បន្ទាយមានជ័យៈ ប្រជាកសិករនិងអាជ្ញាធរមូលដ្ឋានក្នុងឃុំសឿ ស្រុកមង្គលបូរី ខេត្តបន្ទាយមានជ័យ បានអំពាវនាវសុំកិច្ចអន្តរាគមន៍ ពីមន្ត្រីជំនាញ នៃអង្គភាពពាក់ព័ន្ធ ជួយបូមទឹកបញ្ចូលស្រែ ដើម្បីសង្គ្រោះស្រូវពង្រោះ របស់ពួកគាត់ប្រមាណជិត ២ ០០០ហិកតា ដែលកំពុងប្រឈមការខ្វះទឹកស្រោចស្រព។
លោក ជា ទី មេឃុំសឿ បានប្រាប់ភ្នំពេញប៉ុស្តិ៍ថា ដីស្រែស្រូវពង្រោះ ដើមរដូវរបស់ប្រជាកសិករ ក្នុងឃុំរបស់គាត់ ប្រមាណ១ ៧០០ហិកតា កំពុងប្រឈមខ្វះទឹក ដោយសារមានការបិទខ្ទប់មុខទឹកមួយកន្លែង ស្ថិតក្នុងឃុំព្រៃខ្ពស់ ស្រុកបវេល ខេត្តបាត់ដំបង ដើម្បីស្ថាបនាជួសជុលឡើងវិញ នូវសំណង់ស្ទាក់ទឹកអូរសណ្ដាន់ ដែលរងការខូចខាតដោយគ្រោះជំនន់ទឹកភ្លៀងកាលពីឆ្នាំមុន។
លោកថ្លែងថា៖«តាមគម្រោងសំណង់នោះ អាចនឹងស្ថាបនារួចក្នុងរយៈពេល២ខែទៀត ប៉ុន្តែបើបន្តបិទខ្ទប់ទឹកមិនឱ្យហូរចូលតាមប្រឡាយមេ មកកាន់តំបន់ដីស្រែរបស់កសិករយើងនៅឃុំសឿទេនោះ ស្រូវរបស់កសិករយើង ប្រមាណជិត២ ០០០ហិកតានេះ នឹងរងការខូចខាតអស់ ដោយសាខ្វះទឹកស្រោចស្រព ព្រោះសណ្ឋានដីប្រជាកសិករយើងខ្ញុំស្ថិតនៅតំបន់ទីទួល និងខ្វះប្រភពទឹក»។
បើតាមលោក ជា ទី ថ្មីៗនេះ ប្រជាកសិករ បានដាក់សំណើទៅរដ្ឋបាលឃុំសឿ ដើម្បីឱ្យជួយអន្តរាគមន៍ ទៅអង្គភាពមន្ទីរធនធានទឹក និងឧតុនិយម និងមន្ទីរកសិកម្ម ខេត្តបន្ទាយមានជ័យ ជួយបូមទឹកពីប្រព័ន្ធអូរ ព្រែក ស្ទឹង បឹងធម្មជាតិមួយចំនួន ចាក់ទៅក្នុងប្រព័ន្ធប្រឡាយមេ ដើម្បីឱ្យប្រជាកសិករ អាចបូមទឹកបន្តទៅជួយសង្គ្រោះស្រូវរបស់ពួកគាត់ផង និង ដើម្បីឱ្យដំណើការស្ថាបនាជួសជុលសំណង់ស្ទាក់ទឹកអូរសណ្ដាន់ អាចប្រព្រឹត្តទៅបានសម្រេចតាមផែនការដែលបានគ្រោងទុក។
ជុំវិញករណីនេះ លោក ឡាយ ពុទ្ធី អនុប្រធានមន្ទីរធនធានទឹក និង ឧតុនិយម ខេត្តបន្ទាយមានជ័យ បានថ្លែងថា នៅពេលនេះ ក្រុមការងារនៃមន្ទីរធនធានទឹក បានចល័តម៉ាស៊ីនបូមទឹកចំនួន៤គ្រឿង ដែលមានកម្លាំង៦៥សេះ ចុះជួយអន្តរាគមន៍បូមទឹកទម្លាក់ចូលតាមប្រឡាយមេ ដើម្បីឱ្យប្រជាកសិករ មានទឹកបូមបញ្ចូលស្រូវដែលកំពុងខ្វះទឹក នៅទូទាំងឃុំនោះហើយ និងបានអំពាវនាវសុំឱ្យប្រជាកសិករ យកចិត្តទុកដាក់ស្ដាប់និងអនុវត្តតាមការណែនាំរបស់មន្ត្រីជំនាញ នៅក្នុងការដាំដុះនិងថែទាំស្រូវរដូវវស្សានេះ ឱ្យបានច្បាស់លាស់ ដើម្បីចៀសវាងផលប៉ះពាល់និងខូចខាត ដោយគ្រោះជំនន់ទឹកភ្លៀង និង គ្រោះរាំងស្ងួត។
លោកថ្លែងថា៖«មន្ត្រីជំនាញយើង កំពុងជួយអន្តរាគមន៍បូមទឹកជួយសង្គ្រោះស្រូវរបស់ពួកគាត់ហើយ ប៉ុន្តែយើងចង់ឱ្យពួកគាត់ ចូលរួមអនុវត្តតាមការណែនាំរបស់យើងផងដែរ គឺអ្នកដីស្រែនៅទីទួល ត្រូវចេះទប់ទឹករក្សាទុក ហើយអ្នកមានដីស្រែនៅទីទំនាប ត្រូវប្រើម៉ាស៊ីនបូមទឹក ចេញពីដីស្រែ កុំឱ្យទឹកវាជនលិចខ្លាំងពេកងាប់ស្រូវ»។
បើតាមលោក ពុទ្ធី ប្រជាកសិករ ទាំងអ្នកមានដីស្រែនៅទីទួល និង ទីទំនាប មិនបានអនុវត្តតាមការណែនាំរបស់មន្ត្រីជំនាញនោះទេ ដោយពួកគាត់បាននាំគ្នាកាយភ្លឺស្រែបង្ហូរទឹកចេញពីក្នុងស្រែអស់ៗតែម្ដង ដោយមិនគិតអំពីផលអវិជ្ជមាន នៅពេលមេឃរាំងភ្លៀងនោះទេ។ នេះជាមូលហេតុ ដែលពួកគាត់មានដីស្រែនៅទីទួលខ្ពស់ ជួបប្រឈមការខ្វះទឹក។
ថ្វីបើយ៉ាងដូច្នេះក្ដី លោក ប៉ាង វណ្ណាសេដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តបន្ទាយមានជ័យ បាននិយាយថា មកទល់ពេលនេះ មិនមានស្រូវដើមរដូវវស្សានៅតំបន់ណាមួយ ក្នុងខេត្តនេះ រងការខូចខាតដោយករណីខ្វះទឹកនោះទេ ដោយសារមានភ្លៀងធ្លាក់ ស្ទើរគ្រប់កន្លែង បើទោះជាក្នុងកម្រិតខ្សោយក៏ដោយ។ ប៉ុន្តែមានករណីខូចខាតស្រូវពង្រោះ អស់ជាង២ ០០០ហិកតា ដោយគ្រោះជំនន់ទឹកភ្លៀង នៅក្នុងឃុំចំនួន៣ គឺ ឃុំចំណោម ឃុំប្រាសាទ និង ឃុំរហាត់ទឹក នៃស្រុកមង្គលបូរី កាលពីដើមរដូវវស្សាថ្មីៗនេះ ៕