.jpg)
ជំនួបរវាងភាគីកម្ពុជា វៀតណាម និងឡាវតាមវីដេអូពីថ្ងៃទី ៣ មិថុនា។ រូបថត WWF
ភ្នំពេញៈ ប្រទេសក្នុងតំបន់ចំនួន ៣ គឺកម្ពុជា វៀតណាម និងឡាវ បានឯកភាពគ្នាចាត់វិធានការអនុវត្តការដាក់ទោសទណ្ឌឱ្យមានប្រសិទ្ធភាពចំពោះជនល្មើសសត្វព្រៃ និងបានប្រកាសប្តេជ្ញាចាត់ទុកបទល្មើសនេះថា ជាឧក្រិដ្ឋកម្មធ្ងន់ធ្ងរ ខណៈចំនួនករណីបទល្មើសសត្វព្រៃដែលបានឈានដល់តុលាការនៅប្រទេសទាំង ៣ នេះមានកម្រិតទាប។
តំណាងអង្គការមូលនិធិសត្វព្រៃពិភពលោក ប្រចាំកម្ពុជា (WWF) កាលពីថ្ងៃទី ២-៣ ខែមិថុនា បានចូលរួមក្នុងសន្និសីទថ្នាក់តំបន់ស្តីពីយុត្តិធម៌សម្រាប់ឧក្រិដ្ឋកម្មសត្វព្រៃ (Justice for Wildlife Crime) ដែលធ្វើឡើងនៅតុលាការកំពូលកម្ពុជា និងតាមប្រព័ន្ធវីដេអូ។
ក្នុងសន្និសីទរយៈពេល ២ ថ្ងៃនេះ ចៅក្រម និងព្រះរាជអាជ្ញានៃប្រទេសទាំង ៣ បានមកចូលរួមពិភាក្សាអំពីបទល្មើសសត្វព្រៃ ដោយសារចំនួនករណីបទល្មើសដែលបានឈានដល់តុលាការមានកម្រិតទាប។
យោងតាមសេចក្តីប្រកាសព័ត៌មានរបស់អង្គការ WWF ប្រចាំកម្ពុជា កាលពីថ្ងៃទី ៣ ខែមិថុនា បានឱ្យដឹងថា តុលាការកំពូលជាតិចំនួន ៣ នៃប្រទេសកម្ពុជា វៀតណាម និងឡាវបានជួបប្រជុំគ្នា ដើម្បីពិភាក្សាលើការកាត់ទោសឧក្រិដ្ឋកម្មសត្វព្រៃ ដោយចាត់ទុកថា ជាឧក្រិដ្ឋកម្មដែលមានការរៀបចំយ៉ាងធ្ងន់ធ្ងរនៅក្នុងមហាទន្លេមេគង្គ និងកំណត់ផ្លូវឆ្ពោះទៅរកភាពប្រសើរឡើងនៃយុត្តិធម៌សម្រាប់សត្វព្រៃ។
សន្និសីទ ដែលសហការរៀបចំដោយតុលាការកំពូលប្រជាជនឡាវ និងក្រសួងកសិកម្ម និងរុក្ខាប្រមាញ់ឡាវត្រូវបានកោះប្រជុំ ដើម្បីពង្រឹងការអនុវត្តច្បាប់ ការកាត់ទោស និងអត្រាផ្តន្ទាទោសចំពោះឧក្រិដ្ឋកម្មសត្វព្រៃនៅក្នុងតំបន់។
អនុប្រធានតុលាការកំពូលប្រជាជនឡាវ លោក ខាំផាញ ប៊ុនខាខុម បានឱ្យដឹងថា នេះជាលើកទី ១ ហើយដែលតុលាការបានរៀបចំព្រឹត្តិការណ៍ដែលជាសមត្ថភាពដ៏សំខាន់លើការគាំទ្រកិច្ចសហប្រតិបត្តិការក្នុងការកាត់ទោសឧក្រិដ្ឋកម្មសត្វព្រៃ។
