ភ្នំពេញៈ មន្ត្រីជាន់ខ្ពស់នៃក្រសួងពាណិជ្ជកម្មបានឱ្យដឹងថា ច្បាប់ស្តីពីសុវត្ថិភាពម្ហូបអាហារដែលព្រឹទ្ធសភាបានអនុម័តកាលពីពាក់កណ្ដាលខែឧសភា មានសារៈសំខាន់សម្រាប់ការពារ សុខភាព និងសុវត្ថិភាពរបស់ប្រជាពលរដ្ឋ តាមរយៈការទទួលទានអាហារប្រកបដោយគុណភាព អនាម័យល្អ និងចៀសវាងនូវការកើតជំងឺផ្សេងៗផងដែរ។
សេចក្តីព្រាងច្បាប់ស្តីពី «សុវត្ថិភាពម្ហូបអាហារ» របស់ក្រសួងពាណិជ្ជកម្ម ដែលមាន ១១ ជំពូក និង ៤៣ មាត្រា ត្រូវបានព្រឹទ្ធសភា អនុម័តគាំទ្រទាំងស្រុងកាលពីថ្ងៃទី ១៨ ខែឧសភា ឆ្នាំ ២០២២។
លោក ប៉ែន សុវិជាតិ អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានប្រាប់ភ្នំពេញប៉ុស្តិ៍កាលពីថ្ងៃទី ៣០ ខែឧសភា ថា ច្បាប់នេះ ពិតជាមានសារៈសំខាន់ណាស់ក្នុងការធានាការពារសុខភាព និងអាយុជីវិតរបស់ប្រជាពលរដ្ឋគ្រប់រូបតាមរយៈការទទួលទានអាហារប្រកបដោយគុណភាព សុវត្ថិភាព និងអនាម័យ ជាហេតុធ្វើឱ្យប្រជាពលរដ្ឋមានសុខភាពល្អ និងចៀសវាងការកើតជំងឺផ្សេងៗ។
លោកមានប្រសាសន៍ថា៖ «ច្បាប់នេះ ក៏ជួយធានាឱ្យមានការប្រកួតប្រជែងប្រកបដោយតម្លាភាព ការពារការក្លែងបន្លំផលិតផល និងលើកកម្ពស់កេរ្តិ៍ឈ្មោះផលិតផលម្ហូបអាហាររបស់កម្ពុជានៅលើទីផ្សារអន្តរជាតិ ដែលជាផ្នែកមួយយ៉ាងសំខាន់នៃការជំរុញដល់ការនាំចេញ»។
លោក អង្គ វង្សវឌ្ឍានា ទេសរដ្ឋមន្ត្រីទទួលបន្ទុកបេសកកម្មពិសេស បានលើកឡើងកាលពីថ្ងៃទី ១៨ ខែឧសភា ក្នុងពេលដឹកនាំគណៈប្រតិភូតំណាងរាជរដ្ឋាភិបាលចូលរួមកិច្ចប្រជុំការពារសេចក្តីព្រាង «ច្បាប់ស្តីពីសុវត្ថិភាពម្ហូបអាហារ» ថាច្បាប់នេះផ្តល់សារៈសំខាន់ក្នុងការកំណត់គោលការណ៍ជាមូលដ្ឋាន ដើម្បីជំរុញឱ្យផលិតផលម្ហូបអាហារមានសុវត្ថិភាព និងអនុលោមតាមច្បាប់ និងលិខិតបទដ្ឋានជាតិជាធរមាន សំដៅលើកកម្ពស់សុខុមាលភាព និងប្រសិទ្ធភាពនៃការការពារផលប្រយោជន៍អ្នកប្រើប្រាស់ រួមចំណែកយ៉ាងសំខាន់ក្នុងការកាត់បន្ថយភាពក្រីក្ររបស់ប្រជាពលរដ្ឋ។
លោកបានថ្លែងថា៖ «ច្បាប់នេះនឹងបង្កលក្ខណៈឱ្យប្រទេសកម្ពុជារៀបចំនូវប្រព័ន្ធសុវត្ថិភាព ម្ហូបអាហារដែលមានលក្ខណៈទំនើប តាមរយៈការកសាងវិធីសាស្ត្រទប់ស្កាត់ជាមុន និងការត្រួតពិនិត្យខ្សែចង្វាក់ផលិតកម្មជាជាងការត្រួតពិនិត្យ និងវិភាគលើផលិតផលសម្រេច»។
