.jpg)
រថយន្តដែលជួបគ្រោះថ្នាក់ចរាចរណ៍ធ្លាក់ទឹក បណ្តាលឱ្យស្លាប់មនុស្ស២នាក់ នៅខេត្តព្រៃវែង កាលពីថ្ងៃទី៥ មិថុនា។ រូបថត ហ្វេសប៊ុក
ភ្នំពេញៈ អ្នកជំនាញផ្នែកសុវត្ថិភាពចរាចរណ៍ផ្លូវគោកនិយាយថា ការបណ្ដោយឱ្យកូនក្រោមអាយុ ១៨ ឆ្នាំ បើកបររថយន្តលើដងផ្លូវសាធារណៈ គឺជាការរំលោភបំពានច្បាប់ចរាចរណ៍ដ៏ធ្ងន់ធ្ងរ ដែលធ្វើឱ្យមានសោកនាដកម្ម និងការខាតបង់ធនធានជាច្រើនទៀត ទាំងក្នុងសង្គមគ្រួសារ និងសង្គមជាតិ។
ការលើកឡើងនេះ បន្ទាប់ពីមានគ្រោះថ្នាក់ចរាចរណ៍ក្រឡាប់រថយន្តមួយនៅឃុំក្របៅ ស្រុកកំចាយមារ ខេត្តព្រៃវែង កាលពីថ្ងៃទី ៥ ខែ ឧសភា ឆ្នាំ ២០២២ ដែលបណ្ដាលឱ្យស្លាប់មនុស្ស ២ នាក់។
លោក គង់ រតនៈ អ្នកជំនាញផ្នែកសុវត្តិភាពចរាចរណ៍ផ្លូវគោក ថ្លែងនាថ្ងៃទី ៦ មិថុនា យោងតាមមាត្រា ៨ ថ្មី នៃច្បាប់ស្ដីពីចរាចរណ៍ផ្លូវគោកថា អ្នកដែលអាចបើកបររថយន្តបាន លុះត្រាបានឆ្លងកាត់វគ្គបណ្ដុះបណ្ដាលបើកបររថយន្តនៅតាមសាលាបង្រៀនបើកបររថយន្ត។
អ្នកបើកបរត្រូវបានទទួលស្គាល់ដោយក្រសួងជំនាញ និងបានប្រឡងជាប់បណ្ណបើកបររថយន្ត ជាពិសេស អ្នកមានអាយុចាប់ពី ១៨ ឆ្នាំឡើងទៅសម្រាប់រថយន្តតូចលក្ខណៈគ្រួសារ។ ចាប់ពីអាយុ២២ ឆ្នាំឡើងទៅ សម្រាប់រថយន្តទេសចរណ៍ ដែលមាន ២៥ កៅអីចុះ និងចាប់ពីអាយុ ២៤ ឆ្នាំឡើង សម្រាប់រថយន្តសណ្ដោងរ៉ឺម៉ក និងរថយន្តកុងតឺន័រ។
លោកបញ្ជាក់ថា៖ «ការបណ្ដោយឱ្យកូនៗរបស់ខ្លួនក្រោមអាយុ ១៨ ឆ្នាំ បើករថយន្តនៅតាមផ្លូវសាធារណៈ គឺជាកំហុសឆ្គងដ៏ធំមួយរបស់ឪពុកម្ដាយ និងអាណាព្យាបាល ហើយវាមិនត្រឹមតែបង្កឱ្យមានសោកនាដកម្មនៅក្នុងគ្រួសារប៉ុណ្ណោះទេ ថែមទាំងបង្កការខូចខាតធ្ងន់ធ្ងរដល់សង្គមជាតិផងដែរ»។
