.jpg)
រូបភាព Samdech Hun Sen
ភ្នំពេញៈ អង្គការសម្ព័ន្ធសន្តិភាពសកល (UPF) ស្នើសុំទស្សនៈពីលោកនាយករដ្ឋមន្ត្រី ហ៊ុន សែន ដើម្បីធ្វើយ៉ាងណាឱ្យសម្ព័ន្ធសន្តិភាពសកលដើរតួនាទីកាន់តែសំខាន់ក្នុងការស្វែងរកសន្តិភាពសម្រាប់ពិភពលោក។ នេះបើតាមហ្វេសប៊ុកលោកនាយករដ្ឋមន្ត្រី ហ៊ុន សែន។
ការស្នើសុំនេះធ្វើឡើងក្នុងជំនួបនាថ្ងៃទី ៤ ខែមិថុនា រវាងលោក ហ៊ុន សែន និងលោក យុន យ៉ុង ហូ (Yun Young Ho) អគ្គនាយកអង្គការ UPF ក្នុងឱកាសដែលលោកមកប្រទេសកម្ពុជានាពេលនេះ ដើម្បីចូលរួមសង្កេតដំណើរការបោះឆ្នោតក្រុមប្រឹក្សាឃុំ សង្កាត់។
បើតាមហ្វេសប៊ុកលោកនាយករដ្ឋមន្ត្រី លោក Yun Young Ho លើកឡើងថា តាមរយៈប្រវត្តិរូបរបស់លោក ហ៊ុន សែន ដែលបានផ្សព្វផ្សាយនៅក្នុងពេលនៃការទទួលពានរង្វាន់ស៊ុនហាក់ ក្នុងប្រទេសកូរ៉េ កាលពីពេលកន្លងទៅបានធ្វើឱ្យមានការចាប់អារម្មណ៍ និងស្ញប់ស្ញែងយ៉ាងខ្លាំងនៅទូទាំងពិភពលោក។
ហ្វេសប៊ុកដដែលបានដកស្រង់សម្ដី លោក Yun Young Ho ថា លោក ហ៊ុន សែន បានឆ្លងកាត់ និងជម្នះនូវរាល់បញ្ហាយ៉ាងច្រើន ដើម្បីរំដោះកម្ពុជាពីរបបប្រល័យពូជសាសន៍ បញ្ចប់សង្គ្រាមផ្ទៃក្នុង និងនាំមកនូវសន្តិភាព ស្ថិរភាព និងការអភិវឌ្ឍរីកចម្រើនយ៉ាងឆាប់រហ័សពិសេស ជម្នះបាននូវការឆ្លងរីករាលដាលជំងឺកូវីដ ១៩ និងដំណើរការនៃការអនុវត្តលទ្ធិប្រជាធិបតេយ្យតាមរយៈការបោះឆ្នោត។
ហ្វេសប៊ុកដដែលបញ្ជាក់ថា៖ «ឯកឧត្តម [លោក Yun Young Ho] បានសុំនូវទស្សនៈរបស់សម្តេចតេជោធ្វើយ៉ាងណាឱ្យសម្ព័ន្ធសន្តិភាពសកល ដើរតួនាទីកាន់តែសំខាន់ក្នុងការស្វែងរកសន្តិភាពសម្រាប់ពិភពលោក»។
លោក ហ៊ុន សែន បានអរគុណដល់លោក Yun Young Ho ដែលបានមកចូលរួមសង្កេតការណ៍ការបោះឆ្នោតនៅកម្ពុជា ដែលជាកត្តាជំរុញលទ្ធិប្រជាធិបតេយ្យនៅកម្ពុជា។
លោកស្នើឱ្យមានការជួបជុំគ្នារវាងឥស្សរជនជាន់ខ្ពស់ និងអ្នកវាយតម្លៃធ្វើការសម្របសម្រួល ធ្វើការជាមួយអង្គការផ្សេងៗលើបញ្ហាសន្តិភាព មិនសម្រាប់តែអាស៊ីប៉ាស៊ីហ្វីកទេ ប៉ុន្តែសម្រាប់ពិភពលោកទាំងមូល ជាពិសេសចូលរួមចំណែកក្នុងកិច្ចការពិភពលោកក្នុងពេលបច្ចុប្បន្ន៕
