.jpg)
ម្ដាយនាំកូនមកព្យាបាលជំងឺនៅមន្ទីរពេទ្យគន្ធបុប្ផា នាពេលកន្លងមក។ ហុង មិនា
ភ្នំពេញៈ យ៉ាងហោចណាស់កុមារមានជំងឺធ្ងន់ជាង ៩ ពាន់នាក់ត្រូវបានទទួលឱ្យសម្រាកព្យាបាលក្នុងមន្ទីរពេទ្យគន្ធបុប្ផា និងទទួលព្យាបាលជាង ៥ ម៉ឺន នាក់នៅក្នុងខែឧសភា ឆ្នាំ ២០២២ ខណៈដែលមន្ទីរពេទ្យនេះកំពុងធ្វើយុទ្ធនាការ «១ ម៉ឺនរៀល ១ ម៉ឺននាក់» ដើម្បីស្វែងរកថវិកាគាំទ្រដល់មន្ទរពេទ្យ។
របាយការណ៍មន្ទីរពេទ្យគន្ធបុប្ផា បានឱ្យដឹងថា កុមារឈឺចំនួន ៥២ ០៤៥ នាក់ ត្រូវបានពិនិត្យព្យាបាលនៅក្នុងផ្នែកពិគ្រោះជំងឺក្រៅ ហើយកុមារមានជំងឺធ្ងន់ៗចំនួន ៩ ៩០៦ នាក់ រួមទាំងកុមារមានជំងឺគ្រុនឈាម ចំនួន ១៦៥ នាក់ ត្រូវបានដាក់ឱ្យសម្រាកព្យាបាលនៅក្នុងមន្ទីរពេទ្យ។
របាយការណ៍នេះបានបង្ហាញទៀតថា កុមារចំនួន ១ ៨៨៦ នាក់ ត្រូវបានទទួលការវះកាត់ និងកុមារចំនួន ១០១ នាក់បានទទួលការវះកាត់បេះដូង និងភ្ជិតប្រហោងបេះដូងតាមសរសៃឈាមនៅមន្ទីរពេទ្យគន្ធបុប្ផា រាជធានីភ្នំពេញ និងខេត្តសៀមរាប។
របាយការណ៍បន្តថា នៅផ្នែកសម្ភពនៃមន្ទីរពេទ្យជ័យវរ្ម័នទី៧ ឬហៅថាគន្ធបុប្ផាទី៣ ស្ត្រីមានផ្ទៃពោះចំនួន ៧ ០៣៨ នាក់ បានមកពិនិត្យតាមដានផ្ទៃពោះនិងព្យាបាល នៅក្នុងផ្នែកពិគ្រោះជំងឺក្រៅនៃមន្ទីរសម្ភព និងសម្រាលកូនបានចំនួន ១ ៥១៦ នាក់។
មូលនិធិគន្ធបុប្ផាកម្ពុជាបានបើកយុទ្ធនាការ «១ ម៉ឺនរៀល ១ ម៉ឺននាក់» រយៈពេល ១ ខែ ដោយចាប់ផ្តើមក្នុងថ្ងៃទិវាកុមាអន្តរជាតិ ១ មិថុនា ដើម្បីបំផុសស្មារតីខ្មែរជួយខ្មែរចូលរួមបរិច្ចាកថវិកាឲ្យបាន ១ ម៉ឺននាក់ ក្នុងម្នាក់ ១ ម៉ឺនរៀល ដើម្បីជួយដល់កិច្ចដំណើរការមន្ទីរពេទ្យគន្ធបុប្ផាបន្តទៀត ហើយសង្ឃឹមថា ការចូលរួមបរិច្ចាគថវិកាជូនមូលនិធិគន្ធបុប្ផាកម្ពុជាដោយទឹកចិត្តសប្បុរស ដើម្បីបន្តបេសកកម្មសង្គ្រោះទារក និងកុមារនៅកម្ពុជា។
