.jpg)
លោកលី ធុជ(ក្រវាត់ក) ជួបលោក Paul Clements(បង់កក្រមា)ប្រធានសភាពាណិជ្ជកម្មអន្តរជាតិនៃកម្ពុជា នាថ្ងៃទី២ មិថុនា។ រូបថត CMAA
ភ្នំពេញៈ សភាពាណិជ្ជកម្មអន្តរជាតិនៃកម្ពុជាបញ្ជាក់ថា នឹងកៀរគរធនធានពីវិស័យឯកជននានា និងមូលនិធិក្រៅប្រទេស គាំទ្រដល់ការងារបោសសម្អាតមីន កិច្ចសង្រ្គោះជនពិការ និងការងារយេនឌ័រសកម្មភាពមីននៅកម្ពុជា។ នេះបើតាមលោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន។
បើតាមលោកទេសរដ្ឋមន្ត្រី លី ធុជ ការបង្ហាញបំណងគាំទ្រដល់ការងារបោសសម្អាតមីន របស់សភាពាណិជ្ជកម្មអន្តរជាតិ នៃកម្ពុជានេះ ធ្វើឡើងក្នុងជំនួបពិភាក្សាការងារ រវាងលោក ជាមួយលោក Paul Clements ប្រធានសភាពាណិជ្ជកម្មអន្តរជាតិនៃកម្ពុជា ដើម្បីសិក្សាស្វែងយល់អំពីវឌ្ឍនភាពនៃវិស័យសកម្មភាពមីននៅកម្ពុជា នាថ្ងៃទី ២ ខែមិថុនា នៅទីស្នាក់ការអាជ្ញាធរមីន។
លោក លី ធុជ ថ្លែងថា៖«ក្នុងនាមរាជរដ្ឋាភិបាលកម្ពុជា ខ្ញុំសូមថ្លែងអំណរគុណជូនចំពោះលោក Paul Clements ដែលបានបង្ហាញពីបំណង និងចំណាប់អារម្មណ៍គាំទ្រដល់កិច្ចខិតខំប្រឹងប្រែង របស់រាជរដ្ឋាភិបាលកម្ពុជា ក្នុងការងារសកម្មភាពមីនមនុស្សធម៌ ដើម្បីឱ្យកម្ពុជាសម្រេចបាននូវគោលដៅគ្មានមីនឆ្នាំ ២០២៥»។
លោកថ្លែងថា រយៈពេល ៣០ ឆ្នាំ នៃការងារសកម្មភាពមីននៅកម្ពុជា ក្រោមការយកចិត្តទុកដាក់របស់រាជរដ្ឋាភិបាល និងមានការចូលរួមពីប្រទេសជាមិត្ត ដៃគូអភិវឌ្ឍន៍ ប្រតិបត្តិករជាតិ-អន្តរជាតិ និងគ្រប់ភាគីពាក់ព័ន្ធដទៃទៀត កម្ពុជាសម្រេចបាននូវសមិទ្ធផលយ៉ាងធំធេង ក្នុងការងារបោសសម្អាតមីន និងគ្រាប់យុទ្ធភណ្ឌមិនទាន់ផ្ទុះ ព្រមទាំងរៀបចំឱ្យមានរចនាសម្ព័ន្ធគ្រប់គ្រងវិស័យសកម្មភាពមីនច្បាស់លាស់ចាប់ពីថ្នាក់ជាតិរហូតដល់ថ្នាក់ក្រោមជាតិ។
លោក លី ធុជ បញ្ជាក់ថា សមិទ្ធផលយ៉ាងធំធេង ក្នុងការងារបោសសម្អាតមីន និងគ្រាប់យុទ្ធភណ្ឌមិនទាន់ផ្ទុះនេះកើតឡើងក្រោមការដឹកនាំរបស់អាជ្ញាធរមីន ដែលជាសេនាធិការឱ្យរាជរដ្ឋាភិបាល និងជាស្ថាប័នសាធារណៈរបស់រដ្ឋក្នុងការគ្រប់គ្រង ត្រួតពិនិត្យ ដឹកនាំ និងសម្របសម្រួលវិស័យសកម្មភាពមីនទូទាំងប្រទេស។