លោកបានលើកឡើងថា៖ «យើងមានសេចក្តីសោមនស្សរីករាយដែលបានឮថា សមភាគីរបស់យើងនៅកម្ពុជា និងវៀតណាមក៏ប្តេជ្ញាពង្រឹងកិច្ចសហប្រតិបត្តិការទៅវិញទៅមករបស់យើងលើយុត្តិធម៌សម្រាប់សត្វព្រៃ ហើយខ្ញុំសង្ឃឹមថា យើងអាចបន្តប្រើប្រាស់យន្តការដែលមានស្រាប់ ដើម្បីចែករំលែកបទពិសោធ និងមេរៀនរបស់យើងក្នុងវិស័យតុលាការ ដើម្បីប្រយុទ្ធប្រឆាំងការជួញដូរសត្វព្រៃហើយចាត់ទុកវាជាឧក្រិដ្ឋកម្មធ្ងន់ធ្ងរ»។
ចំណែកលោក JedsadaTaweekan អ្នកគ្រប់គ្រងពាណិជ្ជកម្មសត្វព្រៃខុសច្បាប់ក្នុងតំបន់សម្រាប់ WWF-Greater Mekong បានលើកឡើងដែរថា លោកបាននិងកំពុងធ្វើការ ដើម្បីជួយកែលម្អការសម្របសម្រួល និងកិច្ចសហប្រតិបត្តិការរវាងភ្នាក់ងារអនុវត្តច្បាប់ទាំងក្នុងប្រទេស និងឆ្លងព្រំដែន ហើយលោកបានទទួលស្គាល់ពីតួនាទីសំខាន់ដែលព្រះរាជអាជ្ញា និងតុលាការត្រូវធ្វើ និងយកចិត្តទុកដាក់ខ្លាំងលើបទល្មើសសត្វព្រៃឱ្យដូចនឹងបទល្មើសគ្រឿងញៀន និងការជួញដូរមនុស្សដែរ។
លោកបានឱ្យដឹងថា៖ «យើងមានសេចក្តីសោមនស្សរីករាយដែលចៅក្រមមកពីតុលាការកំពូលនៃប្រទេសទន្លេមេគង្គទាំង ៣ កំពុងបង្ហាញពីការប្តេជ្ញាចិត្តរបស់ពួកគេក្នុងការកែលម្អការកាត់ទោសឧក្រិដ្ឋកម្មសត្វព្រៃ និងផ្ញើសារច្បាស់លាស់ទៅកាន់ប្រទេសរបស់ពួកគេ និងសហគមន៍អាស៊ានធំៗថា ពួកគេចាត់ទុកឧក្រិដ្ឋកម្មសត្វព្រៃជាឧក្រិដ្ឋកម្មធ្ងន់ធ្ងរ»។
នាយកអង្គការ WWF-កម្ពុជា លោក សេង ទៀក បានឱ្យដឹងថា កិច្ចសហប្រតិបត្តិការល្អរវាងប្រទេសជិតខាង ដើម្បីដោះស្រាយឧក្រិដ្ឋកម្មសត្វព្រៃតាមរយៈប្រព័ន្ធតុលាការដ៏មានប្រសិទ្ធភាពអាចលុបបំបាត់បណ្តាញជួញដូរសត្វព្រៃខុសច្បាប់ និងសមាគមសត្វព្រៃផងដែរ។
លោកថា ឧក្រិដ្ឋកម្មសត្វព្រៃឆ្លងដែនមិនត្រឹមតែបំផ្លាញកិច្ចខិតខំប្រឹងប្រែងនូវការអភិរក្សប៉ុណ្ណោះទេ ប៉ុន្តែវាថែមទាំងគំរាមកំហែងយ៉ាងធ្ងន់ធ្ងរដល់សន្តិសុខជាតិ វិបុលភាពសេដ្ឋកិច្ច និងសុខភាពសាធារណៈផងដែរ។
លោក សេង ទៀក បានបញ្ជាក់ថា៖ «អង្គការ WWF ត្រៀមខ្លួនរួចជាស្រេចក្នុងការធ្វើការជាមួយប្រព័ន្ធយុត្តិធម៌នៃប្រទេសកម្ពុជាក្នុងការពង្រឹងឧបករណ៍ផ្លូវច្បាប់ និងការបង្កើនការកាត់ទោសដែលនាំឱ្យមានការកាត់ទោសកាន់តែធ្ងន់ធ្ងរចំពោះជនល្មើសនៃឧក្រិដ្ឋកម្មសត្វព្រៃអន្តរជាតិ»៕
