ភ្នំពេញៈ គិតត្រឹមរយៈពេល ៥ ខែ ឆ្នាំ ២០២២ កម្ពុជាបានបញ្ជូនពលករស្របច្បាប់ជាង ១៥ ០០០ នាក់ ទៅបម្រើការងារនៅបណ្តារោងចក្រ សហគ្រាស នៅប្រទេសថៃ ហើយចំនួននេះនឹងបន្តកើនឡើង បន្ទាប់ពីភាគីថៃបន្ធូរបន្ថយនីតិវិធី និងប្រទេសទាំង ២ ក៏បើកច្រកព្រំដែនឡើងវិញ ដោយសារស្ថានភាពនៃជំងឺកូវីដ ១៩ ធូរស្រាល។
ប្រធានសមាគមទីភ្នាក់ងារហត្ថពលកម្មកម្ពុជា លោក អន ប៊ុនហាក់ ដែលធ្វើការពាក់ព័ន្ធនឹងការបញ្ជូនពលករស្របច្បាប់ប្រាប់ ភ្នំពេញ ប៉ុស្តិ៍ នៅថ្ងៃទី ៦ មិថុនាថា បើគិតពីខែមករា ដល់ខែឧសភា ពលករកម្ពុជាត្រូវបានបញ្ជូនទៅធ្វើការនៅប្រទេសថៃ មានជាង ១៥ ០០០ នាក់ តាមរយៈទីភ្នាក់ងារបញ្ជូនពលករដែលទទួលបានអាជ្ញាប័ណ្ណពីក្រសួងការងារ និងបណ្តុះបណ្តាលវិជ្ជាជីវៈ។ ពលករភាគច្រើនទៅធ្វើការផ្នែកកសិកម្ម រោងចក្រចំណីអាហារ សេវាកម្ម និងរោងចក្រឧស្សាហកម្មគ្រឿងយន្តជាដើម។ ក្នុង ១ ខែ នឹងទទួលបានប្រាក់ចន្លោះពី ៥០០ ទៅ ៦០០ ដុល្លារអាមេរិក អាស្រ័យលើការងារជាក់ស្តែង និងការថែមម៉ោង។
លោកបញ្ជាក់ថា ចំនួននេះនឹងបន្តកើនឡើង ដោយសារភាគីកម្ពុជា និងថៃ បានបើកច្រកព្រំដែនឡើងវិញបណ្តោះអាសន្ន ខណៈភាគីថៃក៏បានបន្ធូរបន្ថយនីតិវិធីសម្រាប់ពលករកម្ពុជាផងដែរ។
លោកថ្លែងថា៖ «នីតិវិធីបញ្ជូនពលករ វាចង់ត្រឡប់ទៅដូចធម្មតា កាលមិនទាន់មានកូវីដ ១៩។ ឥឡូវនេះពលករដែលត្រូវបង្ហាញ នោះមានតែ ២ ចំណុចទេ គឺត្រូវចុះឈ្មោះនៅ Thailand Pass ហើយនិយោជកមានកាតព្វកិច្ចចុះឈ្មោះបង់ថ្លៃធានារ៉ាប់រងកូវីដឱ្យពលករយើង និងបង្ហាញកាតចាក់វ៉ាក់សាំង»។
លោកបន្តថា៖ «ប៉ុន្តែកាតវ៉ាក់សាំងនេះខ្មែរយើងមិនមានបញ្ហានោះទេ ព្រោះប្រជាពលរដ្ឋយើងប្រមាណ ៩៣ ភាគរយ ដែលទទួលការចាក់ [វ៉ាក់សាំង]។ អ៊ីចឹងយើងអត់ដែលមានបញ្ហារឿងចាក់វ៉ាក់សាំងទេ ហើយថៃក៏គាត់ហាក់បីដូចមានទំនុកចិត្តលើពលករយើងសឹងតែ ១០០ ភាគរយ ដោយសារគាត់មើលឃើញស្ថានភាពប្រទេសយើងធូរស្រាល»។
បើតាមលោក អន ប៊ុនហាក់ ពលករដែលនឹងត្រូវបញ្ជូនទៅប្រទេសថៃ មិនមែនជាពលករជំនាញនោះទេ និងត្រូវរង់ចាំរយៈពេលប្រហែល ១ ខែ ប៉ុន្តែត្រូវការបណ្តុះបណ្តាល មុនចាកចេញរយៈពេល ១ ថ្ងៃ ដែលបណ្តុះបណ្តាលលើលក្ខខណ្ឌការងារ កិច្ចសន្យាការងារ និងចំណុចអ្វីដែលត្រូវធ្វើ និងមិនត្រូវធ្វើនៅប្រទេសថៃ ហើយណែនាំឱ្យគាត់ចេះសន្សំលុយកាក់។ ជាទូទៅការបណ្តុះបណ្តាលនោះមានមន្ត្រីក្រសួងការងារចូលរួមបណ្តុះបណ្តាល និងធ្វើបទបង្ហាញអ្វី ដែលជាកិច្ចសន្យាជាមួយភាគីថៃ។ ត្រូវទទួលខុសត្រូវទៅលើអ្វីខ្លះ? ដូចជាគ្រោះថ្នាក់ការងារ និងនីតិវិធីដោះស្រាយវិវាទ ជាពិសេស ណែនាំគាត់កុំឱ្យធ្វើអ្វី ដែលខុសច្បាប់ ចៀសវាងបង្កបញ្ហាប៉ះពាល់ដល់ក្រសួង និងសមាគមពាក់ព័ន្ធ។
