្តមណ្ឌលគិរីរៀបចំការបោះឆ្នោតនឹងបន្តដឹកចេញទៅតាមឃុំ សង្កាត់ដែលនៅឆ្ងាយមុនចាប់ពីថ្ងៃទី ៣១ ខែឧសភា ឆ្នាំ ២០២២ ដោយមានកងកម្លាំងទៅជាមួយ ដើម្បីការពារសម្ភារទាំងអស់នេះ។ លុះទៅដល់គណៈកម្មការ-ឃុំ សង្កាត់ ក៏មានកម្លាំងការពារសន្តិសុខយាមកាមរហូតទៅដល់ថ្ងៃដែលត្រូវដឹកចេញទៅតាមការិយាល័យបោះឆ្នោត។
ទោះយ៉ាងណា លោក គិន ជាន បញ្ជាក់ថា តាមរយៈការដឹកជញ្ជូនសម្ភារសម្រាប់បម្រើឱ្យការបោះឆ្នោតក៏មានការលំបាកមួយចំនួនផងដែរ ព្រោះហេដ្ឋារចសម្ព័ន្ធ មានតែពីខេត្តទៅស្រុក ប៉ុន្តែពីស្រុកទៅកាន់បណ្តាឃុំមួយចំនួន មានការលំបាក។ មួយទៀត ខេត្តមណ្ឌលគិរីមានទំហំធំ ប៉ុន្តែមានប្រជាពលរដ្ឋរស់នៅតិច និងរប៉ាត់រប៉ាយបានធ្វើឱ្យការិយាល័យបោះឆ្នោតខ្លះនៅឆ្ងាយ។
លោកថ្លែងថា៖ «ខ្ញុំមានការិយាល័យ ៥ ដែលនៅឆ្ងាយ និងពិបាកជាងគេ ព្រោះមានផ្លូវឆ្ងាយ។ ការិយាល័យ ៤ ដែលទើបបង្កើតថ្មីនៅតំបន់ព្រៃគីជាប់ខេត្តស្ទឹងត្រែង យើងអត់មានផ្លូវចេញពីមណ្ឌលគិរីទេយើងចេញពីកោះញែកទៅរតនគិរីចេញពីរតនគិរីទៅដល់ស្ទឹងត្រែងក្បាលរមាសបានយើងចូលមកក្នុងវិញ»។ មួយទៀតនៅជាប់ឯខេត្តក្រចេះ ឯណោះវិញ អត់មានផ្លូវដើរខាងក្នុងទេ គឺត្រូវដើរចេញពីស្រុកស្នួលចូលមកវិញ។ បើមានភ្លៀងគឺលំបាកកាន់តែខ្លាំង ព្រោះមានភក់ និងឆ្លងអូរទៀត។
លោក សុខ ហីង ប្រធានលេខាធិការដ្ឋាន គណៈកម្មការខេត្តបាត់ដំបងរៀបចំការបោះឆ្នោតប្រាប់ភ្នំពេញប៉ុស្តិ៍នៅថ្ងៃទី ៣០ ខែឧសភាថា សម្រាប់ខេត្តបាត់ដំបងបានទទួលសម្ភារ និងបរិក្ខារបម្រើឱ្យការបោះឆ្នោតកាលពីយប់ថ្ងៃទី ២៩ ខែឧសភា ដោយមានការត្រួតពិនិត្យគ្រប់ជ្រុងជ្រោយ និងគ្រប់ចំនួនឃុំ សង្កាត់ទាំង ១០៣។
លោកថ្លែងថា៖ «យើងត្រូវពិនិត្យមើលឱ្យគ្រប់ ១០៣ ដុំ ជាមុនសិន ដោយឡែកនៅខាងក្នុង គឺមិនមានសិទ្ធិក្នុងការហែកនោះទេ។ ជាមួយគ្នានេះ គណៈកម្មការខេត្តស្នើសុំកងកម្លាំងពីស្នងការខេត្តចំនួន ២ នាក់យាមប្រចាំការចាប់ពីថ្ងៃដែលទទួលបានរហូតទាល់តែដឹកបញ្ជូនចេញអស់ទៅតាមឃុំ សង្កាត់តាមកម្មវិធី និងពេលវេលាខុសគ្នា»។
