ភ្នំពេញៈ សហរដ្ឋអាមេរិកប្រកាសប្តេជ្ញាចិត្តក្នុងការពិភាក្សាគ្នាដោយបើកចំហជាមួយយុវជនកម្ពុជា និងពង្រីកទំនាក់ទំនងយូរអង្វែងរវាងសហរដ្ឋអាមេរិក និងប្រជាជននៅតំបន់អាស៊ីអាគ្នេយ៍ ស្របពេលកម្ពុជាធ្វើជាប្រធានអាស៊ាននៅឆ្នាំ ២០២២ នេះ។
ស្ថានទូតសហរដ្ឋអាមេរិកបានឱ្យដឹងតាមរយៈហ្វេសប៊ុកនាថ្ងៃទី ៣ ខែមិថុនា ថា លេខាទី ១ នៃស្ថានទូតសហរដ្ឋអាមេរិកប្រចាំកម្ពុជា និងជាអ្នកសម្របសម្រួលកិច្ចការអាស៊ាន លោកស្រី Bic Leu បាននិយាយបែបនេះទៅកាន់និស្សិតចំនួនជិត ៤០ នាក់ ដែលមកពីសាកលវិទ្យាល័យក្នុងប្រទេសកម្ពុជានៅមជ្ឈមណ្ឌល AmCam របស់ស្ថានទូតអាមេរិកកាលពីថ្ងៃទី ២៤ ខែឧសភា។
ប្រធានបទនៃកិច្ចពិភាក្សានេះគឺស្តីអំពីភាពជាដៃគូជាយុទ្ធសាស្ត្ររវាងសហរដ្ឋអាមេរិក និងសមាគមអាស៊ាន និងកិច្ចប្រជុំកំពូលពិសេសរវាងសហរដ្ឋអាមេរិក និងសមាគមអាស៊ានកាលពីខែឧសភានៅទីក្រុងវ៉ាស៊ីនតោន (Washington) សហរដ្ឋអាមេរិក ដែលរៀបចំដោយប្រធានាធិបតីសហរដ្ឋអាមេរិក លោក Joe Biden។
ស្ថានទូតសហរដ្ឋអាមេរិកបានបញ្ជាក់ថា និស្សិតដែលចូលរួមក្នុងកិច្ចពិភាក្សានេះបានសួរសំណួរ «ល្អណាស់» ទៅកាន់លោកស្រី Bic Leu ស្តីពីអនាគតនៃទំនាក់ទំនងរវាងសហរដ្ឋអាមេរិក និងសមាគមអាស៊ាន។
ហ្វេសប៊ុកដដែលបញ្ជាក់ថា៖ «សហរដ្ឋអាមេរិកមានការប្តេជ្ញាចិត្ត ចំពោះការពិភាក្សាគ្នា ដោយបើកចំហជាមួយយុវជនកម្ពុជា។ ក្នុងពេលដែលប្រទេសកម្ពុជាធ្វើជាប្រធានអាស៊ាន នៅឆ្នាំ ២០២២ នេះ យើងសូមអបអរទំនាក់ទំនងយូរអង្វែងរវាងសហរដ្ឋអាមេរិក និងប្រជាជននៅតំបន់អាស៊ី អាគ្នេយ៍»៕