.jpg)
ភ្នំពេញៈ គិតត្រឹមថ្ងៃដំបូងនៃថ្ងៃបើកយុទ្ធនាការ «១ ម៉ឺនរៀល ១ ម៉ឺននាក់» សម្រាប់គន្ធបុប្ផា មូលនិធិគន្ធបុប្ផាកម្ពុជាបានទទួលថវិកាបរិច្ចាគចំនួនជិត ១០ ម៉ឺនដុល្លារអាមេរិក។ នេះបើយោងតាមទំព័រហ្វេសប៊ុកមូលនិធិគន្ធបុប្ផាកម្ពុជា។
មូលនិធិគន្ធបុប្ផាកម្ពុជាអំពាវនាវដល់សប្បុរសជនទាំងអស់បន្តចូលរួមយុទ្ធនាការនេះរហូតដល់ថ្ងៃទី ៣០ ខែមិថុនា។
មូលនិធិគន្ធបុប្ផាកម្ពុជាបញ្ជាក់លើហ្វេសប៊ុកនាថ្ងៃទី ៣ ខែមិថុនាថា៖ «មូលនិធិគន្ធបុប្ផាកម្ពុជា សូមគោរពថ្លែងអំណរគុណយ៉ាងជ្រាលជ្រៅចំពោះសប្បុរសជនទាំងអស់ដែលតែងតែបរិច្ចាគចូលរួមបន្តនិរន្តរភាពរបស់មន្ទីរពេទ្យគន្ធបុប្ផាទាំង ៥ ទីតាំងនៅទូទាំងប្រទេស»។
មូលនិធិគន្ធបុប្ផាកម្ពុជាបានបើកយុទ្ធនាការនេះរយៈពេល ១ ខែ ដោយចាប់ផ្តើមក្នុងថ្ងៃទិវាកុមារអន្តរជាតិ ១ មិថុនា ដើម្បីបំផុសស្មារតីខ្មែរជួយខ្មែរចូលរួមបរិច្ចាគថវិកាឱ្យបាន ១ ម៉ឺននាក់ ក្នុងម្នាក់ ១ ម៉ឺនរៀលដើម្បីជួយដល់កិច្ចដំណើរការមន្ទីរពេទ្យគន្ធបុប្ផាបន្តទៀត៕