លោកបានបញ្ជាក់ថា៖ «ព្រោះយើងមិនចង់ឱ្យមួយជីវិតគាត់ធ្វើតែពលករទេសន្តរប្រវេសន៍ទេ។ មានន័យថា គាត់សន្សំលុយបាន ត្រឡប់មកវិញ បង្កើតជាមុខរបរផ្ទាល់ខ្លួន ឬធ្វើកសិកម្ម ឬអ្វីដែល គាត់រៀននៅថៃផ្នែកកសិកម្មមកវិញ អាចចេះដាំដុះ តាមរបៀបទំនើបរបស់គេ»។
លោកបន្ថែមថា ពលករទៅធ្វើការនៅប្រទេសថៃច្រើន ហើយត្រឡប់មកវិញធ្វើចម្ការ ពេលខ្លះគាត់អាចចិញ្ចឹមមាន់លក់ទៅឱ្យឈ្មួញ គឺជាចំណុចមួយល្អ ដែលគាត់រៀនសូត្រពីប្រទេសគេមកអភិវឌ្ឍក្នុងប្រទេសវិញ។ បច្ចុប្បន្នពលករខ្មែរដែលត្រូវបញ្ជូនទៅធ្វើការនៅប្រទេសថៃ តាមរយៈ MoU រវាងរដ្ឋាភិបាលទាំង ២ មានភាពប្រសើរ ព្រោះនិយោជកថៃមានការយល់ច្បាប់ច្រើន ដោយសារមានអង្គការអន្តរជាតិច្រើនដាក់ការិយាល័យនៅទីនោះ ដូចជា អង្គការពលកម្មអន្តរជាតិ (ILO) អង្គការអន្តរជាតិទេសន្តរប្រវេសន៍ (IOM)។
លោកថា ទន្ទឹមនឹងនោះ អ្នកបញ្ជាទិញនៅអាមេរិក សហគមន៍អឺរ៉ុប ជួយសម្របសម្រួលដាក់លក្ខខណ្ឌ ជាមួយនិយោជកថៃ ឱ្យមើលថែពលករ ហើយរាល់ការចំណាយ គឺជាបន្ទុករបស់និយោជក។
លោកថ្លែងថា៖ «និយាយរួម ពលករទៅមានតែកម្លាំងទេ អ៊ីចឹងបញ្ហាមួយចំនួនរបស់ពលករត្រូវបានកាត់បន្ថយបើប្រៀបធៀបទៅ ១៥ ឆ្នាំមុន»។
ទោះយ៉ាងណា លោក អន ប៊ុនហាក់ លើកទឹកចិត្តពលករខ្មែរឱ្យទៅធ្វើការតាមប្រព័ន្ធស្របច្បាប់ ដែលជាយន្តការនៃការការពារ ទទួលស្គាល់ដោយរដ្ឋាភិបាលទាំង ២ និងអង្គការអន្តរជាតិនានា ដែលទទួលស្គាល់ ជាពិសេសពលករមានការធានារ៉ាប់រង ឬគ្រោះថ្នាក់ការងារ។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា លើកឡើងថា មូលហេតុដែលពលករនៅតែសម្រេចចេញទៅធ្វើការនៅប្រទេសថៃ ដោយសារទទួលបានកម្រៃខ្ពស់ និងទីផ្សារការងារទូលំទូលាយ ជាងនៅខ្មែរ។
លោកថា៖ «តាមអ្វីដែលយើងធ្លាប់សួរគាត់ ចំនួនការងារនៅស្រុក នៅមានកម្រិតនៅឡើយមួយទៀត ប្រាក់ឈ្នួលក្នុងស្រុកមានចំនួនតិច បើប្រៀបធៀបនៅថៃ»។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ មិនអាចទាក់ទងសុំអត្ថាធិប្បាយបានទេ ពីថ្ងៃទី ៦ ខែមិថុនា។
យោងតាមរបាយការណ៍របស់ក្រសួងការងារ និងបណ្តុះបណ្តាល-វិជ្ជាជីវៈ ឱ្យដឹងថា បច្ចុប្បន្នកម្ពុជាមានពលករកំពុងធ្វើការងារនៅប្រទេសថៃ ចំនួន ១ ២២០ ១៩៧ នាក់ ដោយធ្វើការងារលើផ្នែកសំណង់ កសិកម្ម នេសាទ និងរោងចក្រចំណីអាហារ៕