លោកឱ្យដឹងថា បច្ចុប្បន្ន ក្រៅពីការគាំទ្រពីប្រទេសម្ចាស់ជំនួយ និងដៃគូអភិវឌ្ឍន៍ វិស័យសកម្មភាពមីន ចាប់ផ្តើមមានការយកចិត្តទុកដាក់ និងជួយគាំទ្រពីវិស័យឯកជន និងសប្បុរសជននានា ដែលកំពុងរកស៊ីទទួលទាន និងបំពេញការងារក្នុងប្រទេសកម្ពុជា ក្នុងការចូលរួមដល់ការអនុវត្តយន្តការភូមិអស់មីនរបស់អាជ្ញាធរមីនតាមធនធានរបស់ខ្លួន។
លោក Paul Clements បានកោតសរសើរ និងវាយតម្លៃខ្ពស់ចំពោះសមិទ្ធផលសម្រេចបានយ៉ាងធំធេង ក្នុងការងារបោសសម្អាតមីន និងគ្រាប់យុទ្ធភណ្ឌមិនទាន់ផ្ទុះនៅកម្ពុជា ដើម្បីជួយសង្រ្គោះអាយុជីវិត និងលើកកម្ពស់ជីវភាពរស់នៅ របស់ប្រជាពលរដ្ឋនៅទីជនបទ។
លោកបានថ្លែងថា៖ «សភាពាណិជ្ជកម្មអន្តរជាតិនៃកម្ពុជា មានបំណងកៀរគរធនធាន ពីវិស័យឯកជននានា និងមូលនិធិក្រៅប្រទេស គាំទ្រដល់ការងារបោសសម្អាតមីន កិច្ចសង្រ្គោះជនពិការ និងការងារយេនឌ័រសកម្មភាពមីននៅកម្ពុជា ជាពិសេសចូលរួមផ្តល់ឱកាសការងារជាអាទិភាព និងលើកកម្ពស់ដល់ជនមានពិការភាព និងក្រុមគ្រួសារដែលបានរងគ្រោះដោយសារគ្រាប់មីន និងសំណល់ជាតិផ្ទុះពីសង្រ្គាម»។
លោកបញ្ជាក់ថា លោកនឹងជំរុញ និងពិភាក្សាការងារបន្ថែមជាមួយសមាជិកសភាពាណិជ្ជកម្មអន្តរជាតិនៃកម្ពុជា សភាពាណិជ្ជកម្មដទៃទៀត វិស័យឯកជនទាំងក្នុងនិងក្រៅប្រទេស និងមូលនិធិនៅក្រៅប្រទេស ដើម្បីឱ្យចូលរួមជាមួយរាជរដ្ឋាភិបាលកម្ពុជា តាមរយៈអាជ្ញាធរមីន ក្នុងការងារបោសសម្អាតមីន និងសង្រ្គោះជនពិការដោយសារមីននៅកម្ពុជា ផងដែរ។
លោក Paul Clements លើឡើងថា លោកបានមករស់នៅប្រទេសកម្ពុជា តាំងពីឆ្នាំ ២០០៨ ហើយរយៈពេល ១៤ ឆ្នាំនេះ លោកពេញចិត្ត និងកោតសរសើរ ចំពោះការដឹកនាំរបស់រាជរដ្ឋាភិបាលកម្ពុជា ក្នុងការធានាឱ្យបាន នូវសុខសន្តិភាព និងស្ថិរភាពនយោបាយ ដោយបានផ្តល់នូវឱកាស និងអំណោយផលយ៉ាងច្រើនដល់អ្នកវិនិយោគទុន ជាពិសេសការគោរពស្រឡាញ់វប្បធម៌ ប្រពៃណី និងភាពរួសរាយរាក់ទាក់របស់ប្រជាជនកម្ពុជា៕
