ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប) កាលពីម្សិលមិញបានបញ្ចេញព័ត៌មានប្រាប់ ភ្នំពេញ ប៉ុស្តិ៍ថា លទ្ធផលបណ្ដោះអាសន្ននៃសំឡេងឆ្នោត គណបក្សនយោបាយទាំង ១៧ ដែលបានចូលរួមប្រកួតប្រជែងការបោះឆ្នោតជ្រើសរើសក្រុមប្រឹក្សាឃុំ-សង្កាត់ កាលពីថ្ងៃទី ៥ ខែ មិថុនា ឆ្នាំ ២០២២ ដោយគណបក្សប្រជាជនកម្ពុជា (CPP)ទទួលបានសំឡេងឆ្នោត ៧៤,៣២ ភាគរយ និងគណបក្សភ្លើងទៀនទទួលបានសំឡេង ២២,២៦ ភាគរយ ក្នុងលំដាប់ថ្នាក់លេខ ២ ខណៈគណបក្សផ្សេងទៀតទទួលបានសំឡេងស្មើ ១,២៧ ភាគរយ និងក្រោម ១ ភាគរយ។
គ.ជ.ប និងក្រុមអ្នកសង្កេតការណ៍អន្តរជាតិ ហើយរួមទាំងគណបក្សនយោបាយមួយចំនួនបានចេញសេចក្ដីថ្លែងការណ៍ប្រហាក់ប្រហែលគ្នាដោយចាត់ទុកថា ដំណើរការបោះឆ្នោតបានប្រព្រឹត្តទៅដោយយុត្តិធម៌ ត្រឹមត្រូវ តម្លាភាព និងប្រជាពលរដ្ឋចេញទៅបោះឆ្នោតដោយរីករាយប្រកបដោយលទ្ធិប្រជាធិបតេយ្យសេរីពហុបក្ស។
ទោះជាយ៉ាងណាក៏ដោយ គណបក្សភ្លើងទៀន បានចេញសេចក្តីថ្លែងការណ៍ដោយសម្ដែងការសោកស្តាយចំពោះលទ្ធផលនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ នៅថ្ងៃទី៥ ខែ មិថុនា ឆ្នាំ ២០២២ នេះ ជាលទ្ធផលមិនឆ្លុះបញ្ចាំងឆន្ទៈរបស់ប្រជាពលរដ្ឋខ្មែរទេ ដោយគណបក្សនេះទទួលការគាបសង្កត់បំភិតបំភ័យ ចាប់តាំងពីការរៀបចំបញ្ជីបេក្ខជនរហូតដល់ការដាក់បញ្ជីអ្នកសង្កេតការណ៍ ហើយរាល់សកម្មភាពកៀរគរពលរដ្ឋតាមរយៈការទិញសន្លឹកឆ្នោត តាមដាន សម្លុត គំរាម មានជាហូរហែដោយមិនមានការអង្កេត និងហាមប្រាមពី គ.ជ.ប នោះទេ។
សេចក្ដីថ្លែងការណ៍របស់គណបក្សភ្លើងទៀន បានអះអាងថា៖ «ការបោះឆ្នោតនៅថ្ងៃទី ៥ ខែ មិថុនា ឆ្នាំ ២០២២ នេះ គឺមិនមានបរិយាកាសស្មើភាព ពលរដ្ឋមិនមានសេរីភាពក្នុងការចូលរួមកិច្ចការនយោបាយ និងការបញ្ចេញមតិបានត្រឹមត្រូវនៅឡើយ ហើយស្ថាប័នបោះឆ្នោតទៀតសោត ក៏មិនទាន់ឯករាជ្យ ព្រោះការចាត់ចែង និងការសម្រេចលើការងារមួយចំនួនធំ គឺធ្វើដោយលម្អៀង រួមទាំងសមាសភាពសមាជិកដឹកនាំស្ថាប័ននេះពីលើដល់ក្រោមជាសមាជិកមកពីគណបក្សកាន់អំណាចស្ទើរតែទាំងអស់»។
