.jpg)
លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ក្នុងជំនួបឯកអគ្គរដ្ឋទូតសាធារណរដ្ឋប្រជាមានិតបង់ក្លាដែស លោក មហាម៉េដ អាប់ឌុល ហ៊ី កាលពីថ្ងៃទី ៣១ ខែឧសភា។ រូបថត ក្រសួងការងារ
ភ្នំពេញៈ កម្ពុជា-បង់ក្លាដែស ប្តេជ្ញាបន្តពង្រឹងនូវកិច្ចព្រមព្រៀងលើវិស័យការងាររវាងប្រទេសទាំង ២ ដើម្បីគ្រប់គ្រងការជួលពលករទេសន្តរប្រវេសន៍ ការផ្លាស់ប្តូរព័ត៌មានក្នុងការជ្រើសរើសពលករ ក៏ដូចជាការប្រយុទ្ធប្រឆាំងការកេងប្រវ័ញ្ចកម្លាំងពលកម្មជាដើម។
ការប្តេជ្ញានេះធ្វើឡើងក្នុងឱកាស រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង បានអនុញ្ញាតឱ្យឯកអគ្គរដ្ឋទូតសាធារណរដ្ឋប្រជាមានិតបង់ក្លាដែស លោក មហាម៉េដ អាប់ឌុល ហ៊ី និងមន្ត្រីមកពីក្រសួងសុខុមាលភាពជនបរទេស និងការងារនៅបរទេស បង់ក្លាដែសដែលបានដឹកនាំគណៈប្រតិភូមកកាន់កម្ពុជា ចូលជួបសម្តែងការគួរសម និងពិភាក្សាការងារ កាលពីថ្ងៃទី ៣១ ខែឧសភា។
ក្នុងជំនួបនោះលោក អ៊ិត សំហេង ថ្លែងថា សម្រាប់វិស័យការងារ និងបណ្តុះបណ្តាលវិជ្ជាជីវៈ-កម្ពុជា-បង់ក្លាដែស មានអនុស្សរណៈនៃការយោគយល់គ្នា (MOU) តាំងពីឆ្នាំ ២០១៧ មក ដោយក្រុមការងារបច្ចេកទេសបានធ្វើកិច្ចការស្របទៅនឹងកិច្ចព្រមព្រៀងជាមួយគ្នានេះ ប៉ុន្តែដោយសារជំងឺកូវីដ ១៩ ធ្វើឱ្យអាក់ខាន ២ ឆ្នាំ ហើយថ្ងៃនេះ ភាគីទាំង ២ មានឱកាសពិភាក្សា ដើម្បីបន្តកិច្ចសហប្រតិបត្តិការនេះបន្តទៀត។
លោកបន្តថា៖ «វិស័យការងាររបស់ប្រទេសទាំង ២ មានភាពប្រហាក់ប្រហែលគ្នា ដែលជាប្រទេសផលិត និងនាំចេញ ពិសេសវិស័យវាយនភណ្ឌកាត់ដេរ ដូច្នេះភាគីទាំង ២ អាចចែករំលែកបទពិសោធ និងផ្លាស់ប្តូរព័ត៌មានពីគ្នាទៅវិញទៅមក លើវិស័យការងារ និងបណ្តុះបណ្តាលវិជ្ជាជីវៈនេះ»។
ក្នុងនោះដែរលោកក៏បានប្រាប់ទៅឯកអគ្គរដ្ឋទូតបង់ក្លាដែសថា បច្ចុប្បន្ននេះ ពលករបង់ក្លាដែសប្រមាណ ៤០០ នាក់ ដែលទទួលបានបណ្ណការងារពីក្រសួងការងារកម្ពុជា ដោយទទួលបាននូវការថែទាំសុខភាព និងរបបហានិភ័យការងារ ពី ប.ស.ស ដូចកម្មករនិយោជិតរបស់កម្ពុជាដែរ។
