ភ្នំពេញៈ មន្ត្រីក្រសួងបរិស្ថានបញ្ជាក់ថា រាជរដ្ឋាភិបាលបានដាក់ចេញនូវគោលនយោបាយ និងវិធានការច្បាប់ក៏ដូចជាដំណោះស្រាយនានា ដើម្បីបង្កើនប្រសិទ្ធភាពនៃការការពារ និងអភិរក្សធនធានធម្មជាតិ ដែលនៅសល់ឱ្យនៅគង់វង្ស។ ការបញ្ជាក់នេះបានធ្វើឡើង ក្រោយពីមានក្រុមយុវជន និងអង្គការសង្គមស៊ីវិលចំនួន ២៧ បានចេញសេចក្ដីថ្លែងការណ៍រួម ១ កាលពីថ្ងៃទី ២ ខែមិថុនា ដោយសម្តែងការព្រួយបារម្ភជាខ្លាំង ចំពោះវិបត្តិបរិស្ថាន ខណៈដែលសកម្មភាពកាប់បំផ្លាញព្រៃឈើ និងការឈូសឆាយវាតយកដីព្រៃនៅតែបន្តកើតមាននៅឡើយ។
លោក នេត្រ ភក្ត្រា រដ្ឋលេខាធិការក្រសួងបរិស្ថានប្រាប់ភ្នំពេញប៉ុស្ដិ៍នៅថ្ងៃទី ២ មិថុនាថា ការសម្តែងការព្រួយបារម្ភរបស់ក្រុមយុវជន និងអង្គការសង្គមស៊ីវិលទាំងនោះគឺជាសិទិ្ធរបស់ពួកគេ។
លោកថា៖ «រាជរដ្ឋាភិបាលបានដាក់ចុះនូវគោលនយោបាយ និងវិធានការច្បាប់ក៏ដូចជាដំណោះស្រាយនានា ដើម្បីបង្កើនប្រសិទ្ធភាពនៃការការពារ និងអភិរក្សធនធានធម្មជាតិ ដែលនៅសល់ឱ្យនៅគង់វង្ស»។
ក្រុមយុវជន សហគមន៍ សហជីព សមាគម និងអង្គការមិនមែនរដ្ឋាភិបាលចំនួន ២៧ កាលពីថ្ងៃទី ២ ខែមិថុនា បានចេញសេចក្ដីថ្លែងការណ៍រួមមួយ ដោយបានសម្តែងការព្រួយបារម្ភជាខ្លាំង ចំពោះវិបត្តិបរិស្ថាន សិទ្ធិបរិស្ថាន និងការមិនទាន់អនុវត្តឱ្យបានពេញលេញ គោលនយោបាយស្ដីពីកិច្ចការពារថែរក្សា បរិស្ថាន និងពុំបានយកចិត្តទុកដាក់ ដោះស្រាយនូវរាល់សំណូមពរ ក៏ដូចជាក្តីកង្វល់នានា ជុំវិញបញ្ហាបរិស្ថាន។
ក្រុមទាំងនេះលើកឡើងថា៖ «ការគ្រប់គ្រងធនធានធម្មជាតិ យើងខ្ញុំសង្កេតឃើញថា ទោះបីជារាជរដ្ឋាភិបាលបានខិតខំបង្កើននូវចំនួនតំបន់ការពារធនធានធម្មជាតិក្តី តែវាពុំបានឆ្លើយតបជាមួយការកើនឡើងនូវសកម្មភាពកាប់បំផ្លាញ និងការឈូសឆាយដីព្រៃជាច្រើនហិកតា ទាំងនៅក្នុងដែនជម្រកសត្វព្រៃ ព្រៃឡង់ បឹងពែរ ព្រៃព្រះរការ និងតំបន់ដទៃទៀតជារៀងរាល់ថ្ងៃនោះទេ»។ សកម្មភាពនេះបានធ្វើឱ្យគម្របព្រៃឈើរបស់កម្ពុជាក្នុងរយៈពេល ២ ទសវត្សរ៍ចុងក្រោយនេះបានបន្តធ្លាក់ចុះរហូតដល់ ១៤,២៩% ត្រឹមឆ្នាំ ២០១៨។
ទន្ទឹមនឹងនេះនិន្នាការនៃការទន្ទ្រានដីយកមកធ្វើជាកម្មសិទ្ធិឯកជនដោយខុសច្បាប់បានបន្តគំរាមកំហែងយ៉ាងធ្ងន់ធ្ងរបន្ថែមទៀតដល់តំបន់ព្រៃឈើ តំបន់ការពារធម្មជាតិ តំបន់បឹងទន្លេសាប និងព្រៃសហគមន៍។
