.jpg)
មន្ត្រីនៃមន្ទីរវប្បធម៌ខេត្តកោះកុងពេលបិទផ្សាយសារពីគ្រោះថ្នាក់ដោយសារគ្រឿងញៀនកាលពីថ្ងៃទី១ មិថុនា ។ រូបថត រដ្ឋបាលខេត្ត
កោះកុងៈ ប្រធានមន្ទីរវប្បធម៌និងវិចិត្រសិល្ប:ខេត្តកោះកុងបានឲ្យដឹងថា មន្ត្រីនៃមន្ទីរវប្បធម៌ខេត្តនេះ បាននិងកំពុងចុះបិទផ្សាយសារអប់រំនៅតាមសាលារៀន និងទីសាធារណ:ផ្សេងៗ ស្ដីពីគ្រោះថ្នាក់មកពីការប្រើប្រាស់គ្រឿងញៀន ដើម្បីចូលរួមចំណែកពញ្ញាក់ស្មារតីដល់យុវជន និងចូលរួមកាត់បន្ថយការប្រើប្រាស់គ្រឿងញៀនក្នុងសង្គម ខណៈខេត្តខ្លះទៀតក៏បានផ្សព្វផ្សាយផងដែរ។
លោកស្រី សម្បូរ សុភា ប្រធានមន្ទីរវប្បធម៌និងវិចិត្រសិល្ប:ខេត្តកោះកុងថ្លែងនៅថ្ងៃទី ២ ខែមិថុនាថា ការចុះបិទផ្សាយសារអប់រំនេះ ចាប់ផ្តើមធ្វើនៅថ្ងៃទី ១ ខែមិថុនា ហើយការបិទផ្សាយនោះទៀតសោត មិនមែនចេះតែបិទពាសវាលពាសកាលនោះទេ គឺមានទីតាំងសាធារណៈសំខាន់ៗមួយចំនួនដែលត្រូវបិទផ្សាយដូចជា នៅតាមសាលារៀនជាដើម ដើម្បីឲ្យសិស្សានុសិស្សបានឃើញសារអប់រំទាំងនោះ។
លោកស្រីបន្តថា ខ្លឹមសារនៃសារអប់រំសម្រាប់ការបិទផ្សាយនោះមានដូចជា៖ យុវជនដែលល្អរួមគ្នាកម្ចាត់គ្រឿងញៀន ត្រូវនិយាយថាទេ ចំពោះគ្រឿងញៀន គ្រឿងញៀនបង្កឲ្យមានអំពើហិង្សា និងឧក្រិដ្ឋកម្ម គ្រឿងញៀនបំផ្លាញការសិក្សា និងជីវិតស្រស់ថ្លារបស់យុវវ័យ អនាគតក្នុងដៃរបស់អ្នក កុំយកខ្លួនទៅលនឹងអន្ទាក់គ្រឿងញៀន អ្នកឆ្លាតមិនសេពល្បែង ស្រី ស្រា អ្នកមានប្រាជ្ញាមិនសេពគ្រឿងញៀនជាដើម។
លោកស្រីថ្លែងថា៖«សារផ្សព្វផ្សាយពីគ្រោះថ្នាក់ដោយសារគ្រឿងញៀនហ្នឹងធ្វើឡើងដើម្បីចូលរួមជាមួយសង្គមក្នុងការកាត់បន្ថយការប្រើប្រាស់គ្រឿងញៀន និងបង្ហាញពីផលវិបាកដែលកើតចេញពីគ្រឿងញៀនហ្នឹង»។
លោកឧត្តមសេនីយ៍ត្រី ស៊ុន ឃៀម ស្នងការរងផែនការងារប្រឆាំងគ្រឿងញៀនខេត្តកោះកុង ថ្លែងនៅថ្ងៃទី ២ ខែមិថុនាថា សមត្ថកិច្ចនគរបាលប្រឆាំងគ្រឿងញៀនខេត្តកោះកុងបានបង្ក្រាបករណីគ្រឿងញៀនខុសច្បាប់ជាបន្តបន្ទាប់ប្រៀបដូចភ្លៀងរលឹម។ ប្រតិបត្តិការចុះបង្ក្រាបកន្លងមកធ្វើឡើងដោយទទួលបានព័ត៌មានច្បាស់លាស់តាមរយៈការចូលរួមសហការពីប្រជាពលរដ្ឋ។
