.jpg)
កងកម្លាំងនគរបាលខេត្តកំពង់ស្ពឺ កំពុងរៀបចំសាងសង់ផ្ទះពលរដ្ឋឡើងវិញ បន្ទាប់ពីរងការខូចខាតដោយសារខ្យល់កន្ត្រាក់។ រូបថត នគរបាល
តាកែវ/កំពង់ស្ពឺៈ យ៉ាងហោចណាស់មានមនុស្សក្មេងចាស់ប្រុស-ស្រី ៧ នាក់ បានរងរបួសធ្ងន់ និងស្រាលដោយករណីភ្លៀង លាយឡំខ្យល់កន្ត្រាក់ ធ្វើឱ្យបាក់រលំផ្ទះ សង្កត់លើនៅស្រុកព្រៃកប្បាស ខេត្តតាកែវ និង ផ្ទះចំនួន ១៦២ ខ្នងទៀត បានរងការខូចខាតយ៉ាងដំណំ ខណៈនៅស្រុកគងពិសី ខេត្តកំពង់ស្ពឺ រងការខូចខាតចំនួន ២៩ ខ្នងផ្ទះ។
លោក រស់ ថេត អធិការរងស្រុកព្រៃកប្បាស បានប្រាប់ ភ្នំពេញ ប៉ុស្តិ៍ថា កាលពីរសៀលថ្ងៃទី ៣០ ខែឧសភា មានករណីភ្លៀងលាយឡំខ្យល់កន្ត្រាក់កើតឡើង បណ្ដាលឱ្យខូចខាតលំនៅឋានប្រជាពលរដ្ឋ ចំនួន ១៦២ ខ្នង ក្នុងនោះបាក់រលំ ខូចខាតទាំងស្រុងចំនួន ២២ ខ្នង និង បង្កឱ្យមានជនរងគ្រោះចំនួន៧នាក់ ក្នុងនោះមានកុមារីម្នាក់ និងកុមារាម្នាក់ បានរងរបួសធ្ងន់។ ចំណែកមនុស្សចាស់៥នាក់ទៀតរងរបួសស្រាល។
លោកបានបន្តថា ក្មេងស្រីរងគ្រោះ ឈ្មោះ ស្រ៊ី សុខណា អាយុ ២ ឆ្នាំ មានទីលំនៅ ភូមិសំរោងម្រះ ឃុំបានកាម ស្រុកព្រៃកប្បាស បានរងរបួសបាក់ជើងម្ខាង ដោយត្រូវសរសរផ្ទះបាក់រលំសង្កត់ នៅពេលមានខ្យល់កន្ត្រាក់កើតឡើង។
នាងត្រូវបានឪពុកម្ដាយ និងក្រុមបុគ្គលិកសុខាភិបាល នៃមន្ទីរពេទ្យស្រុកព្រៃកប្បាស បញ្ជូនទៅកាន់មន្ទីរពេទ្យគន្ធបុប្ផា ក្នុងរាជធានីភ្នំពេញ ដើម្បីពិនិត្យនិងព្យាបាលរបួស។ ចំណែកកុមារារងគ្រោះឈ្មោះ ហុន ពិសិដ្ឋ អាយុ ១០ ឆ្នាំ មានទីលំនៅភូមិជ្រយ ឃុំចំប៉ា ស្រុកព្រៃកប្បាស បានរងរបស់ក្បាល ត្រូវដេរ៣ថ្នេរ ដោយសារកំណាត់ឈើធ្នឹមផ្ទះបាក់ធ្លាក់ត្រូវ។
លោកបានបញ្ជាក់ថា៖ «តាមរយៈសាច់ញាតិក្រុមគ្រួសារក្មេងស្រីរងគ្រោះ នៅពេលនេះ នាងកំពុងស្ថិតនៅក្នុងបន្ទប់សង្គ្រោះបន្ទាន់ ដើម្បីរង់ចាំការវះកាត់ជើងដែលបាក់នោះ នៅឯមន្ទីរពេទ្យគន្ធបុប្ផា ក្នុងរាជធានីភ្នំពេញនៅឡើយ»។
បើតាមលោក រស់ ថេត នៅព្រឹកថ្ងៃទី ៣១ ខែ ឧសភា ឆ្នាំ ២០២២ កម្លាំងបញ្ជាការឯកភាពស្រុកព្រៃកប្បាសប្រមាណ ៥០ នាក់ បានចុះអន្តរាគមន៍ ជួយរុះរើ ប្រមូលផ្ដុំកំណាត់ស័ង្កសី និង កំណាត់ឈើ នៃខ្នងផ្ទះប្រជាពលរដ្ឋដែលរងការខូចខាត ទុកដាក់ឱ្យមានសុវត្ថិភាព ព្រមទាំងបានជួយជួសជុលផ្ទះជូនគ្រួសារពលរដ្ឋរងគ្រោះ បានជាង ៦០ ខ្នងហើយ និងគ្រោងជួយជួសជុលបន្តទៀត នៅព្រឹកថ្ងៃទី ១ ខែមិវុនា។
ចំណែក លោក ឃឹម ផាន់រ៉ា អធិការស្រុកគងពិសី ខេត្តកំពង់ស្ពឺ បានប្រាប់ ភ្នំពេញ ប៉ុស្តិ៍ថា ខ្យល់កន្ត្រាក់កាលពីរសៀលថ្ងៃទី ៣០ ខែឧសភា ក៏បានបង្កឱ្យប៉ះពាល់ និងខូចខាតផ្ទះប្រជាពលរដ្ឋ ចំនួន ២៩ ខ្នង និងរថយន្ត ១ គ្រឿង នៅក្នុងឃុំចំនួន ៥ នៃស្រុកគងពិសីនេះផងដែរ ប៉ុន្តែគ្មានពលរដ្ឋណាម្នាក់រងគ្រោះថ្នាក់ ដោយករណីនេះទេ៕
វីដេអូ៖
