.jpg)
មន្ត្រីសាធារណការជួបជាមួយមន្ត្រីអាមេរិកពីថ្ងៃទី ១ មិថុនា។ រូប ក្រសួងសាធារការ
ភ្នំពេញៈ កម្ពុជា-អាមេរិក កំពុងស្វែងរកឱកាសលើកិច្ចសហប្រតិបត្តិការរវាងក្រសួងសាធាណការ និងដឹកជញ្ជូននៃប្រទេសទាំង ២ ក្នុងការតភ្ជាប់ពហុមធ្យោបាយ ដើម្បីបង្កលក្ខណៈងាយស្រួលដល់ក្រុមហ៊ុនអាមេរិកក្នុងការផ្តល់ជំនួយបច្ចេកទេសដល់កម្ពុជាលើវិស័យនេះ។
រដ្ឋលេខាធិការក្រសួងសាធារណការ និងដឹកជញ្ជូន លោកស្រី កុយ សុដានី ទទួលជួបពិភាក្សាការងារជាមួយលោក Moses An មន្ត្រីទទួលបន្ទុកផ្នែកសេដ្ឋកិច្ច និងពាណិជ្ជកម្មស្ថានទូតសហរដ្ឋ-អាមេរិកប្រចាំកម្ពុជាកាលពីថ្ងៃទី ១ ខែមិថុនា ឆ្នាំ ២០២២។
លោកស្រីថ្លែងថា ជំនួបនេះមានគោលបំណង ដើម្បីពិភាក្សាស្វែងយល់អំពីកាលានុវត្តភាពពាណិជ្ជកម្មសម្រាប់ក្រុមហ៊ុនអាមេរិកក្នុងគម្រោងអភិវឌ្ឍន៍នានារបស់ក្រសួងសាធារណការ និងដឹកជញ្ជូននាពេលបច្ចុប្បន្ន និងនាពេលអនាគត ក៏ដូចជាដើម្បីស្វែងរកឱកាសសម្រាប់ការផ្តល់ជំនួយបច្ចេកទេសដែលអាចធ្វើទៅបានតាមរយៈកម្មវិធីតភ្ជាប់មេគង្គបូព៌ាបស្ចិម (តាមរយៈក្រសួងដឹកជញ្ជូនសហរដ្ឋអាមេរិក)។
លោកស្រីបញ្ជាក់ថា៖ «យើងទើបចាប់ផ្តើមធ្វើការងារនេះ យើងផ្តោតទៅលើកិច្ចសហប្រតិបត្តិការរវាងប្រទេសទាំង ២ លើវិស័យសាធារណការ និងដឹកជញ្ជូន។ យើងនឹងជួបជាមួយក្រសួងសាធារណការអាមេរិកតែម្តង នៅពេលឆាប់ៗខាងមុខនេះ ដើម្បីពិនិត្យមើលអាទិភាពមួយណាសំខាន់ជាងគេ ក្នុងចំណោមអាទិភាព ៦ ចំណុច ដែលបានលើកឡើងក្នុងជំនួបនោះ»។
លោកស្រីក៏បានជម្រាបជូនអំពីគម្រោងសម្រេចបានគម្រោងកំពុងអនុវត្តបន្ត និងគម្រោងនាពេលអនាគត ដែលរួមមាន គម្រោងអភិវឌ្ឍន៍ការដឹកជញ្ជូនតាមផ្លូវទឹក ការដឹកជញ្ជូនផ្លូវគោក ការដឹកជញ្ជូនតាមផ្លូវដែក។ គម្រោងសាងសង់ផ្លូវល្បឿនលឿន ភ្នំពេញ-ក្រុងព្រះសីហនុ ដែលគ្រោងនឹងបញ្ចប់ការសាងសង់ក្នុងពេលឆាប់ៗនេះ។ គម្រោងអភិវឌ្ឍន៍ការដឹកជញ្ជូនតាមផ្លូវទឹកតាមទន្លេបាសាក់ និងការអភិវឌ្ឍកំពង់ផែ ដើម្បីចូលរួមកាត់បន្ថយការចំណាយផ្នែកភ័ស្តុភារកម្មជាដើម។
លោកស្រីលើកឡើងផងដែរ ទាក់ទងទៅនឹងគម្រោងអភិវឌ្ឍន៍ប្រព័ន្ធចម្រោះទឹកកខ្វក់ សុវត្ថិភាពចរាចរណ៍ផ្លូវគោកដែលជាបញ្ហាគួរឱ្យព្រួយបារម្ភរបស់កម្ពុជា និងផែនការមេភ័ស្តុភារកម្មកម្ពុជា ដែលមានគម្រោងអភិវឌ្ឍន៍ចំនួន ៣៣០ គម្រោង។
