.jpg)
លោក អាន សុខខឿន ឯកអគ្គរាជទូត និងជាតំណាងអចិន្រៃ្តយ៍កម្ពុជាប្រចាំទីក្រុងហ្សឺណែវ ប្រទេសស្វ៊ីស។
ភ្នំពេញៈ តំណាងកម្ពុជាប្រចាំប្រទេសស្វ៊ីស ច្រានចោលការលើកឡើងរបស់មន្ត្រីសិទ្ធិមនុស្សនៃអង្គការសហប្រជាតិ (អ.ស.ប) ដែលថា បេក្ខជនមួយចំនួនរបស់គណបក្សប្រឆាំងបានទទួលរងការរឹតត្បិត និងបំភិតបំភ័យ នៅមុនការបោះឆ្នោតឃុំ-សង្កាត់ ឆ្នាំ ២០២២។
កាលពីថ្ងៃទី ២ ខែមិថុនា អ្នកនាំពាក្យនៃការិយាល័យឧត្ដមស្នងការទទួលបន្ទុកសិទ្ធិមនុស្សរបស់ អ.ស.ប លោកស្រី Liz Throssell បានលើកឡើងក្នុងសេចក្តីថ្លែងការណ៍ថា បេក្ខជនគណបក្សប្រឆាំងបានទទួលរងការគំរាមកំហែង ការបំភិតបំភ័យ និងការរារាំង នៅមុនការបោះឆ្នោតឃុំ-សង្កាត់នៅកម្ពុជាដែលនឹងប្រព្រឹត្តទៅនៅថ្ងៃទី ៥ ខែមិថុនា ដោយមានការដាក់ពន្ធនាគារលើបេក្ខជនមួយចំនួន ដែលហាក់ដូចជាត្រូវបានរៀបចំឡើងដើម្បីទប់ស្កាត់យុទ្ធនាការនយោបាយ។
ស្ថានបេសកកម្មអចិន្ត្រៃយ៍កម្ពុជាប្រចាំអង្គការសហប្រជាជាតិនិងអង្គការអន្តរជាតិនានានៅទីក្រុងហ្សឺណែវ ប្រទេសស្វ៊ីស នាថ្ងៃទី៣ ខែឧសភា បានចេញសេចក្តីថ្លែងការណ៍ ដោយបានចាត់ទុកការអត្ថាធិប្បាយរបស់លោកស្រី Throssell ថា ជារឿងមិនត្រឹមត្រូវ ជាការធ្វើនយោបាយូបនីយកម្ម និងជ្រើសរើសតែមួយជ្រុង។
សេក្តីថ្លែងការណ៍បញ្ជាក់ថា៖ «ការអះអាងរបស់អ្នកនាំពាក្យដែលថា បេក្ខជនមួយចំនួនត្រូវទទួលរងការរឹតត្បិត និងបំភិតបំភ័យ គឺជាការមិនសមហេតុផលទាល់តែសោះ។ ពាក្យបណ្ដឹងតវ៉ាពីបេក្ខជនចូលរួមការប្រកួតប្រជែងការបោះឆ្នោត ជាសក្ខីភាពបង្ហាញឱ្យឃើញពីការអនុវត្តប្រកបដោយភាពចាស់ទុំ និងស្របច្បាប់ នៃលទ្ធិប្រជាធិបតេយ្យ និងសិទ្ធិជាមូលដ្ឋានរបស់ពួកគាត់»។
សេក្តីថ្លែងការណ៍នេះបន្តថា ពាក្យបណ្ដឹងទាំងនោះពុំគួរត្រូវបានចាត់ទុក ជាការសងសឹក និងជាការរារាំង ប្រឆាំងក្រុមណាមួយនោះទេ។ សិទ្ធិចូលរួមក្នុងកិច្ចការសាធារណៈពុំមានន័យស្មើនឹងសិទ្ធិក្លែងបន្លំឯកសារ បរិហារកេរិ៍ត និងជេរប្រមាថ និងញុះញង់ឱ្យមានការរើសអើង អំពើហិង្សា និងការស្អប់ខ្ពើមគ្នា នោះឡើយ៕
