សៀមរាបៈ ​អាជ្ញាធរ​ជាតិ​អប្សរា​បណ្តុះ​បណ្តាល​ឲ្យ​មន្ត្រី​របស់​ខ្លួន​ចេះ​ស្វែង​រក​ប្រភព​ឯកសារ ​ចេះ​ប្រើប្រា​ស់​ឯកសារ​ចាស់ៗ​និង​ចេះ​កសាង​ឯក​សារ​បែប​វិទ្យា​សាស្ត្រ​ ហើយ​រក្សា​ទុក​ឯកសារ​ទាំ​ង​នោះ​សម្រាប់​អ្នក​ជំ​នាន់​ក្រោយ​អាច​សិក្សា​ស្រាវ​ជ្រាវក្នុង​ការបន្ត​ថែ​រក្សា ​អភិ​រក្ស និង​ជួស​ជុល តាមរយៈ​ឯក​សារ​ទាំង​នោះ។ នេះ​បើតាម​ការ​ឲ្យ​ដឹង​ពី​អ្នកនាំ​ពាក្យ​អាជ្ញា​ធរ​ជាតិ​អប្សរា។

លោក ​ឡុង កុសល អ្នក​នាំ​ពាក្យ​អាជ្ញាធរ​ជាតិ​អប្សរាថ្លែង​នៅ​ថ្ងៃទី ​១ ខែ​មិថុនា​ថា នៅ​ថ្ងៃទី​ ៣១​ ខែ​ ឧសភា ​ឆ្នាំ​២០២២ ​អាជ្ញា​ធរ​ជាតិ​អប្សរា សហ​ការ​ជាមួយ​សាលា​បារាំង​ចុង​បូព៌ាបាន​បើក​សិក្ខាសា​លា​ស្តីពី «បណ្ណ​សារ​អភិរក្ស​អង្គរ»នៅ​សាល​លលៃនៃ​មជ្ឈ​មណ្ឌល​បណ្តុះ​បណ្តាល​អ​ង្គ​រដើម្បី​បង្រៀន​ឲ្យ​អ្នក​ជំនាញ​ចេះ​ប្រើ​ប្រាស់​ឯកសារ​ចាស់ៗ​ ដែល​បាន​រក្សា​ទុក​ ព្រោះ​ឯកសារ​មួយ​ចំនួន ​នៅមុនឆ្នាំ​ ១៩៧៥ ​ត្រូវ​បាន​រក្សា​ទុក​នៅ​មួយ​កន្លែង ប៉ុន្តែ​​ក្រោយ​មក ​ក៏មានការ​​យក​ទៅ​ប្រទេស​បារាំង​មួយ​ចំនួន​។

លោក​បន្ត​ថា មួយ​វិញ​ទៀត តាមរយៈ​សិក្ខា​សាលា​នេះ​ក៏​បង្រៀន​ឲ្យ​មន្ត្រី​ជំនាញ​ចេះ​ក៏​សាង​ឯក​សារ​លក្ខណៈ​បែប​វិទ្យា​សាស្ត្រ មាន​ន័យ​ថា ការងារ​ពីមួយ​ជំ​ហាន​ទៅមួ​យ​ជំ​ហាន​ត្រូ​វធ្វើ​អ្វីខ្លះ នៅពេល​រក​ឃើញ​របស់​អ្វីមួ​យ​មាន​អ្វីខ្លះ​ ហៅ​ឈ្មោះ​ថា ​យ៉ាង​ម៉េច​ ត្រូវ​​វាស់​ទំហំ​យ៉ាង​ណា ហើយ​របស់​នោះ​រក​ឃើញ​នៅ​ទីតាំង​ណា​នោះ ​សុទ្ធតែ​ជា​ឯក​សារ​ប្រវត្តិ​សាស្ត្រ​ទាំង​អស់​ដែល​នឹង​អាច​ភ្ជាប់​ទុក​ជាមួយ​ការ​វិវឌ្ឍ​នៅ​ទីកន្លែង​នោះដែ​លអាច​រយៈ​ពេល​ ១០០ ​ឆ្នាំ​ទៀត អ្នក​ស្រាវ​ជ្រាវ ជួស​ជុល​ជំនាន់​ក្រោយ ​អាច​ប្រើប្រា​ស់​ឯកសារ​ទាំង​នោះបា​ន​ជា​ឯក​សារ​គោល​។

