ភ្នំពេញៈ ក្រសួង​សុខាភិបាល​បាននិង​កំពុង​គិតគូរ​ទៅលើ​ការត្រៀម​បម្រុង​លើ​ការការពារ​ជំងឺ​អុតស្វា ឬ Monkeypox ដែលជា​យុទ្ធសាស្ត្រ​សំខាន់​ដូចដែល​ក្រសួង​បាន​ត្រៀម​បម្រុង​ប្រយុទ្ធ​នឹង​ជំងឺ​កូវីដ​ ១៩​ ដែរ ហើយ​ក្នុងនោះ​អ្វី​ដែលជា​ចំណុច​សំខាន់​គឺ​ការចាក់​វ៉ាក់សាំង​។ នេះ​បើតាម​អ្នកនាំពាក្យ​សុខាភិបាល​។

លោកស្រី​ ឱ វណ្ណឌីន អ្នក​នាំពាក្យ និង​ជា​រដ្ឋលេខាធិការ​ក្រសួង​សុខាភិបាល លើកឡើង​កាលពី​សប្តាហ៍​មុន​ថា ទាក់ទង​នឹង​ជំងឺ​អុតស្វា ឬ Monkeypox នេះ ក្រសួង​តែងតែ​គិតគូរ​ជានិច្ច​ពី​ចំណុច​សំខាន់ៗ​ក្នុងការ​បង្ការ និង​ទប់ស្កាត់​ជំងឺ​នេះ ដែល​វិធានការ​បង្ការ​ទាំងនោះ​ក៏មាន​ការចាក់​វ៉ាក់សាំង​ផងដែរ​។

លោកស្រី​ថ្លែងថា​៖ «​ក្រសួង​សុខាភិបាល​កំពុងតែ​គិតគូរ ដែល​ជា​ចំណុច​សំខាន់​នោះ គឺ​ការបង្ការ​ត្រៀម​បម្រុង​ដែលជា​យុទ្ធសាស្ត្រ​សំខាន់ គឺ​ការចាក់​វ៉ាក់សាំង ដូចដែល​ក្រសួង​បាន​ត្រៀម​បម្រុង​ប្រយុទ្ធ​ជាមួយ​នឹង​ជំងឺ​កូវីដ​ ១៩ ​ដែរ​។ កម្ពុជា​បាន​លុបបំបាត់​នូវ​ជំងឺ​មួយចំនួន ដូចជា​ជំងឺ​កញ្ជ្រិល បាន​ដោយសារ​តែ​វ៉ាក់សាំង​»​។

មន្ត្រី​នាំពាក្យ​រូបនេះ​បន្តថា​សម្រាប់​ជំងឺ​អុតស្វា​នេះ​ក៏មាន​វ៉ាក់សាំង​ដែរ ហើយ​វ៉ាក់សាំង ដែល​សម្រាប់​ប្រើប្រាស់​នេះ​គឺជា​វ៉ាក់សាំង​ដែល​អង្គការ​សុខភាព​ពិភពលោក​ក៏មាន​ការគិតគូរ​ពិចារណា​សម្រាប់​ប្រើប្រាស់​លើ​ជំងឺ​អុតស្វាយ​ផង​ និង​ជំងឺ​អុតស្វា​ផង​។

លោកស្រី​ ឱ វណ្ណឌីន បាន​បញ្ជាក់ថា​៖ «​ដោយសារតែ​វ៉ាក់សាំង​អុតស្វាយ គឺ​ការពារ​បាន​ទាំង​ជំងឺ​អុតស្វា​នេះដែរ ហើយ​ភាគច្រើន​បុគ្គល​ដែលមាន​អាយុ​ពី​ ៥០ ​ឆ្នាំ​ឡើង​។ កាលពី​នៅ​កុមារ ពួកគាត់​ទទួលបាន​ថ្នាំ​បង្ការ​ជំងឺ​អុតស្វាយ​រួចហើយនោះ​។ អ៊ីចឹង​! សរីរាង្គ​របស់​ពួកគាត់​មាន​ការ​ការពារ​រួចហើយ ពីព្រោះ​វ៉ាក់សាំង​នេះ​ចាក់​ម្តង គឺ​ការពារ​មួយជីវិត​។ ដូចនេះ វា​មិន​ងាយ​នឹងរង​នូវ​ភាព​ធ្ងន់ធ្ងរ​ ដោយសារ​ជំងឺ​នេះ​ទេ​»​។

