ភ្នំពេញៈ គណៈកម្មាធិការជាតិរៀបចំការបោះឆ្នោត (គជប) អះអាងថា ថ្ងៃទី ៣ ខែមិថុនា ដែលជាថ្ងៃទី ១៤ និងជាថ្ងៃចុងក្រោយនៃការធ្វើយុទ្ធនាការឃោសនាបោះឆ្នោតឃុំ-សង្កាត់ របស់គណបក្សនយោបាយ បានប្រព្រឹត្តទៅក្នុងបរិយាកាសមានសន្តិសុខ សុវត្ថិភាព និងគ្មានការគំរាមកំហែង។
គជប បញ្ជាក់ក្នុងសេចក្តីប្រកាសព័ត៌មាននាថ្ងៃទី ៣ ខែមិថុនាថា៖ «ចំពោះសភាពការណ៍ទូទៅនៃដំណើរការឃោសនាបោះឆ្នោតរបស់គណបក្សនយោបាយ ក្នុងថ្ងៃចុងក្រោយនេះ គឺបានប្រព្រឹត្តទៅក្នុងបរិយាកាសមានសន្តិសុខ សុវត្ថិភាព សណ្តាប់ធ្នាប់ល្អ គ្មានអំពើហិង្សា និងគ្មានការគំរាមកំហែង»។
គជប បញ្ជាក់ថា ថ្ងៃចុងក្រោយនៃយុទ្ធនាការឃោសនានេះ គណបក្សនយោបាយ បានធ្វើសកម្មភាពឃោសនាអំពីគោលនយោបាយ និងកម្មវិធីនយោបាយរបស់ខ្លួនតាមកម្មវិធីដែលគណបក្សនយោបាយនីមួយៗបានដាក់ជូនគណៈកម្មការរាជធានី ខេត្តរៀបចំការបោះឆ្នោត និងគណៈកម្មការឃុំ-សង្កាត់រៀបចំការបោះឆ្នោត។
គជប បញ្ជាក់ថា៖ «គណបក្សនយោបាយបានធ្វើសកម្មភាពឃោសនាយ៉ាងផុលផុស នៅទូទាំងប្រទេសជាពិសេសមានសកម្មភាពហែក្បួនទ្រង់ទ្រាយធំគួរឱ្យកត់សម្គាល់»។
គជប បន្តថា នៅរាជធានីភ្នំពេញ មានការហែក្បួនរបស់គណបក្សនយោបាយចំនួន ៣ ដែលមានអ្នកចូលរួមជាង ៥ម៉ឺននាក់។
នៅខេត្តសៀមរាបមានការហែក្បួនរបស់គណបក្សនយោបាយចំនួន ៣ ដែលមានអ្នកចូលរួមជាង ៧ ម៉ឺននាក់។
នៅខេត្តស្វាយរៀង មានការហែក្បួនរបស់គណបក្សនយោបាយចំនួន ៤ ដែលមានអ្នកចូលរួមជាង ៣ ម៉ឺននាក់៕
វីដេអូ៖