សៀមរាបៈ អាជ្ញាធរជាតិអប្សរា អនុញ្ញាឱ្យប្រជាពលរដ្ឋរស់នៅក្នុងតំបន់រមណីយដ្ឋានអង្គរ ជួសជុលផ្ទះ និងសាងសង់សំណង់ស្រាលៗចំនួន ២៩ សំណើ ក្នុងចំណោមជាង ១០០ សំណើ ក្នុងខែឧសភា ប៉ុន្តែបានក្រើនរំលឹក ដល់ប្រជាពលរដ្ឋ ឱ្យបញ្ឈប់សកម្មភាពប្រកាសលក់ដី-ផ្ទះ នៅក្នុងតំបន់អង្គរ។
លោក ឡុង កុសល អ្នកនាំពាក្យអាជ្ញាធរជាតិអប្សរា មានប្រសាសន៍ថា លទ្ធផលការងារសហគមន៍របស់អាជ្ញាធរជាតិអប្សរា ប្រចាំខែឧសភា ឆ្នាំ ២០២២ បានចុះផ្សព្វផ្សាយអប់រំ និងពិនិត្យការស្នើសុំ ជួសជុលផ្ទះ រួមទាំងសាងសង់សំណង់តូចតាចទាំង ៥ ស្រុក-ក្រុង ក្នុងតំបន់រមណីយដ្ឋានអង្គរ បានចំនួន ១២៧ សំណើ ដែលក្នុងនោះ បានអនុញ្ញាតជូនប្រជាពលរដ្ឋចំនួន ២៩ សំណើ។
ការអនុញ្ញាតទាំងនោះ រួមមាននៅស្រុកប្រាសាទបាគងចំនួន៦សំណើ ស្រុកអង្គរធំ ៥សំណើ ស្រុកពួក ៥ សំណើ ក្រុងសៀមរាប ៨ សំណើ និងស្រុកបន្ទាយស្រី ៥ សំណើ។
ចំពោះសំណើផ្សេងទៀត ដែលក្រុមការងារសហគមន៍មិនអនុញ្ញាតឱ្យជួសជុលនោះ ដោយសារមិនទាន់គោរពទៅតាមលក្ខខណ្ឌត្រឹមត្រូវដែលបានកំណត់។
លោកថា៖ «បងប្អួនប្រជាពលរដ្ឋដែលរស់នៅក្នុងតំបន់រមណីយដ្ឋានអង្គរ មានការលាយឡំគ្នា ដោយមានអ្នកស្រុកចាស់ អ្នកភូមិចាស់ ហើយអ្នកដែលមកតាំងទីលំនៅ ឬក៏ទិញគេហដ្ឋានថ្មីៗ ដោយអ្នកទាំងនោះពុំអាចចាត់ទុកថា ជាអ្នកភូមិចាស់ ឬអ្នកស្រុកចាស់រស់នៅទីនោះទេ។ ចឹងអ្នកដែលបំពេញបានទៅតាមលក្ខណខណ្ខដែលបានកំណត់ គឺអនុញ្ញាត ប៉ុន្តែអ្នកដែលមិនគ្រប់តាមលក្ខខណ្ឌ គឺមិនអនុញ្ញាតនោះទេ»។
លោកគូសបញ្ជាក់ សំណើរបស់ប្រជាពលរដ្ឋត្រូវបែងចែកជា ២ សំណើជួសជុលខ្នាតតូច និងខ្នាតធំ ខណៈជួសជុលខ្នាតតូចមានលក្ខណៈតម្រូវការនៃការរស់នៅប្រចាំថ្ងៃ ដូចជាជួសជុលទ្រុងមាន់ ក្រោលគោ បង្គន់អនាម័យ ផ្ទះបាយ ដូរបង្អួច ដើម្បីធ្វើឱ្យការរស់នៅរបស់គាត់មានភាពល្អប្រសើរ។ ចំណែកការជួសជុលខ្នាតធំ សំដៅទៅលើការរុះរើផ្ទះចាស់ធ្វើផ្ទះថ្មី។