លោកលើកឡើងបន្តថា កម្ពុជាមានលក្ខខណ្ឌការងារដែលផ្សារភ្ជាប់ទៅនឹងការនាំចេញ ដែលកិច្ចព្រមព្រៀងនេះបានផ្តល់ឱកាសដល់អ្នកវិនិយោគ ខណៈប្រាក់ឈ្នួលនៅកម្ពុជាមានការដំឡើងខ្ពស់ សម្រាប់ការប្រកួតប្រជែងគឺពិបាក ប៉ុន្តែវាក៏ប្រសើរផងដែរ សម្រាប់ជីវភាពកម្មករនិយោជិតរបស់កម្ពុជា។
លោក អ៊ិត សំហេង បានសរសើរដល់បង់ក្លាដែសក្នុងការបណ្តុះបណ្តាលបច្ចេកទេសវិជ្ជាជីវៈ ជាពិសេសមានការរីកចម្រើនខាងបច្ចេកទេសផ្នែកកសិកម្ម ហេតុដូចនេះ លោកក៏បានស្នើដល់បង់ក្លាដែសជួយបណ្តុះបណ្តាលផ្នែកនេះផងដែរ។
ក្នុងជំនួបនោះដែរ ភាគីបង់ក្លាដែស ក៏បានអញ្ជើញលោករដ្ឋមន្ត្រីក្រសួងការងារ និងក្រុមការងារបច្ចេកទេសទៅទស្សនកិច្ចជាផ្លូវការនៅបង់ក្លាដែស ដើម្បីប្រជុំពិភាក្សាជាមួយក្រុមការងារបច្ចេកទេសបង់ក្លាដែសលើកទី ២ លើការបន្ត MOU។ លោក អ៊ិត សំហេង ប្រាប់ថា នឹងរកពេលវេលាសមរម្យណាមួយ ដើម្បីទៅកាន់បង់ក្លាដែស។
លោក មហាម៉េដ អាប់ឌុល ហ៊ី បានសម្តែងការរីករាយចំពោះកិច្ចសហប្រតិបត្តិការជាមួយកម្ពុជាលើវិស័យការងារ និងបណ្តុះបណ្តាលវិជ្ជាជីវៈខណៈភាគីទាំង ២ នឹងវិលត្រឡប់មកអនុវត្តកិច្ចការងារដែលបានព្រមព្រៀងគ្នាស្របទៅនឹង MOU។
នៅក្នុងដំណើរចុះទស្សនកិច្ចរបស់ឯកអគ្គរដ្ឋទូតលើកនេះក៏បានចុះជួបផ្ទាល់ជាមួយជនជាតិបង់ក្លាដែស ដែលកំពុងបម្រើការងារនៅក្នុងប្រទេសកម្ពុជាលើផ្នែកសេវាកម្ម សំណង់ ភោជនីយដ្ឋាន ធនាគារ ខណៈលោកសង្កេតឃើញថា ពលរដ្ឋបង់ក្លាដែសពិតជាទទួលបានការគាំពារ និងយកចិត្តទុកដាក់បានយ៉ាងល្អពីកម្ពុជា ដែលអាចឱ្យពួកគេមានលទ្ធភាពបើកដំណើរការអាជីវកម្មរបស់ខ្លួនបានប្រសើរ។
សូមជម្រាបថា រាជរដ្ឋាភិបាលកម្ពុជាបានចុះ MOU ស្តីពីកិច្ចសហប្រតិបត្តិការលើវិស័យការងារ និងបណ្តុះបណ្តាលវិជ្ជាជីវៈជាមួយរដ្ឋាភិបាលបង់ក្លាដែសកាលពីថ្ងៃទី ៤ ខែធ្នូ ឆ្នាំ ២០១៧។
MOU នេះមានសុពលភាពរយ:ពេល ៥ ឆ្នាំផ្តោតសំខាន់ទៅលើការងារអាទិភាពរួមមាន ការគ្រប់គ្រងការជួលពលករទេសន្តរប្រវេសក៍ក្នុងប្រទេសទាំង ២ និង កិច្ចសហប្រតិបត្តិការក្នុងវិស័យអប់រំបណ្តុះបណ្តាលបច្ចេកទេស និងវិជ្ជាជីវៈជាដើម៕