លោកបន្តថា ថ្វីបើខេត្តកោះកុងនៅជាប់ព្រំដែនប្រទេសថៃ ប៉ុន្តែកន្លងមកមិនធ្លាប់មានករណីនាំចូលគ្រឿងញៀនឆ្លងដែននោះទេ ប៉ុន្តែប្រមាណជាង២ខែមុន សមត្ថកិច្ចប្រឆាំងគ្រឿងញៀន បានបង្ក្រាបគ្រឿងញៀនទ្រង់ទ្រាយធំ១ករណី នៅស្រុកស្រែអំបិល ដែលមានគ្រឿងញៀនជាង ២០០ គីឡូក្រាម និងបង្ក្រាបបានមុខសញ្ញា៧នាក់ ។
លោកបានលើកឡើងថា ដោយឡែកដើម្បីចូលរួមកាត់បន្ថយការប្រើប្រាស់គ្រឿងញៀន ក្រៅពីការអនុវត្តច្បាប់ មន្ត្រីនគរបាលប្រឆាំងគ្រឿងញៀនក៏បានចុះផ្សព្វផ្សាយឲ្យបានជ្រួតជ្រាបទៅដល់ប្រជាពលរដ្ឋ និងសិស្សានុសិស្ស ជាបន្តបន្ទាប់ផងដែរ។
លោកថ្លែងថា៖ «ការផ្សព្វផ្សាយយើងមានខិត្តប័ណ្ណ មានបដាបិទបង្ហាញពីផលប៉ះពាល់គ្រឿងញៀន ការប្រើប្រាស់គ្រឿងញៀននិងផលប៉ះពាល់ដល់សង្គម គ្រួសារ និងដល់ខ្លួនឯង អ៊ីចឹងទៅ។ យើងមានបដារបិទឲ្យប្រជាពលរដ្ឋក៏ដូចជា យុវវ័យសិស្សសាលាគាត់បានយល់ជ្រួតជ្រាបនៅក្នុងការប្រើប្រាស់ប៉ះពាល់គ្រឿងញៀនហ្នឹង» ។
លោក សី ទូច ប្រធានមន្ទីរវប្បធម៌និងវិចិត្រសិល្បៈខេត្តមណ្ឌលគិរីថ្លែងនៅថ្ងៃទី ២ ខែមិថុនាថា ខេត្តមណ្ឌលគិរី ក៏មានការបិទផ្សាយសារអប់រំពីគ្រោះថ្នាក់ដោយសារគ្រឿងញៀនដែរ ដែលចំណុចសំខាន់គឺដើម្បីរួមចំណែកធ្វើឲ្យយុវជន សិស្សានុសិស្ស និងប្រជាពលរដ្ឋទូទៅអាចយល់ដឹងតាមរយៈការអានសារទាំងនោះ។ ប៉ុន្តែអ្វីដែលសំខាន់បន្ថែមលើនោះ គឺការធ្វើសកម្មភាពផ្សព្វផ្សាយឲ្យបានញឹកញាប់ ដូចជាការចុះជួបផ្ទាល់ជាមួយប្រជាពលរដ្ឋក្នុងសហគមន៍ និងតាមសាលារៀនជាដើម ដោយចាក់បញ្ចាំងវីដេអូអប់រំ និងបង្កើតជាកម្មវិធីសំណួរចម្លើយតាមរយៈវីដេអូនោះគឺជាការបញ្ជ្រាបការយល់ដឹងមួយដែលអាចមានប្រសិទ្ធភាពខ្ពស់។
លោកថ្លែងថា៖ «យើងមានវីដេអូឃ្លីបដែលក្រសួងមហាផ្ទៃផ្សាយចេញ យើងយកសារអប់រំតាមរយៈយូធូបអ៊ីចឹងទៅ បង្ហាញឲ្យគាត់យល់ពីផលអវិជ្ជមាននៃការប្រើប្រាស់ ដោយឲ្យគាត់មើលវីដេអូ ហើយយើងមាន quiz ទៅគាត់ ហើយយើងមានរង្វាន់អីផ្សេងៗអ៊ីចឹងទៅ ដើម្បីឲ្យគាត់មើល ឆ្លើយខុសក៏បានរង្វាន់ ឆ្លើយត្រូវក៏បានរង្វាន់ តែបើគាត់ឆ្លើយខុសយើងទាញគាត់មកត្រូវវិញ» ៕