ក្នុងនោះដែរលោកថា ក្រុមការងារសហគមន៍បានជួបនូវបញ្ហាប្រឈមមួយចំនួនដូចជា ការជួសជុល ឬសាងសង់មុនការចុះពិនិត្យរបស់ក្រុមការងារ ការប្រកាសលក់ដីក្នុងតំបន់ការពារតាមរយៈបណ្ដាញទំនាក់ទំនងសង្គមហ្វេកប៊ុក និងដាក់ស្លាក (លក់ដី) ផ្ទាល់ក្នុងតំបន់ការពារ នៅតែបន្តកើតមានទោះបីអាជ្ញាធរធ្លាប់ផ្សព្វផ្សាយ អប់រំណែនាំក៏ដោយ។
លោក ឡុង កុសល បានក្រើនរំលឹកប្រជាពលរដ្ឋ សូមបញ្ឈប់សកម្មភាពប្រកាសលក់ដីឬផ្ទះរបស់ខ្លួនដែលមាន ទីតាំងនៅក្នុងតំបន់អង្គរ ដែលធ្វើឱ្យប៉ះពាល់ដល់សណ្តាប់ធ្នាប់សាធារណៈ ខណៈការទិញលក់ដីក្នុងតំបន់អង្គរទៅឱ្យអ្នកចំណូលពីខាងក្រៅគឺជាអំពើខុសច្បាប់។
លោកបន្តថា ជាទូទៅយើងបានសហការជាមួយអាជ្ញាធរមូលដ្ឋាន ជាមួយសមត្ថកិច្ចធ្វើការផ្នែកច្បាប់ ធ្វើការរុះរើ និងដកហូតចេញវិញនូវសំណង់ខុសច្បាប់ទាំងនោះ ហើយចំពោះអ្នកប្រកាសលក់ដី នៅក្នុងតំបន់អង្គរ យើងតែងព្រមាន និងតែងតែផ្តល់ព័ត៌មានជាសាធារណៈថា ការទិញ លក់ដីនៅក្នុងតំបន់អង្គរ គឺជាសកម្មភាពខុសច្បាប់ ។
លោកថា៖« បើសិនជាគាត់ជាអ្នកភូមិចាស់ គាត់អាចត្រឹមលក់បន្តជូនទៅអ្នកភូមិផងរបងជាមួយគ្នា ឬផ្ទេរមរតកពីឪពុកទៅកូន ប៉ុន្តែមិនអាចមានសិទ្ធិលក់ទៅឱ្យអ្នកចំណូលក្រៅទេ ឧទាហរណ៍អ្នកពីខេត្តផ្សេង មកទិញដីឬទិញផ្ទះ នៅក្នុងតំបន់អង្គរក៏មិនបានដែរ ហើយពលរដ្ឋដែលរស់នៅក្នុងតំបន់អង្គរ ក៏មិនមានបណ្ណកម្មសិទ្ធិដីធ្លីដែរ»។
អាជ្ញាធរជាតិអប្សរា ឱ្យដឹងថា រាល់ការស្នើសុំច្បាប់ជួសជុល គឺពុំមានការបង់ប្រាក់នោះទេ។
លោក ឡុង កុសល ឱ្យដឹងថា គោលដៅបន្តរបស់ក្រុមការងារសហគមន៍នៃអាជ្ញាធរជាតិអប្សរានឹងបន្តផ្សព្វផ្សាយ អប់រំប្រជាពលរដ្ឋឱ្យយល់កាន់តែច្បាស់ពីតួនាទីភារកិច្ចរបស់អាជ្ញាធរជាតិអប្សរា ការប្រើប្រាស់ដីធ្លីក្នុងតំបន់ការពារនៃរមណីយដ្ឋានអង្គរ នីតិវិធីនៃការដាក់ពាក្យស្នើសុំជួសជុល និងសាងសង់ផ្ទះក្នុងឧទ្យានអង្គរឱ្យកាន់តែមានប្រសិទ្ធិភាពទាន់ពេលវេលា។
លោកថា៖«អាជ្ញាធរជាតិអប្សរា តែងយកចិត្តទុកដាក់និងពិនិត្យ ព្រមទាំងពង្រឹងការងាររបស់ខ្លួនបន្ថែម តាំងពីដំណាក់កាលទទួលសំណើរហូតដល់ដំណាក់កាលឆ្លើយតបទៅកាន់ពលរដ្ឋវិញ ពោលគឺធ្វើយ៉ាងណាឱ្យសេវាកម្មរបស់អាជ្ញាធរជាតិអប្សរាខិតកាន់តែជិតប្រជាពលរដ្ឋ»៕