លោកស្រី​បាន​បន្ថែមថា​៖ «​ដូចនេះហើយ បានជា​អង្គការ​សុខភាព​ពិភពលោក​បាន​ណែនាំ​ថា ជំងឺ​នេះ វា​មិន​ងាយ​តែ​​ឆ្លង​រាលដាល​ខ្លាំង​ដូចនឹង​ជំងឺ​កូវីដ​ ១៩ ​ឡើយ គឺ​វា​មាន​បែបបទ​របស់​វា​។ បើ​បុគ្គល​មានការ​យល់ដឹង ហើយ​អនុវត្ត​នូវ​វិធានការ​ការពារ​នេះ​ឱ្យបាន​ត្រឹមត្រូវ អ៊ីចឹង​ការចម្លង​នេះ​នឹងមិន​ទៅ​លឿន​ដែរ​»​។

ជាមួយ​គ្នានេះ លោក​ គួង ឡូ ទីប្រឹក្សា​ក្រសួង​សុខាភិបាល និង​ជា​ប្រធាន​មន្ទីរ​សុខាភិបាល​ខេត្ត​ព្រះវិហារ​ប្រាប់​ភ្នំពេញ​ប៉ុស្តិ៍ នៅ​ថ្ងៃទី​ ៣០ ខែឧសភា​ថា ទាក់ទង​នឹង​វិធានការ​បង្ការ​ជំងឺ​អុតស្វា​នេះ លោក​បាន​ធ្វើការ​អប់រំ​ដល់​ប្រជាពលរដ្ឋ​នៅ​ទូទាំង​ខេត្ត ស្របគ្នា​ទៅ​នឹង​ការអប់រំ​ជំងឺ​កូវីដ ​១៩ ​ដែរ​។ មន្ទីរ​សុខាភិបាល​ខេត្តព្រះវិហារ និង​អាជ្ញាធរ​ពាក់ព័ន្ធ​នៅតែ​បន្ត​ធ្វើការ​អប់រំ​ពី​ជំងឺ​កូវីដ​ ១៩​ ដដែល បើទោះបីជា​ស្ថានភាព​ជំងឺ​នេះ​នៅ​ប្រទេស​កម្ពុជា​មាន​ភាពល្អ​ប្រសើរ​ច្រើន​ក៏ដោយ​។

លោក​ គួង ឡូ បាន​បញ្ជាក់ថា​៖ «​យើង​នៅតែ​បន្ត​អប់រំ​ពី​ជំងឺ​កូវីដ​ ១៩ ហើយ​ស្រប​នឹង​គ្នា​នេះដែរ ក៏​យើង​បន្ថែម​នូវ​ការអប់រំ​ទាក់ទង​ជាមួយនឹង​ជំងឺ​អុតស្វា​ផងដែរ ដោយ​ក្នុងនោះ​យើង​ផ្តោតលើ​វិធីសាស្ត្រ​ចំនួន​ ៣ គឺ​ទី ​១ ការបិទ​ខិត្តប័ណ្ណ​នានា​ដែល​និយាយ​ពី​ការការពារ​ខ្លួន​។ ទី​ ២ ការចាក់​មេក្រូ និង​វិធី​ទី​ ៣ គឺ​ការចុះ​អប់រំ​ផ្ទាល់​តែម្តង​តាមរយៈ​បុគ្គលិក​សុខាភិបាល និង​ក្រុម​ទ្រទ្រង់​សុខភាព​ភូមិ​»​។

ទាក់ទង​នឹង​វ៉ាក់សាំង​សម្រាប់​ជំងឺ​អុតស្វា​នេះ លោក​ប្រធាន​មន្ទីរ​សុខាភិបាល​ក៏បាន​លើកឡើង​ស្រដៀង​នឹង​លោកស្រី​ ឱ វណ្ណឌីន ផងដែរ ដែលថា មក​ដល់ពេល​នេះ វ៉ាក់សាំង​សម្រាប់​ជំងឺ​នេះ​មិនទាន់​មាន​ទេ​។ ប៉ុន្តែ​បើតាម​ការលើកឡើង​របស់​មន្ត្រី​ជំនាញ​នៃ​អង្គការ​សុខភាព​ពិភពលោក គឺ​គេ​អាច​ប្រើប្រាស់​វ៉ាក់សាំង​អុតស្វាយ ឬ Smallpox សម្រាប់​ការពារ​ជំងឺ​អុតស្វា ឬ Monkeypox នេះ​បានដែរ​។

