ភ្នំពេញៈ ក្រសួងអប់រំ គ្រឹះស្ថានសិក្សា និងអង្គការដៃគូនាថ្ងៃទី ៣០ ខែឧសភា បានរួមគ្នាបើកយុទ្ធនាការផ្សព្វផ្សាយសេចក្ដីណែនាំស្តីពីការហាមឃាត់ការប្រើប្រាស់ ការផ្សព្វផ្សាយពាណិជ្ជកម្ម ការតាំងលក់ផលិតផលថ្នាំជក់ ដល់និស្សិតសាកលវិទ្យាល័យប៊ែលធីជាង ៣០០ នាក់ ដើម្បីកាត់បន្ថយ និងឈប់ប្រើប្រាស់ផលិតផលថ្នាំជក់ និងគ្រឿងញៀន។ នេះបើយោងតាមអគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀន (NACD)។
NACD បញ្ជាក់ក្នុងសេចក្តីប្រកាសព័ត៌មានថា៖ «នៅសាកលវិទ្យាល័យប៊ែលធីអន្តរជាតិ ក្រសួងអប់រំ គ្រឹះស្ថានសិក្សា អង្គការដៃគូ រួមគ្នាបើកយុទ្ធនាការផ្សព្វផ្សាយសេចក្ដីណែនាំស្តីពីការហាមឃាត់ ការប្រើប្រាស់ ការផ្សព្វផ្សាយពាណិជ្ជកម្ម ការតាំងលក់ផលិតផលថ្នាំជក់ និងកិច្ចសហការជាមួយឧស្សាហករថ្នាំជក់តាមគ្រឹះស្ថានឧត្តមសិក្សា ដើម្បីកាត់បន្ថយ និងឈប់ប្រើប្រាស់ផលិតផលថ្នាំជក់ និងគ្រឿងញៀន សំដៅរក្សាបាននូវសុខភាពល្អជូនសិស្ស និងក្រុមគ្រួសារ»។
នៅក្នុងពិធីផ្សព្វផ្សាយនេះ អ្នកជំនាញបានលើកយកមកបង្ហាញនូវបញ្ហា និងគ្រោះថ្នាក់នៃផលិតផលថ្នាំជក់ និងគ្រឿងញៀនដែលតែងតែបំផ្លាញសុខភាពមនុស្ស និងសម្លាប់មនុស្សជារៀងរាល់ថ្ងៃលើសកលលោក និងកលល្បិចរបស់ឧស្សាហកម្មថ្នាំជក់ និងយុទ្ធសាស្ត្រទប់ស្កាត់។
NACD បានដកស្រង់សម្ដី លោក លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទានៃ NACD ថា និស្សិត ប៊ែលធី មិនមែនជាមុខសញ្ញាប្រើប្រាស់ថ្នាំជក់ និងគ្រឿងញៀនទេ តែពួកគេជាមុខសញ្ញាត្រូវបង្ការ អប់រំ ដើម្បីក្លាយជាជនសកម្មជួយផ្សព្វផ្សាយបន្តទៅគ្រួសារ និងមនុស្សជាទីស្រឡាញ់ពីគ្រោះថ្នាក់នៃគ្រឿងញៀន និងថ្នាំជក់។
NACD បញ្ជាក់ថា លោកស្រី សឿ សុជាតា អនុរដ្ឋលេខាធិការក្រសួងអប់រំបានថ្លែងអំណរគុណដល់ស្ថាប័ន អង្គភាព និងអង្គការចលនា ដើម្បីសុខភាពកម្ពុជា និងអង្គការសុខភាពពិភពលោក (WHO) និងសាកលវិទ្យាល័យប៊ែលធី ដែលបានរួមសហការផ្សព្វផ្សាយសេចក្តីណែនាំនេះ ដែលជាការងារសំខាន់ចាំបាច់សម្រាប់សុខភាពសិក្សា គឺការមិនប៉ះពាល់ មិនពាក់ព័ន្ធនឹងបញ្ហាថ្នាំជក់ និងគ្រឿងញៀន។
លោកស្រីត្រូវបានស្រង់សម្ដីថា៖ «និស្សិតគ្រប់រូបជាទំពាំងត្រូវស្នងឫស្សី ដែលយើងទាំងអស់គ្នាត្រូវតែមើលថែ ដើម្បីឱ្យទំពាំងលូតលាស់ល្អទើបឫស្សីមានគុណភាពល្អ»។