លោកបន្តថា ទោះបីច្បាប់ មិនបានចែងអំពីការដាក់ទោសទណ្ឌដល់យុវជន ក្រោមអាយុ ១៨ ឆ្នាំ បើកបររថយន្តតាមដងផ្លូវសាធារណៈ ប៉ុន្តែឪពុកម្ដាយ និងអាណាព្យាបាលរបស់ពួកគេត្រូវជាប់កាតព្វកិច្ចបង់សំណងរដ្ឋប្បវេណី ដល់ជនរងគ្រោះ ឬបង់ផាកពិន័យជូនរដ្ឋ នៅពេលសមត្ថកិច្ចរកឃើញថា ពួកគេមិនគ្រប់អាយុបើកបររថយន្ត ឬបើកបរបង្កគ្រោះថ្នាក់ចរាចរណ៍នៅលើដងផ្លូវដោយមានជនរងគ្រោះ។ ទន្ទឹមនឹងនេះ ពួកគេក៏ជាប់ក្នុងបណ្ដឹងអាជ្ញា ដែលតម្រូវឱ្យមានការអនុវត្តទោស នៅពេលពួកគេគ្រប់អាយុ ១៨ ឆ្នាំផងដែរ ក្នុងករណីពួកគេបង្កគ្រោះថ្នាក់ចរាចរណ៍បណ្ដាលឱ្យមានស្លាប់។
លោក រតនៈ ថ្លែងថា៖ «គ្រោះថ្នាក់ចរាចរណ៍នាពេលបច្ចុប្បន្ន មានការថយចុះ បើធៀបទៅនឹងប៉ុន្មានឆ្នាំមុន មានការរាតត្បាតនៃជំងឺកូវីដ ១៩។ ប៉ុន្តែវានៅតែជាក្ដីព្រួយកង្វល់ ខណៈអ្នកបើកបរយានយន្ត រថយន្ត ឬអ្នកប្រើប្រាស់មធ្យោបាយនៅលើដងផ្លូវសាធារណៈ មានការយល់ដឹងនិងចូលរួមអនុវត្តច្បាប់ចរាចរណ៍តិចតួចនៅឡើយ ហើយមន្ត្រីអនុវត្តច្បាប់នៅមានភាពធូររលុង»។
លោក ខៀវ សុខុម អធិការស្រុកកំចាយមារ ប្រាប់ភ្នំពេញប៉ុស្តិ៍ថា ក្នុងហេតុការណ៍គ្រោះថ្នាក់ចរាចរណ៍នោះ បានបណ្ដាលឱ្យស្ត្រីជាមន្ត្រីនគរបាលម្នាក់ឈ្មោះសួង សុភាក់ អាយុ ២៨ ឆ្នាំ មានទីលំនៅភូមិអណ្ដូងស្អាត ឃុំក្របៅ ស្រុកកំចាយមារ ខេត្តព្រៃវែង និងប្អូនប្រុសរបស់គាត់ ឈ្មោះសួង វិសាល អាយុ ១៥ ឆ្នាំ ជាអ្នកបើកបររថយន្ត បានស្លាប់ នៅពាក់កណ្ដាលផ្លូវក្នុងពេលបញ្ជូនទៅកាន់មន្ទីរពេទ្យ។
លោកថ្លែថា៖ «អ្នកស្រី សួង សុភាក់ ជាមន្ត្រីនគរបាលសកម្មម្នាក់ ហើយគាត់បានស្លាប់ក្នុងដំណើរបំពេញបេសកកម្មការងារ ចុះទៅយាមប្រចាំការ រក្សាសណ្ដាប់ធ្នាប់ និងសន្តិសុខ នៅការិយាល័យបោះឆ្នោត លេខ ០១៦១។ការស្លាប់របស់គាត់ គឺជាការបាត់បង់មន្ត្រីដ៏ល្អម្នាក់របស់អង្គភាពនគរបាលរដ្ឋបាលប៉ុស្តិ៍ឃុំក្របៅ និងជាការបាត់បង់ភរិយា ម្ដាយ បង ប្អូន និងជាកូនល្អម្នាក់នៅក្នុងគ្រួសារ»។