ជាមួយគ្នានេះដែរ លោក ប៊ុន សិទ្ធី ពលរដ្ឋរស់នៅក្រុងតាខ្មៅ ខេត្តកណ្តាលវិញ បានប្រាប់ដែរថា លោកតែងតែទិញអាហារពីក្រៅជាញឹកញាប់ ព្រោះក្រោយពេលចេញពីធ្វើការល្ងាចពេក លោកហេវ ធ្វើម្ហូបមិនទាន់ក៏ទិញតាមផ្លូវក្បែរផ្សារតែម្ដង។
លោកបានប្រាប់ថា៖ «តាមពិត ខ្ញុំបារម្ភពីសុវត្ថិភាពដែរ តែអត់មានជម្រើស ដោយសារតម្លៃនៅតាមផ្លូវហ្នឹងវាធូរថ្លៃ។ តាមពិតនៅក្បែរក្រុមហ៊ុនក៏មានអាហារដ្ឋានដែរ ប៉ុន្ដែថ្លៃពេក ម្ហូបតាមផ្លូវតែ ៤ ពាន់រៀល បាយ ១ ប្រអប់ និងម្ហូប ១ ថង់ តែនៅអាហារដ្ឋានតម្លៃដល់ ៨ ពាន់រៀល ឬលើសនេះ»។
បើសួរថា តើលោក ប៊ុន សិទ្ធី ធ្លាប់ឈឺដោយសារអាហារតាមផ្លូវឬអត់ សម្រាប់លោកគឺពិបាកឆ្លើយថាមកពីអាហារតាមផ្លូវឬយ៉ាងណានោះទេ ប៉ុន្តែពេទ្យធ្លាប់ប្រាប់លោកថា សុខភាពលោកខ្សោយដោយសារខ្វះជីវជាតិ ខ្វះវីតាមីនជាដើម។
លោកបានបន្តថា៖ «ខ្ញុំឧស្សាហ៍ទិញអាហារតាមផ្លូវញឹកញាប់ណាស់ តែខ្ញុំក៏បានពិនិត្យមើលកន្លែងលក់ដែរ បើមានការសម្អាតល្អ ទើបទៅទិញ បើកន្លែងហាក់រញ៉េរញ៉ៃ សំរាម រាយប៉ាយ អត់ទិញទេ ហើយមកដល់ថ្ងៃនេះ មិនធ្លាប់ជួបបញ្ហាញ៉ាំហើយពុល ឬក៏រាករូសដែរ អ៊ីចឹងហើយបានជាខ្ញុំនៅទិញបន្តរហូតមក»។
យ៉ាងណាមិញទាក់ទងនឹងច្បាប់ស្តីពីសុវត្ថិភាពម្ហូបអាហារនេះ លោក ប៊ុន សិទ្ធី ថ្លែងដោយយល់ថា ល្អដែលកម្ពុជាមានច្បាប់បែបនេះ ដើម្បីឱ្យអាហារកាន់តែមានសុវត្ថិភាព និងស្ដង់ដា តែក៏លោកនៅតែបារម្ភថា ច្បាប់នឹងរឹតត្បិតដល់អ្នកលក់តូចតាច មិនអាចបន្តអាជីវកម្មបាន ព្រោះពួកគាត់មិនអាចគោរពបានទាំងស្រុងតាមច្បាប់ទេ ដោយសារពួកគាត់លក់តាមកម្រិតជីវភាពអ្នកទិញដែរ។
អ្នកលក់បាយ និងម្ហូបនៅមុខផ្សារចាស់ អ្នកស្រី ឡូន រី បានប្រាប់ឱ្យដឹងថា អ្នកស្រីមិនទាន់ដឹងពីច្បាប់នេះទេ ហើយអ្នកស្រីក៏មិនទាន់ដឹងដែរថា តើច្បាប់នេះអាចធ្វើឱ្យប៉ះពាល់ដល់មុខរបររបស់គាត់ឬអត់នោះទេ។
អ្នកស្រីថា៖ «ខ្ញុំសាទរដែលប្រទេសយើងមានច្បាប់នេះ ហើយខ្ញុំសង្ឃឹមថានៅពេលច្បាប់នេះចេញហើយ អ្នកលក់អាហារតូចតាចតាមចិញ្ចើមផ្លូវនឹងមិនមានបញ្ហា។ សម្រាប់ខ្ញុំ គឺអនាម័យល្អ ម្ហូបអាហារមានសុវត្ថិភាព គឺជាចំណុចសំខាន់ដែលខ្ញុំអនុវត្តជាប្រចាំ ទាំងទៅលើអតិថិជន និងគ្រួសារខ្ញុំផ្ទាល់ ដោយសារពួកខ្ញុំក៏ហូបបាយ និងម្ហូបដែលខ្ញុំលក់រាល់ថ្ងៃនេះដែរ»។
