ភ្នំពេញៈ រោងសិប្បកម្មកែច្នៃថង់ប្លាស្ទិកមួយកន្លែង បានរងការឆេះខូចខាតស្ទើរអស់ទាំងស្រុងក្នុងគ្រោះអគ្គិភ័យ កាលពី រសៀលថ្ងៃទី៤ ខែមិថុនា នៅចំណុចភូមិឫស្សី ក្រុម១៧ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។ នេះបើតាមមន្ត្រីនគរបាលពន្លត់អគ្គិភ័យ។
លោកព្រហ្ម យ៉ន ប្រធានការិយាល័យនគរបាលបង្ការ ពន្លត់អគ្គិភ័យ និងសង្គ្រោះ រាជធានីភ្នំពេញ បាននិយាយថា អគ្គិភ័យនេះ បានបង្កការខូចខាត នូវគ្រឿងឧបករណ៍សម្ភារប្រើប្រាស់ ប្លាស្ទិក អស់ប្រមាណ៧០ភាគរយ និង ឆេះខូចខាតម៉ាស៊ីនស្វ័យប្រវត្តិកម្ម សម្រាប់ផលិតកែច្នៃថង់ប្លាស្ទិក ចំនួន ២គ្រឿង ព្រមទាំងខូចខាតសំណង់ជាឃ្លាំងស្ដុកសម្ភារ ទំហំ ២៥ម៉ែត្រ x ៣០ម៉ែត្រ ស្ទើរទាំងស្រុង។ ប៉ុន្តែមិនបង្ករបួស ឬគ្រោះថ្នាក់ដល់អាយុជីវិតបុគ្គលិកកម្មករណាម្នាក់ឡើយ ព្រោះកម្មករត្រូវបានអនុញ្ញាតឱ្យឈប់សម្រាក ដើម្បីធ្វើដំណើរទៅចូលរួមបោះឆ្នោតឃុំ-សង្កាត់។
លោកថ្លែងថា៖«គ្រោះអគ្គិភ័យនេះ ក៏មិនបង្កការឆេះរាលដាលដល់ផ្ទះប្រជាពលរដ្ឋផ្សេងទៀត នៅក្នុងតំបន់នោះដែរ ព្រោះក្រុមកម្លាំងកងពន្លត់អគ្គិភ័យរាជធានីភ្នំពេញយើង បានជួយអន្តរាគមន៍បាញ់ទឹកទប់ស្កាត់ផង និង បាញ់ពន្លត់ផង ទៅតាមបច្ចេកទេសរបស់ខ្លួនបានយ៉ាងល្អ»។
លោកបានបញ្ជាក់ថា៖«តាមការពិនិត្យ និងសួរនាំសាក្សីនៅកន្លែងកើតហេតុ ដែលរួមទាំងម្ចាស់រោងសិប្បកម្មនោះ គ្រោះអគ្គិភ័យនេះបង្កឡើងមកពីការផ្ទុះឆ្លងចរន្តអគ្គិសនី»។
បើតាមលោកព្រហ្ម យ៉ន ប្រតិបត្តិការពន្លត់អគ្គិភ័យខាងលើនេះ កម្លាំងសមត្ថកិច្ចបានប្រើរយៈពេល២ម៉ោង ទើបរលត់អស់ទាំងស្រុង ដោយប្រើប្រាស់រថយន្តពន្លត់អគ្គិភ័យសរុប១៦គ្រឿង និងប្រើប្រាស់ទឹកអស់ ៦៤ ម៉ែត្រគុប។
យោងតាមទិន្នន័យដែលទទួលបានពីនាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះនៃក្រសួងមហាផ្ទៃ ក្នុងរយៈពេល ៥ ខែ ដើមឆ្នាំ ២០២២ នេះ គ្រោះអគ្គិភ័យ បានបណ្ដាលឱ្យមានជនរងគ្រោះស្លាប់ចំនួន ១១ នាក់ និង ៣១ នាក់ទៀតរងរបួស ព្រមទាំងឆេះខូចខាតផ្ទះ សរុប៤០០ខ្នង និងតូបលក់ដូរចំនួន ៤០តូប រួមទាំងទ្រព្យសម្បត្តិមួយចំនួនធំ៕
វីដេអូ៖