.jpg)
និស្សិតជិត ៤០ នាក់ ដែលមកពីសាកលវិទ្យាល័យក្នុងប្រទេសកម្ពុជា នៅមជ្ឈមណ្ឌល AmCam កាលពីថ្ងៃទី ២៤ ខែឧសភា។ រូបថត ស្ថានទូតសហរដ្ឋអាមេរិក
ភ្នំពេញៈ សហរដ្ឋអាមេរិកប្រកាសប្តេជ្ញាចិត្តក្នុងការពិភាក្សាគ្នាដោយបើកចំហជាមួយយុវជនកម្ពុជា និងពង្រីកទំនាក់ទំនងយូរអង្វែងរវាងសហរដ្ឋអាមេរិក និងប្រជាជននៅតំបន់អាស៊ីអាគ្នេយ៍ ស្របពេលកម្ពុជាធ្វើជាប្រធានអាស៊ាននៅឆ្នាំ ២០២២ នេះ។
ស្ថានទូតសហរដ្ឋអាមេរិកបានឱ្យដឹងតាមរយៈហ្វេសប៊ុកនាថ្ងៃទី ៣ ខែមិថុនាថា លេខាទី១ នៃស្ថានទូតអាមេរិកប្រចាំកម្ពុជា និងជាអ្នកសម្របសម្រួលកិច្ចការអាស៊ាន លោកស្រី Bic Leu បានថ្លែងទៅកាន់និស្សិតជិត ៤០ នាក់ ដែលមកពីសាកលវិទ្យាល័យក្នុងប្រទេសកម្ពុជា នៅមជ្ឈមណ្ឌល AmCam របស់ស្ថានទូតអាមេរិក កាលពីថ្ងៃទី ២៤ ខែឧសភា។ ប្រធានបទនៃកិច្ចពិភាក្សានេះ គឺស្តីអំពីភាពជាដៃគូជាយុទ្ធសាស្ត្ររវាងសហរដ្ឋអាមេរិក និងសមាគមអាស៊ាន និងកិច្ចប្រជុំកំពូលពិសេសរវាងសហរដ្ឋអាមេរិក និងសមាគមអាស៊ានកាលពីខែឧសភានៅទីក្រុងវ៉ាស៊ីនតោន ដែលរៀបចំដោយប្រធានាធិបតីសហរដ្ឋអាមេរិក លោក Joe Biden។
ស្ថានទូតអាមេរិកបញ្ជាក់ថា និស្សិតដែលចូលរួមកិច្ចពិភាក្សានេះបានសួរសំណួរ «ល្អណាស់» ទៅកាន់លោកស្រី Bic Leu ស្តីពីអនាគតនៃទំនាក់ទំនងរវាងសហរដ្ឋអាមេរិក និងសមាគមអាស៊ាន។ ហ្វេសប៊ុកដដែលបញ្ជាក់ថា៖ «សហរដ្ឋអាមេរិកមានការប្តេជ្ញាចិត្ត ចំពោះការពិភាក្សាគ្នាដោយបើកចំហជាមួយយុវជនកម្ពុជា។ ក្នុងពេលដែលប្រទេសកម្ពុជាធ្វើជាប្រធានអាស៊ាននៅឆ្នាំ ២០២២ នេះ យើងសូមអបអរទំនាក់ទំនងយូរអង្វែងរវាងសហរដ្ឋអាមេរិក និងប្រជាជននៅតំបន់អាស៊ីអាគ្នេយ៍»។
លោក ហេង គីមគង់ អ្នកស្រាវជ្រាវជាន់ខ្ពស់នៃមជ្ឈមណ្ឌលអភិវឌ្ឍន៍កម្ពុជាថ្លែងថា វាគឺជាការប្រសើរដែលឃើញសកម្មភាពតភ្ជាប់ទំនាក់ទំនងរបស់អាមេរិក ជាពិសេសជាមួយយុវជនកម្ពុជាដែលជាក្តីសង្ឃឹម និងអនាគតរបស់កម្ពុជា។ ការពិភាក្សាដោយបើកចំហនេះនឹងអនុញ្ញាតឱ្យយុវជនកម្ពុជាលើកឡើងនូវកង្វល់ និងបំណងប្រាថ្នារបស់ពួកគេសម្រាប់ប្រទេសកម្ពុជា៕
