ភ្នំពេញៈ កម្ពុជា វៀតណាម និងឡាវ ប្រកាសប្តេជ្ញាចាត់ទុកបទល្មើសសត្វព្រៃជាឧក្រិដ្ឋកម្មធ្ងន់ធ្ងរ និងឯកភាពគ្នាចាត់វិធានការអនុវត្តការដាក់ទោសទណ្ឌឱ្យមានប្រសិទ្ធភាពចំពោះជនល្មើស ខណៈចំនួនករណីបទល្មើសសត្វព្រៃដែលបានឈានដល់តុលាការនៅប្រទេសទាំង ៣ នេះមានកម្រិតទាប។
នាថ្ងៃទី ២-៣ ខែមិថុនា តំណាងអង្គការមូលនិធិសត្វព្រៃពិភពលោកប្រចាំកម្ពុជា (WWF-កម្ពុជា) បានចូលរួមក្នុងសន្និសីទថ្នាក់តំបន់ស្តីពីយុត្តិធម៌សម្រាប់ឧក្រិដ្ឋកម្មសត្វព្រៃ (Justice for Wildlife Crime) ដែលធ្វើឡើងនៅតុលាការកំពូលកម្ពុជា និងតាមប្រព័ន្ធវីដេអូ។
ក្នុងសន្និសីទរយៈពេល ២ ថ្ងៃនេះ ចៅក្រម និងព្រះរាជអាជ្ញាពីប្រទេសកម្ពុជា ឡាវ និងវៀតណាម បានមកចូលរួមពិភាក្សាអំពីបទល្មើសសត្វព្រៃ ដោយសារចំនួនករណីបទល្មើសសត្វព្រៃដែលបានឈានដល់តុលាការមានកម្រិតទាប។
WWF-កម្ពុជា បានឱ្យដឹងតាមរយៈហ្វេសប៊ុកថា៖ «ក្រោយពីបញ្ចប់សន្និសីទនេះ ប្រទេសទាំង ៣ នឹងចេញផ្សាញសេចក្តីថ្លែងសារព័ត៌មានរួម ប្តេជ្ញាចាត់ទុកបទល្មើសសត្វព្រៃជាឧក្រិដ្ឋកម្មធ្ងន់ធ្ងរ និងឯកភាពគ្នាក្នុងការចាត់វិធានការថ្នាក់ជាតិ ដើម្បីអនុវត្តទោសទណ្ឌប្រកបដោយប្រសិទ្ធភាពចំពោះជនល្មើសច្បាប់ទាក់ទងនឹងសត្វព្រៃ និងកែលម្អកិច្ចសហប្រតិបត្តិការឆ្លងដែន»។
WWF-កម្ពុជា បញ្ជាក់ថា នៅក្នុងប្រទេសកម្ពុជា ក៏ដូចជាតាមបណ្តាប្រទេសមួយចំនួននៅក្នុងតំបន់អាស៊ី តម្រូវការសាច់សត្វព្រៃ និងផលិតផលពីសត្វព្រៃជាមួយគ្នានឹងការជួញដូរសត្វព្រៃខុសច្បាប់ គឺជាកត្តាដែលធ្វើឱ្យការដាក់អន្ទាក់ចាប់សត្វព្រៃកើនឡើង។
បើតាមប្រភពដដែលបានឱ្យដឹងថា នៅក្នុងប្រទេសកម្ពុជា ក្នុងឆ្នាំ ២០២១ ក្រសួងបរិស្ថាន និងអង្គការដៃគូរបានដកអន្ទាក់សរុបចំនួន ជាង ៦ ម៉ឺនអន្ទាក់ ចេញពីតំបន់ការពារធម្មជាតិចំនួន ៧២ និងច្រករបៀងជីវចម្រុះផ្សេងៗទៀតក្នុងប្រទេសកម្ពុជា។
WWF-កម្ពុជា បន្តថា៖ «ដើម្បីជួយសង្គ្រោះសត្វព្រៃ យើងត្រូវនិយាយថាទេ ចំពោះសាច់សត្វព្រៃ និងផលិតផលពីសត្វព្រៃគ្រប់ប្រភេទ ហើយចាប់ផ្តើមស្តារធនធានធម្មជាតិរបស់យើងឡើងវិញ»៕