ភ្នំពេញៈ លោក Christian Berger ឯកអគ្គរដ្ឋទូតអាល្លឺម៉ង់ប្រចាំកម្ពុជាបានប្តេជ្ញានឹងពង្រីកកិច្ចសហប្រតិបត្តិការនៅកម្ពុជាបន្ថែមទៀត ដើម្បីជំរុញការងារកំណែទម្រង់វិមជ្ឈការ និងវិសហមជ្ឈការឱ្យមានវឌ្ឍនភាពតទៅមុខ។ ការប្តេជ្ញាចិត្តនេះធ្វើឡើងនៅថ្ងៃទី ២ មិថុនា ក្នុងជំនួបរវាងលោក ស ខេង រដ្ឋមន្ត្រីក្រសួងមហាផ្ទៃ និងលោក Christian Berger ដែលនឹងត្រូវចប់បេសកកម្មឆាប់ៗក្នុងពេលខាងមុខ។
យោងតាមសេចក្ដីប្រកាសព័ត៌មានរបស់ក្រសួងមហាផ្ទៃចេញផ្សាយកាលពីថ្ងៃទី ២ ខែមិថុនា បានឱ្យដឹងថា លោក ស ខេង បានរំឭកថា ក្នុងអាណត្តិការទូតរបស់ឯកអគ្គរដ្ឋទូតនៅកម្ពុជា ពិតជាមានទំនាក់ទំនងការងារជាមួយភាគីទាំង ២ យ៉ាងល្អប្រសើរ ព្រមទាំងមានអនុស្សាវរីយ៍ជាមួយគ្នាយ៉ាងច្រើនពាក់ព័ន្ធនឹងទស្សនកិច្ចសិក្សា និងការចុះទៅកាន់មូលដ្ឋាននានា ដើម្បីពិនិត្យការងារពាក់ព័ន្ធដែលគាំទ្រដោយអាល្លឺម៉ង់ ក៏ដូចជាដៃគូមកពីប្រទេសនានានៃសហភាពអឺរ៉ុប។
លោក ស ខេង ជឿជាក់ថា ការធ្វើទស្សនកិច្ចរវាងភាគីទាំង ២ កន្លងមកនឹងក្លាយជាការអនុវត្តជាក់ស្តែងលើការងារកំណែទម្រង់វិមជ្ឈការ និងវិសហមជ្ឈការ ដោយសារការងារនេះពិតជាមានសារៈសំខាន់ដែលរដ្ឋាភិបាលកម្ពុជាបានខិតខំពុះពារ និងប្រឹងប្រែងនាពេលកន្លងមក។ ខណៈ លោក Berger បានបង្ហាញក្តីរីករាយលើការងារកំណែទម្រង់វិមជ្ឈការ និងវិសហមជ្ឈការ ពីព្រោះអាល្លឺម៉ង់ក៏ជាប្រទេសមួយដែលមានបទពិសោធយូរឆ្នាំក្នុងកិច្ចការនេះដែរ។
សេចក្តីប្រកាសព័ត៌មានបញ្ជាក់ថា៖ «ឯកឧត្តម [Berger] ក៏សូមវាយតម្លៃខ្ពស់ចំពោះការយកចិត្តទុកដាក់ក្នុងការអនុវត្តការងារវិមជ្ឈការ និងវិសហមជ្ឈការ ដំណាក់កាលទី ២ បន្តទៀត ផ្អែកលើការងារវិមជ្ឈការ និងវិសហមជ្ឈការដ៏មានសារៈសំខាន់នេះ ឯកឧត្តមនឹងបន្តធ្វើការងារជាមួយឯកអគ្គរដ្ឋទូតថ្មីដែលនឹងត្រូវបន្តការងារ ដើម្បីធ្វើយ៉ាងណាពង្រីកកិច្ចសហប្រតិបត្តិការរវាងប្រទេសទាំង ២ បន្ថែមទៀត ដើម្បីជំរុញកិច្ចការងារនេះឱ្យមានវឌ្ឍនភាពតទៅមុខ»។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពប្រាប់ភ្នំពេញប៉ុស្តិ៍នាថ្ងៃទី ៥ ខែមិថុនា ថា អាល្លឺម៉ង់កន្លងមកតែងតែគាំទ្រកិច្ចការងារវិមជ្ឈការ និងវិសហមជ្ឈការនៅកម្ពុជា។
លោកថា៖ «ប្រសិនបើអាល្លឺម៉ង់មានការគាំទ្រកិច្ចការនេះជាបន្តទៀតវាគឺជាប្រការល្អដែលអាចនឹងជួយពង្រឹងការចូលរួមរបស់ប្រជាពលរដ្ឋនៅក្នុងការអភិវឌ្ឍឃុំសង្កាត់ និងជួយកសាងសមត្ថភាពឃុំសង្កាត់ក្នុងការអនុវត្តអំណាចវិមជ្ឈការរបស់ខ្លួន»៕