.jpg)
សិក្ខាកាមមកពីប្រទេសកូឡុំប៊ី ក្នុងវគ្គបណ្តុះបណ្តាល។ រូបថត ស៊ីម៉ាក់
សៀមរាបៈ មជ្ឈមណ្ឌលសកម្មភាពកំចាត់មីនកម្ពុជា (CMAC) ដែលជាស្ថាប័នជំនាញលើវិស័យមីនបានបើកវគ្គបណ្តុះបណ្តាលដល់សិក្ខាកាមសកម្មភាពកម្ចាត់មីននៃប្រទេសកូឡុំប៊ី ចំនួន ១៥ រូប ដើម្បីបង្កើនចំណេះជំនាញ និងការគ្រប់គ្រងប្រតិបត្តិការលើវិស័យដោះមីន។
អគ្គនាយកមជ្ឈមណ្ឌលសកម្មភាពកំចាត់មីនកម្ពុជាលោក ហេង រតនា បានឱ្យដឹងថា ក្រោយពីស្ថានភាពជំងឺកូវីដ ១៩ មានភាពល្អប្រសើរនៅក្នុងប្រទេសកម្ពុជា និងប្រទេសកូឡុំប៊ីមក រដ្ឋាភិបាលកូឡុំប៊ីបានសម្រេចចាត់បញ្ជូនសិក្ខាកាមមកទទួលការហ្វឹកហ្វឺនជាមួយអង្គភាព CMAC នៅខេត្តសៀមរាប។ ក្នុងវគ្គហ្វឹកហ្វឺនលើកនេះក៏មានវត្តមានរបស់លោក Andres Pastrana អតីតប្រធានាធិបតីនៃសាធារណរដ្ឋកូឡុំប៊ី ចូលរួមផងដែរ។ លោកថា៖ «វគ្គហ្វឹកហ្វឺននេះផ្តោតលើប្រធានបទស្តីអំពី “ការគ្រប់គ្រងគុណភាព និងបទដ្ឋានប្រតិបត្តិការ” ដែលមានរយៈពេល ២ សប្តាហ៍ គិតចាប់ពីថ្ងៃទី ៣០ ឧសភា ដល់ថ្ងៃទី ៩ ខែមិថុនា ឆ្នាំ ២០២២»។
វគ្គហ្វឹកហ្វឺននេះមានសិក្ខាកាមសរុបចំនួន ១៥ រូប ក្នុងនោះមានស្ត្រីចំនួន ២ នាក់ ទ័ពជើងគោក ១០ នាក់ ទ័ពជើងទឹក ២ នាក់ ទ័ពអាកាសម្នាក់ និងតំណាងស្ថាប័នផ្នែករក្សាសន្តិភាពក្នុងវិស័យកម្ចាត់មីនចំនួន ២ នាក់ មកពីក្រសួងការពារជាតិ និងការិយាល័យបេសកកម្មរក្សាសន្តិភាពជាន់ខ្ពស់។
លោក ហេង រតនា បានគូសបញ្ជាក់ថា ប្រទេសកូឡុំប៊ីគឺជាប្រទេសដំបូងគេដែលទទួលការហ្វឹកហ្វឺន សហប្រតិបត្តិការ ត្បូង-ត្បូង ក្នុងវិស័យសកម្មភាពមីនជាមួយអង្គភាពស៊ីម៉ាក់ដែលគិតមកដល់ពេលនេះ មានសិក្ខាកាមសរុបចំនួន ១៧៣ នាក់ និងវគ្គហ្វឹកហ្វឺនសរុបចំនួន ១០ វគ្គ។
លោកបន្ថែមថា គម្រោងផ្តល់ការហ្វឹកហ្វឺន ត្បូង-ត្បូងនេះ គឺ គាំទ្រដោយរដ្ឋាភិបាលជប៉ុន តាមរយ:ទីភ្នាក់ងារសហប្រតិបតិ្តការអន្តរជាតិរបស់ជប៉ុន (JICA)។
លោក ចេង សេងឃីម អនុប្រធានកងឯកភាពកម្ចាត់មីនទី ៦ ប្រចាំខេត្តព្រះវិហារ ឧត្តរមានជ័យ ស្ទឹងត្រែង និងខេត្តក្រចេះ មានប្រសាសន៍ថា លោកពិតជាមានមោទនភាព ដែលកម្ពុជាក្លាយជាប្រទេសដែលមានគេទទួលស្គាល់លើជំនាញកម្ចាត់មីន និងបានបញ្ជូនសិក្ខាកាមបរទេសមកហ្វឹកហ្វឺនជាបន្តបន្ទាប់។
លោកថា៖ «ព្រោះយើងមានបទពិសោធយូរឆ្នាំហើយ និងមានការហ្វឹកហ្វឺនបានខ្ពស់ ឥឡូវយើងមានចំណេះជំនាញគ្រប់គ្រាន់ សម្រាប់ហ្វឹកហ្វឺនគេវិញ ហើយក្នុងរយៈពេលប៉ុន្មានឆ្នាំចុងក្រោយនេះ មិនមែនមានតែប្រទេសកូឡុំប៊ីទេ ដែលមកសិក្សាស្វែងយល់នៅស្រុកខ្មែរពាក់ព័ន្ធវិស័យមីននេះ»។
លោកបន្តថា កន្លងទៅមានប្រទេសអ៊ីរ៉ាក់ ឡាវ និងប្រទេសមួយចំនួនទៀត ក៏មកទទួលការហ្វឹកហ្វឺននៅកម្ពុជាដែរ ខណៈរូបលោកផ្ទាល់ និងមន្ត្រីជំនាញផ្សេងទៀត ធ្លាប់ចេញទៅក្រៅប្រទេស ដើម្បីបណ្តុះបណ្តាលដល់សិក្ខាកាមបរទេសផងដែរលើវិស័យមីន។
លោកបញ្ជាក់ថា៖ «ខ្ញុំក៏ធ្លាប់ចេញទៅបង្រៀននៅប្រទេសកូឡុំប៊ីដែរ នៅខែធ្នូ ឆ្នាំ ២០២១ ដែល កាលនោះទៅមានគ្នា ៣ នាក់ទៅបង្រៀនមេទាហានគេតែម្តង យើងបង្រៀនពីការគ្រប់គ្រងកិច្ចប្រតិបត្តិការ និងការគ្រប់គ្រងព័ត៌មានវិទ្យា និងគ្រប់គ្រងការហ្វឹកហ្វឺន»។
ជាបទពិសោធក្នុងនាមជាគ្រូបង្រៀនគឺការបណ្តុះបណ្តាលនោះអាស្រ័យទៅលើកាលវិភាគ ដោយបង្រៀនទៅតាមវគ្គនីមួយៗ ដូចជាវគ្គគ្រប់គ្រង វគ្គបច្ចេកទេស ហើយក្នុងនោះក៏មានចុះកម្មសិក្សាផងដែរ។
ដោយឡែកទាក់ទងវិស័យមីននៅកម្ពុជាវិញ លោកឱ្យដឹងថា ដោយសារកម្ពុជាបានផ្លាស់ប្តូរផែនការយុទ្ធសាស្ត្រលើវិស័យរុករក និងកម្ចាត់មីន ដូច្នេះខាងស៊ីម៉ាក់កំពុងរៀបចំបច្ចេកទេសថ្មីៗ និងពន្លឿនកិច្ចសហប្រតិបត្តិការផងដែរ៕