សេចក្ដីថ្លែងការណ៍របស់គណបក្សភ្លើងទៀន បានអះអាងទៀតថា នៅថ្ងៃបោះឆ្នោតស្ទើរគ្រប់មណ្ឌលបោះឆ្នោតទូទាំងប្រទេស ដែលយកសាលារៀនជាទីតាំង បានត្រូវបិទទ្វាររបង ចាប់ពីម៉ោង ៣ រសៀល ហើយបណ្ដេញពលរដ្ឋចេញមិនឱ្យនៅតាមដានការរាប់សន្លឹកឆ្នោត ដូចដែលបានណែនាំនិងអនុញ្ញាតដោយ គ.ជ.ប ដោយមានការផ្ដល់ឱ្យមន្ត្រី ភូមិ-ឃុំរបស់បក្សកាន់អំណាច និងតំណាងអង្គការជាច្រើនរូបរបស់គណបក្សនេះ មានសិទ្ធិស្ថិតក្នុងបរិវេណសាលា ចំណែកភ្នាក់ងារគណបក្សក្រៅរដ្ឋាភិបាលមួយចំនួន ត្រូវគេបណ្តេញឱ្យនៅក្រៅការិយាល័យបោះឆ្នោត នៅពេលរាប់សន្លឹកឆ្នោត ហើយមានករណីខ្លះគ្រាន់តែថតយកលទ្ធផល ដែលបិទនៅការិយាល័យបោះឆ្នោតក៏មិនត្រូវអនុញ្ញាតដែរ។ «ការរំលោភបំពានទាំងនេះ រួមទាំងករណីរំលោភបំពានច្រើនទៀតបានបង្ហាញពីសកម្មភាពនៃការលួចបន្លំសន្លឹកឆ្នោត។ គណបក្សភ្លើងទៀនចាត់ទុកថា ការបោះឆ្នោតឃុំសង្កាត់ អាណត្តិទី៥ ថ្ងៃទី ៥ ខែ មិថុនា ឆ្នាំ ២០២២ នេះ មិនសេរី និងមិនយុត្តិធម៌ទេ»។
ទោះបីជាយ៉ាងណា លោក សោម សូរីដា អ្នកនាំពាក្យ គ.ជ.ប បានថ្លែងកាលពីម្សិលមិញដោយបានច្រានចោលចំពោះសេចក្តីថ្លែងការណ៍របស់គណបក្សភ្លើងទៀន ដោយហេតុមិនស្របទៅនឹងស្ថានភាពទូទៅនៃដំណើរការមុនពេល ក្នុងពេល និងក្រោយពេលបោះឆ្នោតនោះទេ ព្រោះយោងតាមការវាយតម្លៃជាទូទៅរបស់មតិជាតិ និងអន្តរជាតិ ក៏បានបង្ហាញឱ្យឃើញថា ស្ថានភាព សុខសុវត្ថិភាព និងសណ្តាប់ធ្នាប់សាធារណៈ នៅមុនពេល ក្នុងពេល និងក្រោយពេលបោះឆ្នោត គឺមានលក្ខណៈល្អប្រសើរ គ្មានអំពើហិង្សា និងគំរាមកំហែងនោះទេ។
លោក សោម សូរីដា បានបញ្ជាក់ថា ចំពោះករណីដែលមិនអនុញ្ញាតឱ្យប្រជាពលរដ្ឋ ឬបុគ្គលដែលពុំមានសិទ្ធិចូលទៅក្នុងការិយាល័យបោះឆ្នោត រួមទាំងបរិវេណខាងក្នុងការិយាល័យរាប់សន្លឹកឆ្នោត ត្រូវបានកំណត់ដោយច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ-សង្កាត់។
តាមទិន្នន័យដែល ភ្នំពេញ ប៉ុស្តិ៍ ទទួលបានពី គ.ជ.ប នៅថ្ងៃទី ៦ ខែមិថុនា បានឱ្យដឹងថា គណបក្សប្រជាជនកម្ពុជា បានឈ្នះនាំមុខគេក្នុងការបោះឆ្នោតនេះ ដោយទទួលបានសំឡេងចំនួន ៥ ៣៧៧ ៧៥៤ ស្មើនឹង ៧៤,៣២ %។ គណបក្សភ្លើងទៀនទទួលបានសំឡេងចំនួន ១ ៦១០ ៤៣៤ ស្មើនឹង ២២,២៦ %។ គណបក្សហ្វុ៊នស៊ិនប៉ិចទទួលបានសំឡេងចំនួន ៩១ ៧៩៣ ស្មើនឹង ១,២៧ %។ គណបក្សខ្មែររួបរួមជាតិទទួលបានសំឡេងចំនួន ៦៣ ៩៤៧ ស្មើនឹង ០,៨៨%។ គណបក្សស្រឡាញ់ជាតិទទួលបានសំឡេង ៣៣ ៣០៥ ស្មើនឹង ០,៥២ % គណបក្សយុវជនកម្ពុជាទទួលបានសំឡេង ១៣ ៨៤៤ ស្មើនឹង ០,២៣ %។ គណបក្សសញ្ជាតិកម្ពុជាទទួលបានសំឡេងចំនួន ១៣ ១៤១ ស្មើនឹង ០,២០ %។ គណបក្សកែទម្រង់កម្ពុជាទទួលបានសំឡេង ៧ ៧៧៥ ស្មើនឹង ០,១៧ %។ គណបក្សប្រជាធិបតេយ្យមូលដ្ឋាន ទទួលបានសំឡេងចំនួន ៦ ៨០៧ ស្មើនឹង ០,១២ %។ គណបក្សឆន្ទៈខ្មែរទទួលបានសំឡេងចំនួន ៥ ០២៦ ស្មើនឹង ០,១០ %។ គណបក្សកម្ពុជានិយមទទួលបានសំឡេងចំនួន ៤ ៨៥៨ ស្មើនឹង ០,១២ %។ គណបក្សសំបុកឃ្មុំសង្គមប្រជាធិបតេយ្យទទួលបានសំឡេងចំនួន ២ ៤៦១ ស្មើនឹង ០,០៥ %។ គណបក្សជនជាតិដើមប្រជាធិបតេយ្យកម្ពុជាទទួលបានសំឡេងចំនួន ១ ៦៣៤ ស្មើនឹង ០,៥៧ %។ គណបក្សខ្មែរតែមួយទទួលបានសំឡេងចំនួន ១ ៥៩៩ ស្មើនឹង ០,០៤ %។ គណបក្សឯកភាពជាតិខ្មែរទទួលបានសំឡេងចំនួន ១ ១២៦ ស្មើនឹង ០,០៨ %។ គណបក្សរស្មីខេមរា ទទួលបានសំឡេងចំនួន ៤៤៦ ស្មើនឹង ០,០៤ គណបក្សខ្មែរអភិវឌ្ឍន៍សេដ្ឋកិច្ចទទួលបានសំឡេងចំនួន ២៩៤ ស្មើនឹង ០,០២។
តំណាងអង្គការ (IPTP) ថ្លែងនៅក្នុងសន្និសីទសារព័ត៌មាននៅថ្ងៃទី ៦ ខែមិថុនាថា ការសង្កេតការណ៍នៅតាមមណ្ឌលបោះឆ្នោតជាច្រើនទីតាំងនៅទីក្រុងភ្នំពេញឃើញថា ការរៀបចំការបោះឆ្នោតរៀបចំបានល្អ ប្រសិទ្ធភាព និងសន្តិភាព។
ខណៈអ្នកសង្កេតការណ៍ឯករាជ្យ ICAPP ថ្លែងនៅក្នុងសន្និសីទសារព័ត៌មាននោះដែរថា ការបោះឆ្នោតនេះបានប្រព្រឹត្តទៅប្រកបដោយសមធម៌ទៅតាមក្បួនច្បាប់អន្តរជាតិ។
រីឯតំណាងអង្គការ (CAPDI) ថ្លែងថា៖ «គណៈប្រតិភូមិនបានសង្កេតឃើញមានការតវ៉ាណាមួយ ដែលអាចប៉ះពាល់ដល់ដំណើរការ ឬលទ្ធផលនៃការបោះឆ្នោតឆ្នាំ ២០២២ នោះទេ»។
គណបក្សខ្មែរតែមួយ គណបក្សខ្មែររួបរួមជាតិ គណបក្សប្រជាធិបតេយ្យមូលដ្ឋាន បានចេញសេចក្តីថ្លែងការណ៍ កាលពីម្សិលមិញ ដោយអះអាងប្រហាក់ហែលគ្នាថា ជាទូទៅដំណើរការនៃការបោះឆ្នោត នេះបានប្រព្រឹត្តទៅដោយរលូនក្នុងស្ថានភាព សន្តិសុខល្អ សណ្តាប់ធ្នាប់ល្អ និងក្នុងបរិយាកាសត្រឹមត្រូវ យុត្តិធម៌ គ្មានរូបភាពគំរាមកំហែង ប្រកបដោយលទ្ធិប្រជាធិបតេយ្យ សេរីពហុបក្ស គ្មានការបង្ខិតបង្ខំ គ្មានឧបសគ្គ និងគ្មានអំពើហិង្សា ព្រមទាំងការរាប់សន្លឹកឆ្នោត និងលទ្ធផលបោះឆ្នោតអាចទទួលយកបាន។
លោក ស ខេង អនុប្រធាន CPP កាលពីម្សិលមិញបញ្ជាក់ថា ដំណើរការបោះឆ្នោតប្រព្រឹត្តទៅដោយជោគជ័យ ក្រោមបរិយាកាសស្ងប់ស្ងាត់ សុខសន្តិភាព និងគ្មានអំពើហិង្សា ដែលបានបង្ហាញទៅកាន់មជ្ឈដ្ឋានជាតិ និងអន្តរជាតិ ឱ្យឃើញនូវភាពកាន់តែចាស់ទុំ និងភាពម្ចាស់ការ៕
វីដេអូ៖