.jpg)
លោក ឌឹម សុវណ្ណារុំ សមាជិក និងជាអ្នកនាំពាក្យ គ.ជ.ប។ NEC
ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប) អះអាងថា ក្នុងរយៈពេល ១៤ ថ្ងៃ នៃយុទ្ធនាការឃោសនាបោះឆ្នោតឃុំ-សង្កាត់ ឆ្នាំ ២០២២ មានបញ្ហាបន្តិចបន្តួចដែលបានកើតឡើង តែពុំមានភាពមិនប្រក្រតីធ្ងន់ធ្ងរណាមួយ ដែលធ្វើឱ្យប៉ះពាល់ដល់ដំណើរការឃោសនាបោះឆ្នោតនោះទេ។
លោក ឌឹម សុវណ្ណារុំ សមាជិក និងជាអ្នកនាំពាក្យ គ.ជ.ប បានថ្លែងក្នុងកិច្ចប្រជុំផ្សព្វផ្សាយជាមួយភាគីពាក់ព័ន្ធ នាថ្ងៃទី៣ ខែឧសភា ថា៖ «រយៈពេល ១៤ថ្ងៃ នៃយុទ្ធនាការឃោសនារកសំឡេងឆ្នោត ពុំមានភាពមិនប្រក្រតីធ្ងន់ធ្ងរណាមួយបានកើតឡើង ដែលធ្វើឱ្យប៉ះពាល់ដល់ដំណើរការឃោសនាបោះឆ្នោត ឬកើតមានអំពើហិង្សាឡើយ។ មានបញ្ហាបន្តិចបន្តួច»។
លោកអះអាងថា បញ្ហាបន្តិចបន្តួចទាំងនោះមានដូចជា ការប្រើប្រាស់ពាក្យពេចន៍ដៀមដាម ប្រមាថ រើសអើង ការចាក់មេក្រូនៅម៉ោងហាមឃាត់ ការហែកស្លាកគណបក្ស សមាជិកក្រុមប្រឹក្សាឃុំ-សង្កាត់ យកម៉ោងប្រចាំការទៅហែក្បួនឃោសនាឱ្យគណបក្សនយោបាយ។
លោក ឌឹម សុវណ្ណារុំ បន្តថា ការហែក្បួនធំៗត្រូវបានធ្វើនៅតាមខេត្ត រាជធានី នៅថ្ងៃទី១ នៃការឃោសនា គឺថ្ងៃទី២១ ខែឧសភា និងថ្ងៃចុងក្រោយ គឺថ្ងៃទី៣ ខែមិថុនា។
លោកអំពាវនាវដល់គណបក្សនយោបាយទាំងអស់ «ត្រូវតែ»បញ្ឈប់សកម្មភាពឃោសនាក្នុងរយៈពេល២៤ម៉ោងមុនថ្ងៃបោះឆ្នោត ហើយលោកព្រមានថា «ជនណា» ឬគណបក្សនយោបាយណាដែលបំពានការហាមឃាត់នេះនឹងត្រូវទទួលពិន័យតាមច្បាប់។
ការឃោសនាបោះឆ្នោតឃុំ សង្កាត់មានរយៈពេល ១៤ថ្ងៃ ចាប់ពីថ្ងៃទី២១ ខែឧសភា ដល់ថ្ងៃទី៣ ខែមិថុនា ខណៈថ្ងៃបោះឆ្នោតនឹងប្រព្រឹត្តទៅនៅថ្ងៃទី៥ ខែមិថុនា៕
