.jpg)
ភ្នំពេញៈ ក្រសួងមហាផ្ទៃកម្ពុជាអះអាងថា អាល្លឺម៉ង់ប្តេជ្ញានឹងពង្រីកកិច្ចសហប្រតិបត្តិការជាមួយកម្ពុជារបន្ថែមទៀត ដើម្បីជំរុញការងារកំណែទម្រង់វិមជ្ឈការ និងវិសហមជ្ឈការនៅកម្ពុជាឱ្យមានវឌ្ឍនភាពតទៅមុខ។
ការប្តេជ្ញាចិត្តនេះធ្វើឡើងនៅថ្ងៃទី ២ មិថុនា ក្នុងជំនួបរវាងលោក ស ខេង រដ្ឋមន្ត្រីក្រសួងមហាផ្ទៃ និងលោក Christian Berger ឯកអគ្គរដ្ឋទូតអាល្លឺម៉ង់ប្រចាំកម្ពុជាដែលនឹងត្រូវចប់បេសកកម្មឆាប់ៗក្នុងពេលខាងមុខ។
ក្រសួងមហាផ្ទៃបញ្ជាក់ក្នុងសេចក្តីប្រកាសព័ត៌មានថា លោក ស ខេង បានកោតសរសើរចំពោះការបំពេញការងាររបស់លោក Berger ដែលបានខិតខំអស់ពីលទ្ធភាពជួយគាំទ្រដល់បុព្វហេតុនៃការអភិវឌ្ឍប្រទេសកម្ពុជា ព្រមទាំងបានដើរតួនាទីយ៉ាងសកម្មក្នុងការរួមចំណែកបន្តពង្រឹង និងពង្រីកទំនាក់ទំនងកិច្ចសហប្រតិបត្តិការរវាងប្រទេសទាំង ២។
លោករំឭកថា ក្នុងអាណត្តិការទូតរបស់ឯកអគ្គរដ្ឋទូតនៅកម្ពុជា ពិតជាមានទំនាក់ទំនងការងារជាមួយភាគីទាំង ២ យ៉ាងល្អប្រសើរ ព្រមទាំងមានអនុស្សាវរីយ៍ជាមួយគ្នាយ៉ាងច្រើនពាក់ព័ន្ធនឹងទស្សនកិច្ចសិក្សា និងការចុះទៅកាន់មូលដ្ឋាននានា ដើម្បីពិនិត្យការងារពាក់ព័ន្ធដែលគាំទ្រដោយអាល្លឺម៉ង់ ក៏ដូចជាដៃគូមកពីប្រទេសនានានៃសហភាពអឺរ៉ុប។
លោក ស ខេង ជឿជាក់ថា ការធ្វើទស្សនកិច្ចរវាងភាគីទាំង ២ កន្លងមកនឹងក្លាយជាការអនុវត្តជាក់ស្តែងលើការងារកំណែទម្រង់វិមជ្ឈការ និងវិសហមជ្ឈការ ដោយសារការងារនេះពិតជាមានសារៈសំខាន់ដែលរដ្ឋាភិបាលកម្ពុជាបានខិតខំពុះពារ និងប្រឹងប្រែងនាពេលកន្លងមក។
សេចក្តីប្រកាសព័ត៌មានបញ្ជាក់ថា លោក Berger បានបង្ហាញក្តីរីករាយលើការងារកំណែទម្រង់វិមជ្ឈការ និងវិសហមជ្ឈការ ពីព្រោះអាល្លឺម៉ង់ក៏ជាប្រទេសមួយដែលមានបទពិសោធយូរឆ្នាំក្នុងកិច្ចការនេះដែរ។
ការងារនេះជាការចូលរួមចំណែកយ៉ាងមានសារៈសំខាន់សម្រាប់ប្រទេសកម្ពុជាក្នុងរយៈពេលមធ្យម និងវែងតទៅអនាគត។
សេចក្តីប្រកាសព័ត៌មានបញ្ជាក់ថា៖ «ឯកឧត្តម [លោក Berger] ក៏សូមវាយតម្លៃខ្ពស់ចំពោះការយកចិត្តទុកដាក់ក្នុងការអនុវត្តការងារវិមជ្ឈការ និងវិសហមជ្ឈការ ដំណាក់កាលទី ២ បន្តទៀត ផ្អែកលើការងារវិមជ្ឈការ និងវិសហមជ្ឈការដ៏មានសារៈសំខាន់នេះ ឯកឧត្តមនឹងបន្តធ្វើការងារជាមួយឯកអគ្គរដ្ឋទូតថ្មីដែលនឹងត្រូវបន្តការងារ ដើម្បីធ្វើយ៉ាងណាពង្រីកកិច្ចសហប្រតិបត្តិការរវាងប្រទេសទាំង ២ បន្ថែមទៀត ដើម្បីជំរុញកិច្ចការងារនេះឱ្យមានវឌ្ឍនភាពតទៅមុខ»។
លោក ស ខេង ប្រាប់លោក Berger ថា មកដល់ពេលនេះពុំមានព័ត៌មានអំពីហិង្សាណាមួយកើតឡើងនោះទេនៅក្នុងស្ថានភាពទូទៅនៃដំណើរការបោះឆ្នោតជ្រើសរើសក្រុមប្រឹក្សា ឃុំ សង្កាត់ អាណត្តិទី ៥ ដែលនឹងប្រព្រឹត្តទៅនៅថ្ងៃទី ៥ ខែមិថុនា។
លោកលើកឡើងថា ការចូលរួមពីបណ្តាគណបក្សនយោបាយនានា ព្រមទាំងប្រជាពលរដ្ឋបានបង្ហាញសកម្មភាពយ៉ាងផុលផុស ក្នុងយុទ្ធនាការបោះឆ្នោត ដោយគោរពតាមបទបញ្ជា និងនីតិវិធី៕
