ភ្នំពេញៈ តុលាការកំពូលនៅព្រឹកថ្ងៃទី ៦ មិថុនា បានប្រកាសសាលដីកាកំបាំងមុខ ជនជាប់ចោទជនជាតិជប៉ុនម្នាក់ និងមេធាវីរបស់គាត់ ដោយសម្រេចតម្កល់ទោស ២៥ ឆ្នាំដដែលរបស់សាលាឧទ្ធរណ៍ បន្ទាប់ពីជំនុំជម្រះកាលពីថ្ងៃទី ៣០ ឧសភា ឆ្នាំ ២០២២ ពាក់ព័ន្ធគ្រឿងញៀនមេតំហ្វេតាមីនទម្ងន់ជិត ២ គីឡូក្រាម។
លោកចៅក្រម សេង នាង បានអានសាលដីកាក្នុងបន្ទប់សវនាការកំបាំងមុខជនជាប់ចោទនៅថ្ងៃទី ៦ មិថុនា ថា កាលពីថ្ងៃទី ៣០ ឧសភា ឆ្នាំ ២០២២ តុលាការកំពូលបានបើកសវនាការជំនុំជម្រះ សំណុំរឿងគ្រឿងញៀនរបស់ជនជាប់ចោទឈ្មោះ NONAKA SHUNICHI អាយុ ៧៣ ឆ្នាំជាជនជាតិជប៉ុន។
លោកចៅក្រមថ្លែងក្នុងបន្ទប់សវនាការជាសាធារណៈថា៖ «តុលាការកំពូលអានតែសេចក្តីសម្រេច ពីការប្រកាសសាលដីកានេះតែប៉ុណ្ណោះ។ តុលាការកំពូល សម្រេចតម្កល់សាលដីការបស់សាលាឧទ្ធរណ៍ ដែលប្រកាសនៅថ្ងៃទី ២៨ ខែ កញ្ញា ឆ្នាំ ២០២១ ទុកជាបានការដដែល»។
គួររំឭកថា កាលពីថ្ងៃទី ៣០ ឧសភា ឆ្នាំ ២០២២ ដែលជាថ្ងៃបើកសវនាការ ជនជាប់ចោទឈ្មោះ NONAKA SHUNICHI បាននិយាយប្រាប់ចៅក្រមថា គិតដល់ឆ្នាំ ២០២២ នេះ គាត់មានអាយុ៧៣ ឆ្នាំ ហើយក៏មានវ័យចំណាស់ដែរ។ ម្យ៉ាងទៀតគាត់មានកូនចំនួន ៤ នាក់ និងមានប្រពន្ធដែលគាត់ត្រូវរកចំណូលផ្គត់ផ្គង់ជីវភាពគ្រួសារ និងមានឪពុកម្តាយចាស់ជរាផង។
ជនជាប់ចោទ SHUNICHI បានទទូចស្នើសុំដល់តុលាការថា៖ «ខ្ញុំស្នើសុំតុលាការកំពូលមេត្តាបង្វិលសំណុំរឿងទៅសាលាឧទ្ធរណ៍ភ្នំពេញដើម្បីជំនុំជម្រះឡើងវិញ។ ខ្ញុំមានកូនប្រុសម្នាក់ត្រូវប្រឡងនៅប្រទេសជប៉ុន ហើយខ្ញុំជាឪពុកចង់ផ្តល់កម្លាំងចិត្តឱ្យគេនៅពេលដែលគេឃើញវត្តមានរបស់ខ្ញុំ»។
តាមអង្គហេតុបង្ហាញថា កាលពីដើមខែអំឡុងខែកុម្ភៈ ឆ្នាំ ២០២០ ជនជាប់ចោទបានធ្វើដំណើរពីប្រទេសជប៉ុន មកកម្ពុជា ដើម្បីជួបជាមួយបុរសបរទេសម្នាក់នៅប្រទេសកម្ពុជា ដើម្បីពិភាក្សាពីជំនួញ។ បន្ទាប់មកគាត់បានស្នាក់នៅសណ្ឋាគារមួយក្នុងរាជធានីភ្នំពេញ ហើយអំឡុងពេលស្នាក់នៅនោះក៏មានបុរសជនជាតិថៃម្នាក់បានផ្ញើវ៉ាលិស ១ តាមរយៈគាត់ ដើម្បីយកទៅឱ្យសាច់ញាតិរបស់គេ ដែលរស់នៅក្នុងប្រទេសជប៉ុន។
អង្គហេតុបន្តថា លុះដល់យប់ថ្ងៃទី ១៥ ខែ កុម្ភៈ ឆ្នាំ ២០២០ ជនជាប់ចោទបានយួរវ៉ាលិសចំនួន ២ ចូលក្នុងព្រលានយន្តហោះអន្តរជាតិភ្នំពេញបម្រុងជិះយន្តហោះទៅប្រទេសជប៉ុន។ ប៉ុន្តែពេលជនជាប់ចោទកំពុងមានវត្តមានក្នុងព្រលានយន្តហោះ មន្ត្រីគយ និងនគរបាលប្រចាំព្រលានយន្តហោះអន្តរជាតិភ្នំពេញ មានការសង្ស័យទៅលើវ៉ាលិស ដែលជនជាប់ចោទកំពុងយួរ។ ពេលនោះសមត្ថកិច្ចគយបានហៅជនជាប់ចោទ ដើម្បីសុំពិនិត្យវ៉ាលិស។ ក្រោយឆែកឆេរ សមត្ថកិច្ចបានរកឃើញម្សៅគ្រឿងញៀនមេតំហ្វេតាមីន ៥ ដុំ ទម្ងន់ ១ ៧០៥,៨៥ ក្រាមដាក់សៀតក្នុងវ៉ាលិស។ បន្ទាប់មក ជនជាប់ចោទត្រូវបានសមត្ថកិច្ចឃាត់ខ្លួន និងបញ្ជូនទៅមន្ទីរប្រឆាំងគ្រឿងញៀន ដើម្បីសាកសួរបន្ត។
សំណុំរឿងនេះ ត្រូវបានសាលាដំបូងរាជធានីភ្នំពេញបើកសវនាការ និងប្រកាសសាលក្រមនៅថ្ងៃទី ១៥ កញ្ញា ឆ្នាំ ២០២០ ផ្តន្ទាទោសជនជាប់ចោទដាក់ពន្ធនាគារ ២៥ ឆ្នាំ និងពិន័យប្រាក់ចំនួន ៤០ លានរៀលចូលថវិការដ្ឋ ចោទពីបទជួញដូររក្សាទុក និងដឹកជញ្ជូនដោយខុសច្បាប់នូវសារធាតុញៀន។
ដោយមិនសុខចិត្តនឹងសាលក្រមរបស់សាលាដំបូងរាជធានីភ្នំពេញ ជនជាប់ចោទបានប្តឹងឧទ្ធរណ៍ភ្នំពេញ ហើយត្រូវបានសាលាឧទ្ធរណ៍បើកសវនាការ និងប្រកាសសាលដីកានៅថ្ងៃទី ២៨ ខែកញ្ញា ឆ្នាំ ២០២១ សម្រេចតម្កល់ទោសដដែល៕