.jpg)
គណបក្សប្រជាជននៅភ្នំពេញពេលឃោសនាបោះឆ្នោត និងគណបក្សភ្លើងទៀនពេលឃោសនាបោះឆ្នោតនៅក្រុងតាខ្មៅ។ រូបថត សហការី
ភ្នំពេញៈ នៅថ្ងៃបិទបញ្ចប់នៃយុទ្ធនាការឃោសនាបោះឆ្នោតនៅថ្ងៃទី ៣ ខែមិថុនា គណបក្ស ប្រជាជនកម្ពុជា និងគណបក្សភ្លើងទៀនក្នុងចំណោម គណបក្សនយោបាយទាំង ១៧ ដែលបានចុះឈ្មោះចូលរួមប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី ៥ នឹងហែក្បួនធំនៅក្នុងរាជធានីភ្នំពេញដោយមានអ្នកចូលរួមរាប់ម៉ឺននាក់ ខណៈគណបក្សផ្សេងទៀតនឹងជួបជុំក្នុងលក្ខណៈទ្រង់ទ្រាយតូចៗនៅតាមបណ្តារាជធានី ខេត្ត។
លោក សុខ ឥសាន អ្នកនាំពាក្យគណបក្សប្រជាជនកម្ពុជាប្រាប់ ភ្នំពេញ ប៉ុស្តិ៍ នៅថ្ងៃទី ២ ខែមិថុនា ថា ការរៀបចំជួបជុំលក្ខណៈទ្រង់ទ្រាយធំនៅថ្ងៃបិទបញ្ចប់នៃយុទ្ធនាការឃោសនាបោះឆ្នោតនៅថ្ងៃទី ៣ មិថុនា អាស្រ័យទៅលើគណៈកម្មការ គណបក្សនៅក្នុងរាជធានី-ខេត្ត និងមូលដ្ឋានឃុំ សង្កាត់នីមួយៗ។
លោក ឃួង ស្រេង ប្រធានគណបក្សប្រជាជនកម្ពុជា រាជធានីភ្នំពេញប្រាប់ភ្នំពេញ-ប៉ុស្តិ៍ថា នៅថ្ងៃបិទបញ្ចប់នេះ គណបក្សបានរៀបចំជួបជុំយុវជនអ្នកគាំទ្រ និងសកម្មជនមកពីទូទាំងខណ្ឌទាំងអស់នៃរាជធានី-ភ្នំពេញ នៅតំបន់ផ្លូវ ៦០ ម៉ែត្រ ប្រមាណជាង ៦ ម៉ឺននាក់ ដោយមានការហែក្បួនឆ្លងកាត់ខណ្ឌចំនួន ៥។ ចំណែក ខណ្ឌ ៩ ទៀត ក៏នឹងរៀបចំទៅតាមខណ្ឌរបស់គេ។ ជាមួយគ្នានេះក្នុងនោះ ១ ខណ្ឌៗ មានកម្លាំងរបស់គណបក្ស ចំនួន ៣ ៥០០ នាក់។
លោកថ្លែងថា៖ «ខ្ញុំជឿជាក់ថា ឆ្លងកាត់តាមកិច្ចការងារដែលបម្រើប្រជាពលរដ្ឋរបស់យើងខ្ញុំ ខ្ញុំសង្ឃឹមថានឹងទទួលបានជោគជ័យ ១០៥ លើ ១០៥ សង្កាត់ នៅរាជធានីភ្នំពេញ ប៉ុន្តែអាចបាត់អាសនៈតិចតួច ដោយកន្លែង»។
លោក ស៊ុន ឆ័យ អនុប្រធានគណបក្សភ្លើងទៀនប្រាប់ ភ្នំពេញ ប៉ុស្តិ៍ នៅថ្ងៃទី២ ខែឧសភាថា គណបក្សភ្លើងទៀន រាជធានី-ភ្នំពេញ នឹងមានការជួបជុំដង្ហែក្បួនឃោសនាបោះឆ្នោតនៅថ្ងៃបិទបញ្ចប់ ដោយមានអ្នកចូលរួមពីថ្នាក់ដឹកនាំ និងរចនាសម្ព័ន្ធគ្រប់លំដាប់ថ្នាក់របស់គណបក្សភ្លើងទៀននៅទូទាំងរាជធានីភ្នំពេញប្រមាណជាង ៣ ម៉ឺននាក់។