លោក ចន ណារិទ្ធ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានលេខាធិការរដ្ឋានមូលនិធិគន្ធបុប្ផាកម្ពុជាថ្លែងថា សកម្មភាពបរិច្ចាកសម្រាប់ថ្ងៃដំបូងនេះ គឺមានការផុសផុលយ៉ាងច្រើននៅគ្រប់បណ្តាញបានផ្សព្វផ្សាយទាំងអស់ ទាំងបណ្តាញធនាគារដៃគូ ទាំងបណ្តាញរបស់មូលនិធិគន្ធបុប្ផាកម្ពុជាផ្ទាល់ និងទាំងបណ្តាញផ្ទៃក្នុងក្រសួងស្ថាប័ន។
យោងតាមឯកសារស្តីពីបច្ចុប្បន្នភាពគាំពារសង្គមកម្ពុជា ស្តីពី «មូលនិធិបរធនស្របតាមស្តង់ដារអន្តរជាតិសម្រាប់គន្ធបុប្ផា» ដែលចេញផ្សាយដោយអគ្គលេខាធិការដ្ឋានក្រុមប្រឹក្សាជាតិគាំពារសង្គមកាលពីខែឧសភា បានឱ្យដឹងថា បច្ចុប្បន្នក្នុង ១ ថ្ងៃ មន្ទីរពេទ្យគន្ធបុប្ផាទទួលអ្នកជំងឺជាមធ្យមប្រមាណពី ២ ៥០០ នាក់ ទៅ ៣ ០០០ នាក់ ដែលក្នុងនោះប្រមាណពី ៣៥០ នាក់ ទៅ ៤០០ នាក់ ស្ថិតក្នុងស្ថានភាពត្រូវសម្រាកព្យាបាលក្នុងមន្ទីរពេទ្យ។
ឯកសារនេះបញ្ជាក់ថា៖ «កត្តាសំខាន់ដែលគួរឱ្យកត់សម្គាល់ គឺមន្ទីរពេទ្យបានឆ្លុះបញ្ចាំងពីការផ្តល់សេវាសុខាភិបាល ប្រកបដោយគុណភាព និងមានទំនុកចិត្តពីមហាជន។ នេះគឺជាលទ្ធផល គួរជាទីមោទនៈសម្រាប់វិស័យគាំពារសុខភាពកុមារនៅកម្ពុជា ដោយ បច្ចុប្បន្នមន្ទីរពេទ្យគន្ធបុប្ផាសម្រេចបាននូវអត្រាមរណភាពកុមារក្នុងកម្រិតមួយដ៏ទាបត្រឹម ០,២៩ ភាគរយ ខណៈដែលអត្រានេះនៅឆ្នាំ ១៩៩៨ មានរហូតដល់ ៦ ភាគរយ»។
ឯកសារដដែលបន្តថា បច្ចុប្បន្នមន្ទីរពេទ្យគន្ធបុប្ផាទាំង ៥ ទីតាំង មានបុគ្គលិកសរុបចំនួន ២ ៣៤៥ នាក់ ក្នុងនោះ ១ ៧៤៩ នាក់ ជាបុគ្គលិកជំនាញសុខាភិបាល។ បុគ្គលិកទាំងអស់របស់មន្ទីរពេទ្យគន្ធបុប្ផាត្រូវបានទទួលស្គាល់ថាមានសមត្ថភាព និងវិន័យខ្ពស់ គ្មានការធ្វើការក្រៅម៉ោងនោះទេ។ បច្ចុប្បន្ន កុមារដែលមានអាយុចាប់ពី ០-១៤ ឆ្នាំ មានចំនួនប្រមាណ ៣០ភាគរយនៃចំនួនប្រជាជនកម្ពុជាសរុប។ ប៉ុន្តែ ១០០ ភាគរយនៃពួកគេគឺជាអនាគត កម្លាំងពលកម្ម បម្រើប្រទេសជាតិ និងជាឪពុកម្តាយជំនាន់ក្រោយ។ សុខភាពរបស់ពួកគេជាកត្តាចម្បងសម្រាប់ភាពរីកចម្រើននៃសេដ្ឋកិច្ច និងសង្គម៕
