.jpg)
ប៉ាណូប្រកាសពីការសិក្សានៅប្រទេសជប៉ុន។ រូបថត OJEIC Cambodia
ភ្នំពេញៈ ការិយាល័យសិក្សានៅប្រទេសជប៉ុន សម្រាប់អាស៊ានប្រចាំរាជធានីភ្នំពេញ នឹងត្រូវបើកដំណើរការជាផ្លូវការនៅមជ្ឈមណ្ឌលសហប្រតិបត្តិការ កម្ពុជា-ជប៉ុន (CJCC) រាជធានីភ្នំពេញ នាថ្ងៃទី៦ ខែមិថុនា។
ការិយាល័យសិក្សានេះ នឹងរៀបចំកម្មវិធីសិក្ខាសាលាពិសេសនៅកម្ពុជា សម្រាប់ការសិក្សានៅប្រទេសជប៉ុន តាមអនឡាញ និងដោយផ្ទាល់ ដើម្បីអបអរសាទរ និងរំឭកដល់ការបើកសម្ពោធការិយាល័យសិក្សានេះ។
ទំព័រហ្វេសប៊ុក OJEIC Cambodia/Study in Japan Global Network Project - ASEAN for Cambodia ឬហៅថា «គម្រោងបណ្តាញសកលនៃការសិក្សានៅប្រទេសជប៉ុននៅអាស៊ាន)»បញ្ជាក់កាលពីថ្ងៃទី៣០ ខែឧសភា និងត្រូវបានចែករំលែកបន្ត(Share) ដោយស្ថានទូតជប៉ុនប្រចាំកម្ពុជា នាថ្ងៃទី៤ មិថុនា ថា៖«នៅទីបំផុត បន្ទាប់ពីរង់ចាំអស់រយៈពេលយ៉ាងយូរ ការិយាល័យសិក្សានៅប្រទេសជប៉ុន សម្រាប់អាស៊ាន ប្រចាំនៅភ្នំពេញ នឹងបើកដំណើរការ ជាផ្លូវការ នៅ RUPP/CJCC នៅថ្ងៃទី៦ ខែមិថុនា ឆ្នាំ២០២២ខាងមុខនេះ!»។
ហ្វេសប៊ុកដដែលបញ្ជាក់ថា៖«យើងនឹងផ្តល់វិញ្ញាបនបត្រពិសេស សម្រាប់អ្នកដែលបានចូលរួមសិក្ខាសាលាផ្ទាល់នៅសាលអង្គរ-គីហ្សូណា [នៅ CJCC] និងជាសាក្សី ក្នុងការបើកសម្ពោធ នៃការិយាល័យសិក្សានៅប្រទេសជប៉ុន សម្រាប់អាស៊ាន ភ្នំពេញ»។
សិក្ខាសាលានេះ នឹងត្រូវបានបើកឱ្យចូលរួម ដោយសេរី ដោយមានកម្មវិធីបង្ហាញ នូវព័ត៌មានអំពីការសិក្សា និងអាហារូបករណ៍នៅប្រទេសជប៉ុន និងការណែនាំអំពីសាកលវិទ្យាល័យនានា របស់ជប៉ុន និងការចែករំលែកបទពិសោធអំពីការសិក្សានៅប្រទេសជប៉ុន។
សាកលវិទ្យាល័យអូកាយ៉ាម៉ា (Okayama University) របស់ជប៉ុនត្រូវបានចាត់តាំងឱ្យអនុវត្ត «គម្រោងបណ្តាញសកលការសិក្សានៅប្រទេសជប៉ុន នៅអាស៊ាន» ដោយក្រសួងអប់រំ វប្បធម៌ កីឡាវិទ្យាសាស្ត្រ និងបច្ចេកវិទ្យា(MEXT) របស់ជប៉ុន នៅឆ្នាំ២០១៩ ក្នុងគោលបំណងបង្កើនចំនួននិស្សិតអន្តរជាតិពីអាស៊ាន ១,៥ដងក្នុងរយៈពេល៥ឆ្នាំ៕