បើតាម លោក សុខ ហីង ក្នុងការដឹកជញ្ជូនទៅតាមឃុំសង្កាត់នេះក៏មានការលំបាកខ្លះដែរ ពាក់ព័ន្ធនឹងសុវត្ថិភាព និងសន្តិសុខ ដោយក្នុងនោះ លេខាធិការដ្ឋាន គណៈកម្មការរៀបចំការបោះឆ្នោតខេត្តបាត់ដំបងស្នើសុំកងកម្លាំងពីស្នងការខេត្តចំនួន ២ រូប អមដំណើររថយន្តរហូតដល់ឃុំ។ ដោយឡែក នៅពេលដែលសន្លឹកឆ្នោត និងសម្ភារសំខាន់ទៅដល់គណៈកម្មការឃុំសង្កាត់ រៀបចំការបោះឆ្នោត គណៈកម្មការឃុំសង្កាត់ត្រូវតែសហការជាមួយអធិការស្រុក និងមេប៉ុស្តិ៍ឃុំ ដើម្បីចាត់កម្លាំងយាមកាម ការពាររហូតដល់សន្លឹកឆ្នោត និងសម្ភារទាំងនោះដឹកទៅដល់ការិយាល័យបោះឆ្នោត។
ទោះជាយ៉ាងណា លោកថា បញ្ហាសំខាន់មួយទៀត គឺឃុំចំនួន ២ នៅស្រុកឯកភ្នំ គឺស្ថិតនៅលើដែនទឹកបឹងទន្លេសាបដែលធ្វើឱ្យមានការលំបាកក្នុងការដំណើរការតាមផ្លូវទឹក ដោយសារតែមានរុក្ខជាតិ កំប្លោកកកកុញពេញផ្ទៃទឹក ដែលពេលខ្លះមិនអាចបើកកាណូតទៅរួច។
លោក លោក យង់ គិមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្ដិភាព (PDP-Center) ប្រាប់ភ្នំពេញ-ប៉ុស្តិ៍នៅថ្ងៃទី ៣០ ខែឧសភាថា ជាទូទៅឆ្នាំណាក៏ដូចឆ្នាំណាដែរ គឺមានការលំបាកសម្រាប់គណៈកម្មការរាជធានីខេត្តរៀបចំការបោះឆ្នោតក្នុងការធ្វើដំណើរទៅកាន់បណ្តាឃុំ សង្កាត់នៅតំបន់ដាច់ស្រយាល ព្រោះវាពាក់ព័ន្ធទៅនឹងហេដ្ឋារចនាសម្ព័ន្ធនៅមិនសូវល្អ និងឃុំខ្លះទៀតនៅលើទឹកជាដើម។
ទោះជាយ៉ាងណា លោកថា គណៈកម្មការរៀបចំការបោះឆ្នោតគ្រប់លំដាប់ថ្នាក់ត្រូវធានាឱ្យបាននូវដំណើរការបោះឆ្នោតនេះឱ្យប្រព្រឹត្តទៅដោយរលូន និងប្រជាពលរដ្ឋគ្រប់រូប មានសិទ្ធិបោះឆ្នោត និងមិនមានបញ្ហាណាមួយពាក់ព័ន្ធនឹងការខ្វះសន្លឹកឆ្នោត ឬសម្ភារបម្រើឱ្យការបោះឆ្នោត។ ជាពិសេសទាំងការការពារ រក្សាសន្តិសុខ សណ្តាប់ធ្នាប់ និងរបៀបរៀបរយក៏ត្រូវបានធានាក្នុងមុនពេល និងអំឡុងពេលបោះឆ្នោត។
លោកបញ្ជាក់ថា៖ «ការបោះឆ្នោត វាជាអាទិភាពបំផុត គជប ត្រូវតែធានាថា សន្លឹកឆ្នោតទៅដល់ទីតាំងបោះឆ្នោត ទាន់ម៉ោង និងពេលវេលា។ ទោះបីប្រើប្រាស់មធ្យោបាយណាក៏ដោយ បើកន្លែងណាលំបាក គជប ក៏គួរប្រើប្រាស់ឧទ្ធម្ភាគចក្រ ជាដើម។ បើសិនជាមានការយឺតយ៉ាវ វាជាបញ្ហាប្រឈមមួយ សម្រាប់ការបោះឆ្នោត»៕