បើតាមលោកអធិការ នៅព្រឹកថ្ងៃទី ៦ ខែមិថុនា ថ្នាក់ដឹកនាំសំខាន់នៃរដ្ឋបាលខេត្តព្រៃវែង ដែលរួមមានអភិបាលខេត្ត ស្នងការខេត្ត មេបញ្ជាការអាវុធហត្ថខេត្ត នឹងថ្នាក់ដឹកនាំនៃរដ្ឋបាលស្រុកកំចាយមារ មានអភិបាលស្រុក និងមេបញ្ជាការនៃកងកម្លាំងប្រដាប់អាវុធទាំង៣ប្រភេទ រួមទាំងមន្ត្រីនៃអង្គភាពពាក់ព័ន្ធមួយចំនួនទៀត បានអញ្ជើញចូលរួមគោរពវិញ្ញាណក្ខន្ធរបស់នាង និងនាំយកថវិកាមួយចំនួនទៅចូលរួមជួយដល់គ្រួសារសព។
លោកបន្តថា អ្នកស្រី សុភាក់ បានបន្សល់ទុកនូវកូនប្រុសស្រី ២ នាក់ ក្នុងនោះកូនប្រុសច្បងមានអាយុជាង ២ ឆ្នាំ និងកូនស្រីមានអាយុជាង ៣ ខែប៉ុណ្ណោះ។
យោងតាមរបាយការណ៍របស់នគរបាលចរាចរណ៍ស្រុកកំចាយមារ គ្រោះថ្នាក់ចរាចរណ៍នោះ អាចបណ្ដាលមកពីកត្តាផ្លូវ និងកត្តាមនុស្ស ដោយហេតុថា នៅចំណុចគ្រោះថ្នាក់ចរាចរណ៍នោះ គឺពុំមានរថយន្ត ម៉ូតូ ឬអ្នកថ្មើរជើងឆ្លងកាត់នោះទេ។ ប៉ុន្តែជាចំណុចផ្លូវកោង ជាផ្លូវគ្រោះក្រហម ដែលងាយនឹងរអិល ធ្លាក់ផ្លូវ ប្រសិនបើអ្នកបើកបរខ្វះការប្រុងប្រយ័ត្ន និងមិនស្គាល់ពីស្ថានភាពផ្លូវគ្រោះថ្នាក់។
ទោះយ៉ាងណា របាយការណ៍នោះ នគរបាលជំនាញមិនបានបញ្ជាក់ថា ជនរងគ្រោះជាប្អូនប្រុស អាយុ ១៥ ឆ្នាំ ដែលជាអ្នកបើកបររថយន្តនោះ មានបណ្ណបើកបររថយន្ត ឬធ្លាប់បានឆ្លងកាត់សាលាបើកបររថយន្តត្រឹមត្រូវដែរ ឬយ៉ាងណានោះទេ។ គ្រាន់តែបញ្ជាក់ពីអត្តសញ្ញាណជនរងគ្រោះទាំង ២ ហើយថា អ្នកភូមិរស់នៅក្បែរកន្លែងកើតហេតុ បានឃើញរថយន្តនោះរេចង្កូតក្រឡាប់ធ្លាក់ចូលទឹក ហើយពួកគេបាននាំគ្នាទៅជួយសង្គ្រោះចេញពីរថយន្ត ដឹកទៅមន្ទីរពេទ្យដែរ តែអកុសលជនរងគ្រោះទាំង២ បានស្លាប់ពេលបញ្ជូនទៅមន្ទីរពេទ្យ។
របាយការណ៍ប្រចាំថ្ងៃស្ដីពីគ្រោះថ្នាក់ចរាចរណ៍របស់នាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ បានបង្ហាញថា គ្រោះថ្នាក់ចរាចរណ៍នៅទូទាំងប្រទេសក្នុងថ្ងៃទី ៥ ខែ មិថុនា ឆ្នាំ ២០២២ បានបណ្ដាលឱ្យមនុស្ស៣នាក់ស្លាប់ និង ៧ នាក់ទៀត បានរងរបួស៕
