ភ្នំពេញៈ តុលាការ​កំពូល​នៅ​ថ្ងៃទី​ ៣០ ​ឧសភា បាន​បើកសវនាការ​ជំនុំជម្រះ​បុរស​ជនជាតិ​ជប៉ុន​ចំណាស់​ម្នាក់ ក្នុង​​សំណុំរឿង​ជួញដូរ​គ្រឿងញៀន​មេតំហ្វេតាមីន​ជាង​ ១​ គីឡូក្រាម ប្រព្រឹត្ត​នៅ​ព្រលាន​យន្តហោះ​អន្តរជាតិ​ភ្នំពេញ ហើយ​ត្រូវបាន​សមត្ថកិច្ច​ចាប់ខ្លួន​កាលពី​ខែកុម្ភៈ ឆ្នាំ​ ២០២០ រួច​ត្រូវបាន​តុលាការ​ថ្នាក់ក្រោម​ផ្ដន្ទាទោស​ ២៥ ​ឆ្នាំ និង​ពិន័យ​ប្រាក់​ ៤០​ លាន​រៀល​។

តាម​អង្គហេតុ​របស់​តុលាការ​កំពូល​បង្ហាញថា កាលពី​យប់​ថ្ងៃទី​ ១៥ ខែកុម្ភៈ ឆ្នាំ​ ២០២០ ជនជាប់ចោទ​ឈ្មោះ NONAKA SHUNICHI អាយុ ៧៣ ​ឆ្នាំ​ជា​ជនជាតិ​ជប៉ុន​បាន​យួរ​វ៉ាលិស​ចំនួន​ ២​ ចូលក្នុង​ព្រលានយន្តហោះ​អន្តរជាតិ​ភ្នំពេញ​បម្រុង​ជិះ​យន្តហោះ​ទៅ​ប្រទេស​ជប៉ុន​។ ពេលនោះ​ដោយមាន​ការសង្ស័យ សមត្ថកិច្ច​គយ និង​នគរបាល​ប្រចាំ​ព្រលាន​យន្តហោះ​អន្តរជាតិ​ភ្នំពេញ​បាន​ហៅ​ជនជាប់ចោទ ដើម្បី​សុំ​ពិនិត្យ​វ៉ាលិស​របស់គាត់​។ គ្រានោះ សមត្ថកិច្ច​បាន​រកឃើញ​គ្រឿងញៀន​ ៥​ ដុំ ទម្ងន់​ ១ ៧០៥,៨៥​ ក្រាម​ដាក់​សៀត​ក្នុង​វ៉ាលិស​។ បន្ទាប់មក ជនជាប់ចោទ​ត្រូវ​សមត្ថកិច្ច​ឃាត់ខ្លួន និង​បញ្ជូនទៅ​មន្ទីរ​ប្រឆាំង​គ្រឿងញៀន​ ដើម្បី​សាកសួរ​បន្ត​។

បើតាម​លោក​ចៅក្រម ​១ ​រូប ក្នុង​ចំណោម​ ៥ ​រូប ដែល​ត្រូវបាន​ផ្ទេរសិទ្ធិ​ឱ្យ​​ដោយ​លោក​ចៅក្រម ឃឹម ប៉ុណ្ណ ប្រធាន​ក្រុមប្រឹក្សា​ជំនុំជម្រះ​បាន​អាន​អង្គហេតុ​នៅ​ចំពោះមុខ​ជនជាប់ចោទ​នៅ​ថ្ងៃទី​ ៣០​ ឧសភា​ថា សំណុំ​រឿងនេះ ត្រូវបាន​សាលា​ដំបូង​រាជធានី​ភ្នំពេញ​បើកសវនាការ​ ​និង​ប្រកាស​សាលក្រម​នៅ​ថ្ងៃទី​ ១៥ កញ្ញា​ឆ្នាំ​ ២០២០ ផ្តន្ទាទោស​ជនជាប់ចោទ​ដាក់ពន្ធនាគារ​ ២៥ ​ឆ្នាំ និង​ពិន័យ​ប្រាក់​ចំនួន​ ៤០ ​លាន​រៀល​ចូល​ថវិការដ្ឋ​ចោទ​ពី​បទ​ជួញដូរ​រក្សាទុក និង​ដឹកជញ្ជូន​ដោយ​ខុសច្បាប់​នូវ​សារធាតុ​ញៀន​។

លោក​ចៅក្រម​រូបនោះ​បន្តថា ដោយ​មិន​សុខចិត្ត​នឹង​សាលក្រម​របស់​សាលា​ដំបូង​រាជធានី​ភ្នំពេញ ជនជាប់ចោទ​បាន​ប្តឹង​ឧទ្ធរណ៍​ភ្នំពេញ ហើយ​ត្រូវបាន​សាលា​ឧទ្ធរណ៍​បើក​សវនាការ និង​ប្រកាស​សាលដីកា​នៅ​ថ្ងៃទី​ ២៨ ខែកញ្ញា ឆ្នាំ​ ២០២១ សម្រេច​តម្កល់​ទោស​ដដែល​។

