ភ្នំពេញៈ ភោជនីយដ្ឋានគ្រឿងសមុទ្រ និងមន្ទីរពហុព្យាបាលអន្តរជាតិខេមា នៅ ២ ទីតាំងផ្សេងគ្នា ក្នុងរាជធានីភ្នំពេញ ត្រូវបានអគ្គិភ័យឆាបឆេះ នៅថ្ងៃទី ៦ ខែមិថុនា ដែលករណីទាំងពីរនេះ ត្រូវបានសមត្ថកិច្ចសន្និដ្ឋានថា បណ្តាលមកពីឆ្លងចរន្តអគ្គិសនី ។
លោក ព្រហ្ម យ៉ន នាយការិយាល័យពន្លត់អគ្គិភ័យរាជធានីភ្នំពេញបានប្រាប់ ភ្នំពេញ ប៉ុស្តិ៍ថា នៅថ្ងៃទី ៦ មិថុនា មានករណីអគ្គិភ័យឆេះ២ទីតាំងផ្សេងគ្នា នៅក្នុងខណ្ឌចំនួន ២។
ការឆេះនេះ សមត្ថកិច្ចកងអន្តរាគមន៍ពន្លត់អគ្គិភ័យ នៃស្នងការដ្ឋាននគរបាលរាជធានីភ្នំពេញ បានជួយអន្តរាគមន៍ពន្លត់ភ្លើងបានទាន់ពេលវេលា ដោយមិនមានការបាត់បង់អាយុជីវិតមនុស្ស ឬរងការខូចខាតព្រទ្យសម្បត្តិច្រើនឡើយ ក្នុង២ទីតាំងនេះ។
លោកថ្លែងថា៖ «ជាលទ្ធផលនៃការស៊ើបអង្កេតស្រាវជ្រាវ របស់សមត្ថកិច្ចជំនាញបញ្ជាក់ថា មូលហេតុនៃការឆេះនេះគឺបណ្តាលមកពីឆ្លងចរន្តអគ្គិសនី។ បញ្ហានេះខាងខ្ញុំ បានធ្វើកោសល្យវិច្ច័យគឺឃើញរូបភាពបែបហ្នឹង»។
កាលពីវេលាម៉ោងជាង ៧ ព្រឹកថ្ងៃទី ៦ មិថុនា សមត្ថកិច្ចនៃអង្គភាពពន្លត់អគ្គិភ័យ បានទទួលសេចក្តីរាយការណ៍ពីកម្លាំងសមត្ថកិច្ចមូលដ្ឋានថា មានករណីអគ្គិភ័យឆេះមន្ទីរពហុព្យាបាលអន្តរជាតិខេមា ស្ថិតនៅ ភូមិ ៦ សង្កាត់ បឹងកេងកងទី១ ខណ្ឌ បឹងកេងកង។
ភ្លាមៗក្រោយទទួលបានព័ត៌មានមក កម្លាំងសមត្ថកិច្ចពន្លត់អគ្គិភ័យបានចេញរថយន្តទៅកាន់គោលដៅ ដោយបានប្រើរថយន្តពន្លត់អគ្គិភ័យ អស់ចំនួន៣គ្រឿង បាញ់ទឹកពន្លត់បានទាន់ពេលវេលា ដោយមិនមានការឆ្លងរាលដាលដល់កន្លែងផ្សេងទៀត នៅក្នុងមន្ទីរពហុព្យាបាលអន្តរជាតិខេមានោះឡើយ។
ដោយឡែកលោក គល់ សុផាត នាយប៉ុស្តិ៍នគរបាលសង្កាត់ បឹងកេងកង១ បានឱ្យដឹងនៅថ្ងៃទី ៦ មិថុនាថា ទីតាំងឆេះដែលជាមន្ទីរពហុព្យាបាលអន្តរជាតិខេមា បើតាមការស្រាវជ្រាវរបស់សមត្ថកិច្ចពន្លត់អគ្គិភ័យបង្ហាញថា ភ្លើងបានឆេះចេញពីទូរផ្ទុកចរន្តអគ្គិសនី សម្រាប់ចែកចាយនៅក្នុងមន្ទីរពហុព្យាបាលអន្តរជាតិ ខេមាដែលបន្ទប់ចែកចាយចរន្តអគ្គិសនីនោះ មានទំហំតែ ១ ម៉ែត្រកន្លះ គុណនឹង ២ ម៉ែត្រ។ ដូច្នេះមានការខូចខាតតែទូចែកចាយចរន្តអគ្គិសនីតែ១ប៉ុណ្ណោះ។
ចំពោះករណីភ្លើងឆេះមួយទីតាំងទៀតដែលបណ្តាលមកពីឆ្លងចរន្តអគ្គិសនីដែរនោះ ត្រូវបានលោក ព្រហ្ម យ៉ន បញ្ជាក់ប្រាប់ថា ជាភោជនីយដ្ឋានលក់គ្រឿងសមុទ្រ ដែលមានយីហោ អ៊ូហ៊ូសឺហាយ ហើយភ្លើងបានចាប់ផ្តើមឆេះ នៅប្រហែលវេលាម៉ោងជាង ៦ ព្រឹកថ្ងៃទី ៦ ខែមិថុនា ស្ថិតក្នុង ភូមិ ១៤ សង្កាត់ទន្លេបាសាក់ ខណ្ឌចំការមន ។ ចំពោះសម្ភារដែលឆេះខូចខាតមាន ម៉ាស៊ីនត្រជាក់ ១ គ្រឿង ។
ក្នុងការពន្លត់អគ្គិភ័យនេះ កម្លាំងរបស់លោក បានប្រាស់រថយន្តទឹក អស់ចំនួន ៣ គ្រឿង ហើយក៏មានរថយន្តពន្លត់អគ្គិភ័យដែលរង់ចាំជាជំនួយបន្ថែមរបស់ក្រមហ៊ុន OCIC ៣ គ្រឿងផងដែរ៕