គណបក្សភ្លើងទៀននឹងជួបជុំគ្នានៅផ្លូវជាតិលេខ ១ ក្បែរមន្ទីរពេទ្យជោរៃ ខណ្ឌច្បារអំពៅ នៅម៉ោង ៧ ព្រឹក និងហែក្បួនចេញពីទីនោះឆ្ពោះទៅត្រើយម្ខាងក្បែរសណ្ឋាគារសុខា សម្រាកថ្ងៃត្រង់ និងពេលរសៀលចាប់ផ្តើមពីទីតាំងនោះ ឆ្ពោះទៅរង្វង់មូលចោមចៅ និងរំសាយនៅទីនោះ។
លោកថ្លែងថា៖ «ការចូលរួមហែក្បួននៅថ្ងៃបញ្ចប់នេះអាចនឹងច្រើនជាងមុន ព្រោះកាលពីថ្ងៃទី ១ មានអ្នកចូលរួមជិត ២ ម៉ឺននាក់ ហើយយើងសង្ឃឹមថា យ៉ាងតិចណាស់ក៏លើសពី ៣ ម៉ឺនាក់ដែរ ព្រោះមានអ្នកស្នើសុំមួក និងអាវច្រើន»។
បើតាមលោក សុន ឆ័យ ការហែក្បួនឃោសនាបោះឆ្នោតក្នុងរយៈពេល ១៤ ថ្ងៃនេះ មិនមានអំពើហិង្សាណាមួយកើតឡើងនោះទេ ដែលអាចទទួលយកបាន ព្រោះមានការចូលរួមពីភាគីពាក់ព័ន្ធ ជាពិសេសថ្នាក់ដឹកនាំគណបក្សកាន់អំណាចក៏បានអំពាវនាវឱ្យមានការយោគយល់ និងអធ្យាស្រ័យខ្ពស់ក្នុងយុទ្ធនាការឃោសនានេះ។
លោក ឯម សុខសុវណ្ណ ប្រធាននាយកដ្ឋានកិច្ចការនយោបាយនៃគណបក្សយុវជនកម្ពុជាថ្លែងថា គណបក្សយុវជនកម្ពុជា មិនមានការជួបជុំលក្ខណៈទ្រង់ទ្រាយធំនៅក្រុងភ្នំពេញទេ ប៉ុន្តែគណបក្សនឹងជួបជុំ ហើយបិទបញ្ចប់នៅឯខេត្តស្វាយរៀង។ ក្នុងការជួបជុំបិទបញ្ចប់នៅខេត្តស្វាយរៀងនឹងមានអ្នកចូលរួមប្រមាណ ១០០ នាក់ ដោយក្នុងនោះលោក ពេជ្យ ស្រស់ប្រធានគណបក្សក៏នឹងចូលរួមដឹកនាំ ហែក្បួនរថយន្តប្រមាណ ២០ គ្រឿង ម៉ូតូ ៣០ គ្រឿង និងម៉ូតូកង់ ៣ ដោយបំពាក់ទៅដោយឧគ្ឃោសនស័ព្ទ និងបដាគណបក្សជាដើម។
លោក ញឿន រ៉ាដែន អ្នកនាំពាក្យគណបក្សហ៊្វុនស៊ិនប៉ិច ក៏បានថ្លែងឱ្យដឹងដែរថា នៅថ្ងៃបិទបញ្ចប់នៃយុទ្ធនាការឃោសនាបោះឆ្នោត គណបក្សហ៊្វុនស៊ិនប៉ិចមិនមានការរៀបចំជួបជុំនៅទីក្រុងភ្នំពេញទេ ប៉ុន្តែនឹងរៀបចំនៅតាមខេត្តមួយចំនួនដែលមានបេក្ខជនឃុំ សង្កាត់ឈរឈ្មោះ ពីព្រោះនៅតាមរាជធានីខេត្តមួយចំនួនបានហែក្បួនរួចហើយ។
លោក ហង្ស ពុទ្ធា អ្នកនាំពាក្យ គជប ប្រាប់ភ្នំពេញប៉ុស្តិ៍ថា ជារួមការឃោសនារបស់គណបក្សនយោបាយទាំង ១៧ ប្រព្រឹត្តទៅដោយរលូន គ្មានអំពើហិង្សា មានសន្តិសុខ សុវត្ថិភាព។