ក្រុមអង្គការសង្គមស៊ីវិលទាំងនេះបានផ្ដល់អនុសាសន៍ដល់ក្រសួងបរិស្ថាន និងក្រសួងកសិកម្ម រុក្ខាប្រមាញ់ និងនេសាទ គួរយកចិត្តទុកដាក់លើការអនុវត្តតួនាទី និងភារកិច្ចរបស់ខ្លួនតាមបញ្ញត្តិនៃច្បាប់ស្ដីពីតំបន់ការពារធនធានធម្មជាតិច្បាប់ស្តីពីព្រៃឈើកម្មវិធីព្រៃឈើជាតិ និងគោលនយោបាយនានាសម្រាប់កិច្ចការងារអភិរក្ស និងការពារ ធនធានធម្មជាតិ ប្រកបដោយស័ក្ដិសិទ្ធិភាព។ ក្រសួងបរិស្ថាន គួរធ្វើអធិការកិច្ចលើគុណភាពនៃការបំពេញការងាររបស់មន្ត្រីឧទ្យានុរក្ស ព្រមទាំងបើកលម្ហសិទ្ធិសេរីភាព សម្រាប់ការចូលប្រកបដោយបរិយាប័ន្ន។
ពួកគេក៏បានផ្ដល់អនុសាសន៍ចំពោះបញ្ហាប្លាស្ទិក និងសំរាមផងដែរថា គួរបង្កើតឱ្យមានចំណាត់ពន្ធ និងវិធានការ កាត់បន្ថយការប្រើប្រាស់ប្លាស្ទិកក្នុងកម្រិតអតិបរមា។ អនុវត្តការផាកពិន័យលើការបោះចោលសំរាម ពាសវាលពាសកាល ការបោះសំរាមចូលទៅក្នុងប្រឡាយ បឹង និងទន្លេ ព្រមទាំងការគ្រប់គ្រងកាកសំណល់ឧស្សាហកម្ម។
លោក ហេង គឹមហុង ប្រធានកម្មវិធីផ្នែកស្រាវជ្រាវ និងតស៊ូមតិនៃសមាគមបណ្តាញយុវជនកម្ពុជាលើកឡើងថា ក្រុមយុវជន និងអង្គការសង្គមស៊ីវិល ដែលបានចេញសេចក្តីថ្លែងការណ៍រួមគ្នានេះ រំពឹងខ្ពស់ថា តាមរយៈអនុសាសន៍ដែលបានផ្ដល់ទៅនេះ រាជរដ្ឋាភិបាលក៏ដូចជាស្ថាប័នពាក់ព័ន្ធ នឹងយកចិត្ដទុកដាក់ដោះស្រាយពីព្រោះបញ្ហាទាំងនេះ គឺជាបញ្ហារួមដែលត្រូវរួមគ្នាដោះស្រាយ។
លោកថ្លែងថា៖ «ការដោះស្រាយបញ្ហាទាំងអស់នេះ គឺជាការឆ្លុះបញ្ចាំងអំពីការទទួលខុសត្រូវ ចំពោះមុខងារសាធារណៈ និងការយកចិត្ដទុកដាក់របស់អាជ្ញាធរ។ បើសិនជា ក្នុងករណីមិនមានការយកចិត្តទុកដាក់ទេ ឆ្នាំក្រោយកម្ពុជានឹងមានការបោះឆ្នោតជ្រើសរើសតំណាងរាស្ដ្រ វាអាចជាផ្នែកមួយដែរ ដែលធ្វើឱ្យពលរដ្ឋនឹងធ្វើការពិចារណាអំពីស្មារតីទទួលខុសត្រូវរបស់រដ្ឋាភិបាលចំពោះការសន្យា និងការដោះស្រាយបញ្ហាសាធារណៈនេះ»។
យ៉ាងណាក្តី លោក នេត្រ ភក្ត្រា លើកឡើងថា វិធានការដែលរាជរដ្ឋាភិបាលដាក់ចេញ ដើម្បីការពារឱ្យបាននូវធនធានធម្មជាតិ បន្ថែមពីលើវិធានការអនុវត្តច្បាប់ គឺការបង្កើតសេដ្ឋកិច្ចមូលដ្ឋានក្នុងបំណងកាត់បន្ថយការពឹងអាស្រ័យទាំងស្រុងរបស់ពលរដ្ឋ លើធនធានធម្មជាតិដោយអនុវត្តគោលការណ៍ «រក្សាឈើឈរ ដើម្បីរកចំណូល» តាមរយៈការលក់ឥណទានកាបូន និងទេសចរណ៍ធម្មជាតិផ្សារភ្ជាប់ទឹកដី។
លោកថា៖ «ជាមួយគ្នានេះកម្ពុជាក៏បាននិងជំរុញលើការប្រើប្រាស់ថាមពលកកើតឡើងវិញ និងធ្វើអព្យាក្រឹតកាបូនត្រឹមឆ្នាំ ២០៥០។ នេះគឺជាកិច្ចការជាក់ស្តែងដែលរាជរដ្ឋាភិបាលបានអនុវត្តលើកិច្ចការការគ្រប់គ្រង និងអភិរក្សធនធានធម្មជាតិ និងការគ្រប់គ្រងបរិស្ថានប្រកបដោយការទទួលខុសត្រូវ និងចក្ខុវិស័យច្បាស់លាស់ មិនមែនត្រឹមតែនិយាយឱ្យពីរោះនោះទេ»៕
វីដេអូ៖