លោក​ គួង ឡូ បាន​ប្រាប់ថា​៖ «​សម្រាប់​ខ្ញុំ​ផ្ទាល់ ខ្ញុំ​គិតថា​ទៅ​ថ្ងៃក្រោយ​ប្រហែលជា​គេ​អាច​ប្រើប្រាស់​វ៉ាក់សាំង​អុតស្វាយ​សម្រាប់​ជំងឺ​អុតស្វា​ដែរ​។ សម្រាប់​អ្នក​ដែល​ធ្លាប់​កើត​ជំងឺ​អុតស្វាយ​ហើយ ក៏​អាច​ការពារ​បាន​ច្រើន​ដែរ​ពី​ជំងឺ​អុតស្វា​នេះ ទាំង​អ្នក​ដែល​បាន​ចាក់​វ៉ាក់សាំង​អុតស្វាយ និង​អ្នក​ដែល​ធ្លាប់​កើត​ជំងឺ​អុតស្វាយ​»​។

ទោះបីជា​វ៉ាក់សាំង​អុតស្វាយ​អាច​ការពារ​ពី​ជំងឺ​អុតស្វា​ក៏ដោយ ប៉ុន្តែ​លោក​ គួង ឡូ នៅតែ​បន្ត​អំពាវនាវ​ដល់​ប្រជាពលរដ្ឋ​ឱ្យមាន​ការប្រុងប្រយ័ត្ន និង​ការពារ​ឱ្យបាន​ត្រឹមត្រូវ កុំ​មាន​ការ​ធ្វេសប្រហែស ស្រប​ពេល​ដែល​ក្រសួង​ជំនាញ​ក៏​កំពុងតែ​បន្ត​ធ្វើការ​តាមដាន​ជំងឺ​នេះ​ជាប់​ជាប្រចាំ​ផងដែរ​។

ក្រសួង​សុខាភិបាល​ធ្លាប់​បាន​ណែនាំ​ដល់​ប្រជាពលរដ្ឋ​រួចហើយ​ពី​ការបង្ការ​ជំងឺ​នេះ ដោយ​ត្រូវអនុវត្ត​អនាម័យ​ខ្លួនប្រាណ និង​រស់នៅ​ស្អាត​។ ធ្វើ​អនាម័យ​ដៃ​ស្អាត​ជាមួយ​សាប៊ូ ឬ​ជែល អាល់កុល និង​អនុវត្ត​ការការពារ​ការចម្លង​តាមផ្លូវ​ដង្ហើម​។ ចំណុច​នេះ លោកស្រី ឱ វណ្ណឌីន បានបញ្ជាក់​ដោយ​មានជំនឿថា ការរស់នៅ​ស្អាត ហូប​ស្អាត ធ្វើឱ្យ​ប្រជាពលរដ្ឋ​កាត់បន្ថយ​ច្រើន​ពី​ការឆ្លង​ ឬ​កើតមាន​ជំងឺ​តម្កាត់​ផ្សេងៗ​។

អង្គការ​សុខភាព​ពិភពលោក​កាលពី​ថ្ងៃទី​ ២៩ ខែឧសភា បានឱ្យ​ដឹងថា គិត​ត្រឹម​ថ្ងៃទី​ ២៦ ខែឧសភា ករណី​ឆ្លង​សរុប​នៃ​ជំងឺ​អុតស្វា​នេះ មាន​ចំនួន ​២៥៧ ​នាក់​ហើយ​ដែល​បាន​បញ្ជាក់​ពី​មន្ទីរពិសោធន៍​។ ករណី​សង្ស័យ​មាន​ប្រហែល​ជា​ ១២០​ នាក់ ហើយ​ដែល​ត្រូវបាន​រាយការណ៍​ទៅ​អង្គការ​សុខភាព​ពិភពលោក​ពី​បណ្តា​ប្រទេស​ចំនួន​ ២៣ ប៉ុន្តែ​ករណី​ស្លាប់ មិនទាន់​មានការ​រាយការណ៍​នៅឡើយ​៕

វីដេអូ៖