លោកថ្លែងថា៖ «យើងឃើញល្អច្រើន ត្រង់ដែលថាល្អ គឺគូភាគីប្រឈមបានប្រើប្រាស់យន្តការដាក់ពាក្យបណ្តឹងប្រសើរជាងប្រឈមដោយវោហារស័ព្ទ និងអាកប្បកិរិយាផ្សេងៗដែលធ្វើឱ្យប៉ះពាល់ដល់ដំណើរការឃោសនា គឺអត់មានទេ»។
ការឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់មានរយៈពេល ១៤ ថ្ងៃ គឺចាប់ពីថ្ងៃទី ២១ ខែឧសភា ដល់ថ្ងៃទី ៣ ខែមិថុនា ខណៈថ្ងៃទី ៥ មិថុនា គឺជាថ្ងៃបោះឆ្នោត។
ក្រសួងព័ត៌មានពីថ្ងៃទី ១ មិថុនា បានណែនាំដល់ម្ចាស់ស្ថានីយវិទ្យុ ទូរទស្សន៍ និងម្ចាស់ប្រព័ន្ធផ្សព្វផ្សាយទាំងអស់ឱ្យបញ្ឈប់គ្រប់សកម្មភាពឃោសនាផ្សព្វផ្សាយព័ត៌មានពាក់ព័ន្ធការបោះឆ្នោតជ្រើសរើសក្រុមប្រឹក្សា ឃុំ សង្កាត់ នៅថ្ងៃទី ៤ ខែមិថុនា មុនបោះឆ្នោត ១ ថ្ងៃ ដើម្បីរក្សាភាពស្ងៀមស្ងាត់ឱ្យពលរដ្ឋដែលជាម្ចាស់សំឡេងឆ្នោត ធ្វើការសម្រេចចិត្តជ្រើសរើស តំណាងស្របច្បាប់ទៅតាមឆន្ទៈរបស់ខ្លួនតាមបទប្បញ្ញត្តិច្បាប់ បទបញ្ជា និងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់។
ជាមួយគ្នានេះលោក ស ខេង គណៈបញ្ជាការសន្តិសុខអចិន្រៃ្តយ៍ និងលោក ប្រាជ្ញ ចន្ទ ប្រធាន គជប នៅថ្ងៃទី ២ ខែមិថុនា បានណែនាំឱ្យមានការពង្រឹងសន្តិសុខ សុវត្ថិភាព សម្រាប់ព្រឹត្តិការណ៍បោះឆ្នោតជ្រើសរើសក្រុមប្រឹក្សា ឃុំ សង្កាត់ នេះដោយក្នុងនោះ គណបក្សនយោបាយ ឬ/និងបេក្ខជន មិនត្រូវធ្វើសកម្មភាព កៀរគរ ប្រមូលកម្លាំងពីរាជធានី ខេត្តណាមួយទៅធ្វើសកម្មភាពនៅរាជធានី ឬខេត្តផ្សេងក្នុងចេតនាបង្កចលាចល អសន្តិសុខសង្គម ដើម្បីបំផ្លាញយុទ្ធនាការឃោសនាបោះឆ្នោត និងការបោះឆ្នោតនោះឡើយ។
សេចក្តីណែនាំនេះបន្តថា គណបក្សនយោបាយ ឬ/និងបេក្ខជន និងប្រជាពលរដ្ឋត្រូវចូលរួមក្នុងកិច្ចការពារ ថែរក្សាបរិយាកាសសន្តិសុខសម្រាប់យុទ្ធនាការឃោសនាបោះឆ្នោត និងការបោះឆ្នោតឱ្យបានល្អប្រសើរ ដោយមិនត្រូវធ្វើសកម្មភាពណាមួយ ដែលផ្ទុយពីគោលការណ៍នៃច្បាប់បោះឆ្នោត បទប្បញ្ញត្តិ និងនីតិវិធីនៃការបោះឆ្នោត ក្រមសីលធម៌សម្រាប់គណបក្សនយោបាយ និងបេក្ខជនក្នុងដំណើរការបោះឆ្នោត និងលិខិតបទដ្ឋានគតិយុត្តពាក់ព័ន្ធផ្សេងៗជាធរមាន៕
វីដេអូ៖