លោក​ថ្លែង​ថា៖ «គោលបំ​ណង​របស់​យើង​គឺ​ធ្វើយ៉ាង​ណា​ផ្តល់នូវ​ចំណេះ​ ទាំង​ទ្រឹស្តី​និង​ជំនាញ​បែប​អនុវត្ត​ជូន​ទៅដល់​មន្ត្រី បុគ្គលិក ជំនាញ​របស់​យើង​ឲ្យ​គាត់​អនុវត្ត ​ឲ្យ​គាត់​ធ្វើ​ដើម្បី​គាត់​មាន​លទ្ធភាព​កសាង​ឯកសារ​ទាំងអស់​នោះ​សម្រាប់​ទុក​ទៅ​ថ្ងៃ​អនាគត។អ៊ី​ចឹង​ថ្ងៃក្រោ​យ​បើ​ត្រូវ​ការរក​ឯកសារស្អី​ ១០០ ឆ្នាំក្រោយ ​ពាក់​ព័ន្ធ​ការ​ជួស​ជុល​ឬ​កំណាយ​អី​នៅក្នុង​រមណីយ​ដ្ឋាន​អង្គរ​គឺ​យើង​មាន»​។

លោក ​ឡុង ​កុសល បញ្ជាក់ថា​ ការតម្កល់​ទុក​ឯក​សា​រ​របស់​អាជ្ញា​ធរ​ជាតិ​អប្សរា​ គឺអាច​ប្រើប្រាស់​បានជា​សកល ​ហើ​ការ​រក្សា​ទុក​នោះ​ទៀត​សោត​គឺមាន​ទាំង​បែប​ឯក​សារ​ក្រ​ដាស​ផង និង​បែប​ជា​ឌីជី​ថល​ផង​ដែរ​។

អ្នកនាំ​ពាក្យ​អាជ្ញា​ធរ​ជាតិ​អប្សរា​រូបនេះ​បាន​លើក​ឡើង​ថា សិក្ខា​កាម​ទាំង​អស់​សុទ្ធតែ​អ្នក​ត្រូវ​បន្ត​វេនជា​មនុស្ស​គន្លឹះ​ទៅ​ថ្ងៃ​អនាគត​​ដែលមា​ន​ភារ​កិច្ច​ក្នុងការ​ចែក​រំលែក​ដល់​អ្នក​ជំនាន់​ក្រោយ​នូវ​កិច្ចកា​រ​អ្វីដែ​ល​បាន​រៀបចំ​នៅពេ​ល​បច្ចុប្បន្ន​។លោក​បន្ថែមថា ​​ការរៀបចំ​បណ្តុះប​ណ្តាល​ប​ណ្ណ​សារ​អង្គរ​នេះគឺ​ស្តែង​ពី​ចំណេះ​ជំនាញ​ដែល​យើង​មាននិង​ធ្វើ​ឡើង​ទៅតាម​បច្ចេក​ទេស ការ​ស្រាវជ្រាវ​​ច្បាស់លា​ស់ ពាក់​ព័ន្ធ​នឹង​ការ​រៀប​ចំ​ឯកសា​រ​ប្រចាំ​ថ្ងៃ។​

អាជ្ញា​ធរ​ជាតិ​អប្សរា​មាន​នូវ​ទស្សនៈ​វែង​ឆ្ងាយ ​ក្នុង​ន័យ​បណ្តុះ​បណ្តាល​កម្រិត​ចំណេះ​ដឹង​ ទាំង​ផ្នែក​ទ្រឹស្តី ​និង​ការ​អនុវត្ត​ជូន​ដល់​មន្ត្រី-បុគ្គលិក រួម​ទាំង​អ្នក​ជំនាញ​គ្រប់​លំដាប់​ថ្នាក់។​ អាជ្ញាធរ​ជាតិ​អប្សរា​ ដាក់​ទិសដៅ​ធ្វើយ៉ាង​ណា​ឲ្យមជ្ឈមណ្ឌល​បណ្តុះ​បណ្តាល​អ​ង្គ​រ មិន​ត្រឹម​តែ​សម្រាប់​អ្នក​ជំនាញ​ការ​ជាតិ ឬ​អន្តរ​ជាតិ​ដែល​បំពេញកា​រងារ​នៅក្នុ​ង​ព្រះរា​ជាណា​ចក្រ​កម្ពុជា​ប៉ុណ្ណោះ​ទេគឺ​មណ្ឌល​បណ្តុះ​បណ្តាល​អង្គរ​នឹង​អាច​ក្លាយ​ជា​មជ្ឈ​មណ្ឌល​បណ្តុះ​បណ្តាល​ថ្នាក់​តំបន់​នាពេល​ថ្ងៃ​អនា​គត​ផងដែរ។នេះ​បើតាម​ការប​ញ្ជាក់​បន្ថែម​ពី​លោក ឡុង ​កុសល។​

