ភ្នំពេញៈ សាលាដំបូងរាជធានីភ្នំពេញបានបន្តបើកសវនាការលោក កឹម សុខា ប្រធានអតីតគណបក្សសង្គ្រោះជាតិលើកទី ៤២ ពាក់ព័ន្ធនឹងការចោទពីបទ «សន្ទិដ្ឋភាពជាមួយរដ្ឋបរទេស ឬឃុបឃិតជាមួយបរទេស» ដើម្បីផ្តួលរំលំរាជរដ្ឋាភិបាលស្របច្បាប់» ជាបទចោទប្រកាន់ដែលសហមេធាវី ចុងចោទបានអះអាងជាថ្មីថា លោក កឹម សុខា មិនបានប្រព្រឹត្តអ្វីដូចមានការចោទប្រកាន់នោះទេ។
លោក ចាន់ ចេន សហមេធាវីលោក កឹម សុខា ប្រាប់ក្រុមអ្នកសារព័ត៌មាន នៅខាងមុខសាលាដំបូងរាជធានីភ្នំពេញ ក្រោយបញ្ចប់សវនាការថា តាមការសង្កេតមើលជារួម សវនាការ លោក កឹម សុខា លើកទី ៤២ នៅថ្ងៃទី ១ ខែមិថុនា មានការតឹងតែង ដោយមានការចោទសួរពីតំណាងអយ្យការ និងការឆ្លើយរបស់លោក កឹម សុខា។ សំណួរទាំងអស់របស់តំណាងអយ្យការពាក់ព័ន្ធនឹងរឿងដាក់បន្ទុក និងចោទប្រកាន់ លោក កឹម សុខា ដែលមានការឃុបឃិតគ្នាជាមួយបរទេស ក៏ប៉ុន្តែសហមេធាវីរបស់លោកមានលោកស្រី ម៉េង សុភារី និងលោក ផែង ហេង បានតាំងសំណួរទៅឱ្យតំណាងអយ្យការ បញ្ជាក់ភ័ស្តុតាងលើការចោទប្រកាន់នេះ។
លោកថា៖ «សំណួរដែលសួរបញ្ជាក់ភ័ស្តុតាងនេះ តើមានរដ្ឋបរទស ឬបរទេសណា ដែលឃុបឃិតគ្នាជាមួយនឹងលោក កឹម សុខា? តើមានកិច្ចព្រមព្រៀងអ្វីដែលបញ្ជាក់ថា កូនក្តីរបស់យើងខ្ញុំឃុបឃិតជាមួយរដ្ឋបរទេស ឬ ភ្នាក់ងារបរទេស? ក៏ប៉ុន្តែ បើពិនិត្យជារួម វាអត់មានជាភ្នាក់ងារបរទេស ឬរដ្ឋបរទេសណាដែលមកឃុបឃិតជាមួយ លោក កឹម សុខា នោះទេ»។
តំណាងអយ្យការបានសួរដេញដោលលោក កឹម សុខា ពាក់ព័ន្ធនឹងសកម្មភាពដែលបានធ្វើកន្លងមក ប៉ុន្តែលោក កឹម សុខា មិនចង់គាស់កកាយនូវអ្វីដែលកើតឡើងនោះទេ ពីព្រោះក្រោយការបោះឆ្នោតឆ្នាំ ២០១៣ មានកិច្ចព្រមព្រៀងជាហូរហែ ដែលបញ្ចប់នូវរាល់បញ្ហាមុនពេលបោះឆ្នោតរួចអស់ទៅហើយ។
ទោះជាយ៉ាងណា អ្វីដែលលោក កឹម សុខា ធ្វើកន្លងមកគឺក្នុងក្របខ័ណ្ឌច្បាប់ទាំងអស់ ទាំងរាល់សកម្មភាពនិងស្ថាប័នរបស់គាត់ គឺស្ថិតក្នុងក្របខ័ណ្ឌច្បាប់ទាំងអស់។ នេះជាការបញ្ជាក់របស់លោក ចាន់ ចេន។
លោកថ្លែងថា៖ «ខ្ញុំនៅតែយល់ឃើញថា សវនាការលើកទី ៤២ នេះ យើងឃើញការដេញដោល អត់ដេញដោលរឿងអង្គហេតុពិតប្រាកដទេ យកតែសំឡេងរបស់កូនក្តីរបស់យើងខ្ញុំ ដែលគេកាត់តធ្វើការចោទសួរជាខ្លីៗ ជាកង់ៗ ក៏ប៉ុន្តែ បើពិនិត្យមើលខ្លឹមសារនៃវីដេអូ ១ ម៉ោងជាងទាំងមូលអត់មានអ្វីដែលឆ្លុះបញ្ចាំងថា កូនក្តីយើងខ្ញុំដូចការចោទប្រកាន់ទេ»។
បើតាមលោក ចាន់ ចេន ក្រុមសហមេធាវីរបស់លោកសំណូមពរចាប់តាំងពីសវនាការដំបូងឱ្យតុលាការបង្ហាញនូវភ័ស្តុតាងជារដ្ឋបរទេស ឬភ្នាក់ងារបរទេស ដែលបានឃុបឃិតគ្នាជាមួយលោក កឹម សុខា បង្កឱ្យមានប្រទូសរ៉ាយ ឬបង្កឱ្យមានការឈ្លានពានប្រទេសកម្ពុជា ក៏ប៉ុន្តែតុលាការមិនបានបង្ហាញទេ។ នេះបង្ហាញថា កូនក្តីរបស់លោកគឺលោក កឹម សុខា ជាបុគ្គលស្អាតស្អំមិនបានប្រព្រឹត្តដូចអ្វីដែលមានការចោទប្រកាន់នោះទេ។
លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញប្រាប់ ភ្នំពេញ ប៉ុស្តិ៍ថា វាជារឿងធម្មតាទេដែលក្នុងសវនាការមានសាកសួរដេញដោលច្រើននោះ ហើយក៏វាមិនចម្លែកដែរ ដែលសភាពតឹងតែងក្នុងសវនាការ តែងតែកើតមាននៅពេលដែលតំណាងអយ្យការ បានធ្វើការសាកសួរ សំណួរដែលបង្ហាញពីធាតុផ្សំនៃបទល្មើស ព្រមទាំងបង្ហាញទាំងភ័ស្តុតាង ដើម្បីបញ្ជាក់ថា ជនជាប់ចោទពិតជាបានប្រព្រឹត្តដូចការចោទប្រកាន់មែននោះ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាថ្លែងថា រឿងក្តីរបស់លោក កឹម សុខា នេះហាក់ដូចជាអូសបន្លាយយូរដែលធ្វើឱ្យមានលើកឡើងទៅជាករណីរឿងនយោបាយវិញ និងធ្វើឱ្យមហាជនយល់ច្រឡំ ឬញែកមិនដាច់រវាងបទល្មើសព្រហ្មទណ្ឌ និងករណីរឿងនយោបាយ។
លោកស្នើឱ្យតុលាការគួរពន្លឿននីតិវិធីសំណុំរឿងរបស់លោក កឹម សុខា ឱ្យ បញ្ចប់ទៅតាមពេលវេលាសមស្របណាមួយចៀសវាងការអូសបន្លាយពេលវេលាយូរក្លាយទៅជាអន្ទាក់នយោបាយផ្សេងទៀត៕
វីដេអូ៖