ជនជាប់ចោទ NONAKA SHUNICHI បាន​ប្រាប់​ចៅក្រម​តាមរយៈ​អ្នកបកប្រែ​ភាសា​ក្នុង​អង្គសវនាការ​នៅ​ថ្ងៃទី​ ៣០ ​ឧសភា​ថា ក្នុងអំឡុង​ខែកុម្ភៈ ឆ្នាំ​ ២០២០ ​គាត់​បានធ្វើ​ដំណើរ​ពី​ជប៉ុន​មក​កម្ពុជា​ ដើម្បី​ជួប​ជាមួយ​ជនបរទេស​ម្នាក់​។ ​លុះ​មកដល់​កម្ពុជា គាត់​បាន​ស្នាក់នៅ​សណ្ឋាគារ​មួយ​ក្នុង​រាជធានី​ភ្នំពេញ ហើយ​គាត់​ត្រូវបាន​បុរស​ជនជាតិ​ថៃ​ម្នាក់​ផ្ញើ​វ៉ាលិស​ ១​ ឱ្យ​គាត់ ដើម្បី​យក​ទៅឱ្យ​សាច់ញាតិ​របស់គេ​រស់នៅ​ប្រទេស​ជប៉ុន តែ​ពេល​​មកដល់​ព្រលាន​យន្តហោះ​អន្តរជាតិ​ភ្នំពេញ​ក៏ត្រូវ​សមត្ថកិច្ច​ឆែក​វ៉ាលិស និង​ឃាត់ខ្លួន​គាត់​តែម្តង​។

ជនជាប់ចោទ​ថា​៖ «​កាលពី​នគរបាល​ឃាត់​ខ្ញុំ​ដំបូង​គ្មាន​អ្នកបកប្រែ​ភាសា​ត្រឹមត្រូវ ខ្ញុំ​មិនដឹង​គេ​សរសេរថា​ម៉េច​ទេ ហើយ​ឱ្យ​ខ្ញុំ​ផ្តិតមេដៃ ខ្ញុំ​ក៏​ផ្តិត​ទៅ​។ វ៉ាលិស​នោះ​មិនមែនជា​របស់ខ្ញុំ​ទេ ខ្ញុំ​ស្នើសុំ​តុលាការ​កំពូល​បង្វិល​សំណុំរឿង​ទៅ​សាលាឧទ្ធរណ៍​ភ្នំពេញ​ជម្រះ​ឡើងវិញ​»​។

លោក ជុំ អ៊ៀក ជា​មេធាវី​ការពារ​សិទ្ធិ​ឱ្យ​ជនជាប់ចោទ​បាន​សន្និដ្ឋាន​ក្នុង​បន្ទប់​​សវនាការ​ថា នៅ​ដំណាក់កាល​នគរបាល​សាកសួរ កូនក្តី​លោក គឺ​គ្មាន​អ្នកបកប្រែ​ត្រឹមត្រូវ​ទេ ហើយ​គាត់​ក៏​មិនបាន​ដឹងថា​ក្នុង​វ៉ាលិស​នោះ​មាន​គ្រឿងញៀន​ដែរ​៖ «​ខ្ញុំ​សុំឱ្យ​ក្រុមប្រឹក្សា​ជំនុំជម្រះ​ពិនិត្យ និង​ពិចារណា​លើ​ការស្នើសុំ​របស់​កូនក្តី​ខ្ញុំ​»​។

លោក​ ប៊ូ ប៊ុនហាង តំណាង​មហាអយ្យការ​បាន​សន្និដ្ឋាន​ថា ការជួញដូរ​គ្រឿងញៀន​នេះ សមត្ថកិច្ច​បាន​ឆែក​ឃើញ​ជាក់ស្តែង​។ ​ហេតុដូច្នេះ​សាលដីកា​របស់​សាលាឧទ្ធរណ៍​ភ្នំពេញ​សម្រេច​ត្រឹមត្រូវ​តាមច្បាប់​ហើយ​៖ «​ខ្ញុំ​ស្នើសុំ​តម្កល់​សាលដីកា​ទុកជា​បានការ​ដដែល​»​។

ក្រោយ​ជំនុំជម្រះ​ប្រមាណ​ជិត ​១​ ម៉ោង លោក​ចៅក្រម ឃឹម ប៉ុណ្ណ ប្រធាន​ក្រុមប្រឹក្សា​ជំនុំជម្រះ​ថ្លែងថា សាលដីកា​នៃ​សំណុំ​រឿងនេះ​នឹង​ប្រកាស​នៅ​ថ្ងៃទី ​៦ មិថុនា ខាងមុខនេះ​៕