លោក ​សួ​ម សុភា ជា​សិក្ខា​កាម​ម្នាក់​ដែល​ចូលរួម​ក្នុង​វគ្គ​សិក្ខាសា​លា​នេះ​បាន​ឲ្យ​ដឹង​នៅ​ថ្ងៃទី ១​ ខែមិថុនា​ថា នេះ​ជា​សិក្ខាសា​លា​ដ៏​ល្អ​មួយ​ដែល​បាន​ផ្សព្វ​ផ្សាយ​ឲ្យ​បានដឹង​អំពី​ការ​រៀបចំ​​ចងក្រង​ឯកសា​រនិង​ឯកសា​រ​ប្រវ​ត្តិសាស្ត្រផ្សេ​ងៗជា​ច្រើន​ដែលមា​ន​នៅក្នុ​ង​អភិរ​ក្ស​ដ្ឋា​ន​អង្គរ ​សារមន្ទីរ​ជាតិ និង​អាជ្ញាធ​រ​ជាតិ​អប្សរា​ជាដើម។ តាម​រយៈ​សិក្ខា​សាលា​​នេះ វា​គ្មិន​បាន​បង្រៀន​ពី​វិធី​ស្រាវ​ជ្រាវ​តាម​រយៈ​តំណ​ភ្ជាប់​អេ​ឡិច​ត្រូ​និក​ក្នុង​ការ​ស្វែងរក​ឯកសា​រ។លោក​ថ្លែងថា៖«គេ​មាន​ឯកសារ​របស់គេ​ដើម្បី​ឲ្យ​យើង​ចូលទៅ​ដើម្បី​អាច​មើល​ព័ត៌មាន​ពាក់​ព័ន្ធ​ទៅនឹង​ឯ​កសារផ្សេ​ងៗបា​ន»។

លោក​បន្ត​ថា អ្ន​កជំនាញ​បា​នបង្ហាញ​អំពី​វិធី​ត្រូវ​រ​ក្សាទុក​ឯក​សារ​យ៉ាង​ដូចម្តេ​ច ​ដើម្បី​កុំ​ឲ្យ​វា​បាត់​បង់ ហើយ​ឯកសារ​អ្វីខ្លះ​ដែល​ត្រូវ​យក​មក​រក្សា​ទុកដែល​ក្នុង​នោះ​អ្នកជំ​នាញ​បាន​លើក​ឡើង​ជា​ឧទា​ហរណ៍ ​ពាក់ព័ន្ធ​ទៅ​នឹង​ឯកសារ​ទាក់​ទង​ការជួសជុ​ល និង​អ​ភិរក្ស​ប្រាសា​ទព្រោះ​នៅក្នុង​អភិ​រក្ស​ដ្ឋា​ន​អង្គរ​ក្តី សារមន្ទីរ​ជាតិ​ក្តី ក៏ដូច​ជា​អាជ្ញាធរ​ជាតិ​អប្សរា​ភាគ​ច្រើន ឯក​សារ​ដែល​ត្រូវបាន​រក្សាទុក​តាំង​ពី ឆ្នាំ ១៩០៨ ​ដល់ ​១៩៧៥ គឺ​ជា​ឯកសារ នៃ​ការងា​រ​ជួសជុល​អភិរ​ក្ស។ ​

លោ​ក​​ថ្លែងថា​៖ «ក្នុងកា​រ​ថែរក្សា​ឯកសារ​ហ្នឹង​កាលពី​មុន​មក​គឺ​គេ​មាន​ការថត​ស្គែ​ន ឧទាហរ​ណ៍​ដូចជា ​រូប​ថតចា​ស់ៗហ្នឹង​គេ​មាន​ការថត​ស្គែ​ន ​ស្គ្រី​នស​​ត និង​មានការ​បង្ហោះ​ចូលទៅក្នុ​ង​វេ​​ប​សាយ​​របស់គេ​ដើម្បី​ធ្វើការ​រក្សា​ទុកនិង​ងាយ​ស្រួល​សម្រាប់​យើង​ក្នុង​ការ​ស្វែងរ​ក» ​៕