ក្រសួងអប់រំ កាលពីខែកុម្ភៈ ឆ្នាំ ២០២១ បានចេញសេចក្ដីណែនាំហាមមិនឱ្យគ្រឹះស្ថានសិក្សាសាធារណៈ និងឯកជនចាប់ដៃគូសហការជាមួយឧស្សាហករថ្នាំជក់ទទួលការឧបត្ថម្ភគាំទ្រ ឬចុះអនុស្សរណៈយោគយល់គ្នាជាមួយឧស្សាហករថ្នាំជក់ ផ្ដល់ទីកន្លែង ឬទីធ្លាគ្រឹះស្ថានសិក្សាសាធារណៈ និងឯកជន សម្រាប់រៀបចំកម្មវិធីផ្សព្វផ្សាយ ឬពិព័រណ៍ដែលជាកម្មវិធីរបស់ឧស្សាហកម្មថ្នាំជក់ និងត្រូវចូលរួមលុបបំបាត់សកម្មភាពប្រើប្រាស់ផលិតផលថ្នាំជក់តាមគ្រប់រូបភាព។
លោក រស់ សុវាចា អ្នកនាំពាក្យក្រសួងអប់រំប្រាប់ភ្នំពេញប៉ុស្តិ៍នាថ្ងៃទី ៣០ ខែឧសភាថា អវត្តមានគ្រឿងញៀនខុសច្បាប់ និងគ្រឿងស្រវឹងនៅក្នុងគ្រឹះស្ថានសិក្សាគឺជាការចូលរួមលើកកម្ពស់សុខភាពបុគ្គល គុណភាពអប់រំ និងគុណភាពជីវិត។ ក្រសួងអប់រំ ស្វាគមន៍ និងថ្លែងអំណរគុណចំពោះការលើកទឹកចិត្ត និងកិច្ចសហការជាមួយគ្រប់ភាគីពាក់ព័ន្ធដើម្បីលើកកម្ពស់សុខភាពរបស់អ្នកសិក្សា និងភាគីពាក់ព័ន្ធតាមរយ:គ្រប់រូបភាព។
លោកបានថ្លែងថា គ្រឿងញៀន និងគ្រឿងស្រវឹងអាចបណ្ដាលឱ្យមានគ្រោះថ្នាក់ដល់សុខភាព និងអាយុជីវិតរបស់អ្នកសិក្សា និងភាគីពាក់ព័ន្ធ។ ក្រសួងអប់រំ បាននិងកំពុងបន្តសហការជាមួយគ្រប់ភាគីពាក់ព័ន្ធ ដើម្បីលើកកម្ពស់ការយល់ដឹងពីផលប៉ះពាល់នៃការប្រើប្រាស់គ្រឿងញៀន និងគ្រឿងស្រវឹង។ លោកបញ្ជាក់ថា៖ «ក្រសួងអប់រំសហការជាមួយដៃគូការងារផ្សេងៗ ដើម្បីផ្សព្វផ្សាយពីផលប៉ះពាល់ និងវិធានការមានប្រសិទ្ធភាពក្នុងការកាត់បន្ថយគ្រោះថ្នាក់ បណ្ដាលមកពីការប្រើប្រាស់គ្រឿងញៀនខុសច្បាប់ និងគ្រឿងស្រវឹង»។
លោក រស់ សុវាចា បន្ថែមថា ការអភិវឌ្ឍសម្ភារឧបទេសសម្រាប់ការអប់រំ បង្ការ ទប់ស្កាត់ការប្រើប្រាស់គ្រឿងញៀនខុសច្បាប់នៅតាមគ្រឹះស្ថានសិក្សាមានគោលដៅធ្វើឱ្យលែងមានការប្រើប្រាស់គ្រឿងញៀននៅគ្រឹះស្ថានសិក្សាដោយបង្កើនប្រសិទ្ធភាពក្នុងការបង្ការ ទប់ស្កាត់ការប្រើប្រាស់គ្រឿងញៀន តាមរយ:ការពិនិត្យវឌ្ឍនភាពការងារតាក់តែងឯកសារមេរៀន។
លោកបញ្ជាក់ថា៖ «ជារួម ការងារនេះស្ថិតក្នុងផែនការយុទ្ធសាស្ត្រវិស័យអប់រំឆ្នាំ ២០១៩-២០២៣ និងឆ្ពោះទៅឆ្នាំ ២០៣០ ដែលក្រសួងអប់រំ ប្តេជ្ញាសម្រេចឱ្យបានគោលដៅអភិវឌ្ឍន៍ប្រកបដោយចីរភាពទី ៤ ស្តីពីការអប់រំ ដោយឈរលើគោលការណ៍គុណភាព សមធម៌ បរិយាប័ន្ន ការសិក្សាពេញមួយជីវិតសម្រាប់ទាំងអស់គ្នា»៕