លោកស្រីបន្តថា បន្ថែមពីនេះក្រសួងក៏បានបង្កើតវិទ្យាស្ថានតេជោសែន សាធារណការ និងដឹកជញ្ជូន សម្រាប់ការបណ្ដុះបណ្ដាលវិស្វករជំនាន់ក្រោយក្នុងការកសាងហេដ្ឋារចនាសម្ព័ន្ធប្រកបដោយគុណភាព ការធ្វើទំនើបកម្មយានយន្តដឹកជញ្ជូនទំនិញ ការប្រែប្រួលអាកាសធាតុ និងបញ្ហាឆ្លងកាត់ព្រំដែនជាដើម។
នាឱកាសនោះដែរ លោក Moses An បានសម្តែងចំណាប់អារម្មណ៍លើការអភិវឌ្ឍវិស័យមួយចំនួន ដើម្បីចូលរួមចំណែកអភិវឌ្ឍកម្ពុជាឱ្យកាន់តែមានការរីកចម្រើន។ ក្នុងនោះលោកចាប់អារម្មណ៍ទៅលើការងារ រួមមាន ការធ្វើផែនការផ្អែកលើការអនុវត្ត អភិបាលកិច្ច បញ្ហាឆ្លងកាត់ព្រំដែន សុវត្ថិភាពផ្លូវថ្នល់ យេនឌ័រ បរិយាប័ន្នសង្គម សមធម៌ ភាពធន់នឹងការប្រែប្រួលអាកាសធាតុ និងការតភ្ជាប់ពហុមធ្យោបាយ។
ទន្ទឹមនោះ លោក Moses An បានស្នើឱ្យមានមន្ត្រីទទួលបន្ទុកការងារទំនាក់ទំនងរវាងភាគីទាំង ២ ដើម្បីសម្របសម្រួលលើការងារផ្សេងៗ។ ជាពិសេសសម្របសម្រួលកិច្ចប្រជុំតាមប្រព័ន្ធវីដេអូពីចម្ងាយ រវាងក្រសួងដឹកជញ្ជូនរបស់សហរដ្ឋអាមេរិក និងក្រសួងសាធារណការ និងដឹកជញ្ជូនរបស់កម្ពុជានាពេលខាងមុខ ដើម្បីពិភាក្សាលម្អិតលើគម្រោងសហការមួយចំនួន។
ជាការឆ្លើយតប លោកស្រី កុយ សុដានី បានបញ្ជាក់ថា ក្រសួងសាធារណការ និងដឹកជញ្ជូនខាងភាគីកម្ពុជាបានត្រៀមខ្លួនសហការជានិច្ចជាមួយក្រសួងដឹកជញ្ជូនរបស់សហរដ្ឋអាមេរិក ដើម្បីជជែកពិភាក្សាលម្អិតបន្តទៀតលើបញ្ហានេះ។
ប្រធានសមាគមពាណិជ្ជករដឹកជញ្ជូន និងខ្សែចង្វាក់ផ្គត់ផ្គង់នៅកម្ពុជា លោក ជា ចាន់ដារ៉ា បានថ្លែងថា កិច្ចសហប្រតិបត្តិការរវាងក្រសួងសាធារណការនៃប្រទេសទាំង ២ មានសារៈសំខាន់ណាស់ ដែលនឹងនាំមកផលប្រយោជន៍ឱ្យគ្នាទៅវិញទៅមកសម្រាប់វិស័យសេដ្ឋកិច្ច បើក្នុងករណីភាគីទាំង ២ ឈានដល់មានកិច្ចសហការគ្នាពិតមែន។
លោកបានបញ្ជាក់ថា៖ «ព្រោះរាល់ទំនិញដែលផលិតបាននៅកម្ពុជា ជាពិសេសវិស័យកាត់ដេរសម្លៀកបំពាក់ គឺភាគច្រើននាំចេញទៅសហរដ្ឋអាមេរិក ហើយការធ្វើវិនិយោគ សម្រាប់ការនាំចេញទៅអាមេរិក ១ ឆ្នាំ ទៅ ១ ឆ្នាំ មានការកើនឡើងខ្ពស់ ហើយសម្រាប់អាមេរិក នាំចូលមកកម្ពុជាក៏មានច្រើនផងដែរ»៕