អ្នកស្រី ឡូន រី បានបញ្ជាក់ថា អ្នកស្រីមិនបារម្ភពីការផាកពិន័យ ឬការចុះពិនិត្យការធ្វើម្ហូប ឬការទុកដាក់អាហារនៅក្នុងតូបអ្នកស្រីឡើយ ដោយសារគាត់ទុកចិត្តថាអ្វីដែលគាត់ធ្វើគឺមានអនាម័យល្អ សុវត្ថិភាពសម្រាប់អ្នកហូប។
ទាក់ទងនឹងការបារម្ភនេះ លោក ប៉ែន សុវិជាតិ បានលើកឡើងថា អ្នកលក់នៅតាមទីផ្សារ និងនៅតាមផ្លូវ គឺជាគោលដៅរបស់ក្រសួង ដោយជំរុញឱ្យពួកគាត់មានអនាម័យល្អ ហើយជាបណ្តើរៗជំរុញឱ្យមានគុណភាព ដើម្បីទាក់ទាញភ្ញៀវទេសចរ។
លោកបានថ្លែងថា៖ «គោលដៅម្ហូបអាហារដែលបម្រើវិស័យទេសចរណ៍ និងបម្រើជីវភាពប្រជាពលរដ្ឋ ក្នុងកម្រិតប្រាក់ចំណូលមធ្យម និងកម្រិតទាប គឺម្ហូបអាហារនៅតាមផ្លូវថ្នល់ និងតាមផ្សារនេះដែលត្រូវរក្សាអនាម័យ ដោយសារអនាម័យឆ្លុះបញ្ចាំងការធានាបាននូវគុណភាព និងសុវត្ថិភាព»។
ក្រសួងពាណិជ្ជកម្មចាត់ទុកការងារអាទិភាពសំខាន់គឺធ្វើយ៉ាងណាជំរុញឱ្យការលក់ដូរម្ហូបអាហារនៅតាមទីផ្សារ និងតាមចិញ្ចើមផ្លូវត្រូវមានអនាម័យ គុណភាព និងសុវត្ថិភាពជាចម្បង។ អង្គការសុខភាពពិភពលោកបានបញ្ជាក់ហើយថា ជារៀងរាល់ឆ្នាំកុមារ ២២០ លាននាក់កើតជំងឺរាករូសហើយ ៩៦ ០០០ នាក់បានស្លាប់ ដោយបញ្ហាសុវត្ថិភាពចំណីអាហារ។ ចំណីអាហារគ្មានសុវត្ថិភាពបានបង្កើតវដ្តដ៏កាចសាហាវនៃជំងឺរាករូស និងកង្វះអាហារូបត្ថម្ភ ដែលគំរាមកំហែងដល់ស្ថានភាពអាហារូបត្ថម្ភរបស់អ្នកដែលងាយរងគ្រោះបំផុត។
អគ្គលេខាធិការនៃក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ លោក សុខ ស៊ីឡូ ធ្លាប់បានលើកឡើងថា តាមរបាយការណ៍របស់ការិយាល័យសុវត្ថិភាពចំណីអាហារនៃនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសម្អាងរបស់ក្រសួងសុខាភិបាលបង្ហាញថា ចាប់តាំងពីឆ្នាំ ២០១៥ ដល់ឆ្នាំ ២០២១ មានមនុស្ស ១១៩ នាក់បានស្លាប់ក្នុងករណីពុលចំណីអាហារ និងមានអ្នករងគ្រោះសរុបមានចំនួន ៤ ៦៩៩ នាក់។
លោកបានថ្លែងថា៖ «អាហារគ្មានសុវត្ថិភាពបង្កការគំរាមកំហែងដល់សុខភាពជាសកលដែលបង្កគ្រោះថ្នាក់ដល់មនុស្សគ្រប់រូប ក្នុងនោះក៏មានទារក កុមារតូច ស្ត្រីមានផ្ទៃពោះ មនុស្សចាស់ និងអ្នកដែលមានជំងឺគឺងាយរងគ្រោះជាមួយនឹងបញ្ហាសុវត្ថិភាពម្ហូបអាហារ»៕