ភ្នំពេញៈ សមាគមសម្ព័ន្ធសហគមន៍កសិករកម្ពុជា (CCFC) កំពុងធ្វើយុទ្ធនាការបញ្ឈប់ការប្រើប្រាស់ថ្នាំគីមី ដែលមានសារជាតិពុលលើដំណាំចាប់ពីថ្ងៃទី ៥ ខែមិថុនា រហូតដល់ដំណាច់ខែនេះ ដើម្បីផ្សព្វផ្សាយដល់សាធារណជនពីផលប៉ះពាល់ ដល់ខួរក្បាលនិងសរីរាង្គនៃការលូតលាស់ដំបូងរបស់កុមារ ពិសេសពលរដ្ឋក្នុងខេត្ដគោលដៅដែលបានប្រើថ្នាំគីមីនេះ។
លោក ថេង សាវឿន ប្រធានសមាគម CCFC បានប្រាប់ ភ្នំពេញ ប៉ុស្ដិ៍ ពីថ្ងៃទី ៥ ខែមិថុនាថា យុទ្ធនាការនេះមានបំណងទី១ ដើម្បីអបអរទិវាកុមារអន្តរជាតិ និងទី២ ដើម្បីបញ្ឈប់ការប្រើ
ប្រាស់ថ្នាំគីមីដែលមានជាសារជាតិពុល ផលប៉ះពាល់នៃថ្នាំសម្លាប់សត្វល្អិត ដែលអាចបំផ្លាញខួរក្បាល និងសិរីរាង្គ នៃការលូតលាស់ដំបូងរបស់កុមារ។
លោកថ្លែងថា៖ «សកម្មភាពនៃយុទ្ធនាការនេះ យើងផ្សព្វផ្សាយលើបណ្ដាញសង្គមហ្វេសប៊ុក និងជួបជជែកផ្ទាល់ជាមួយតំណាងប្រជាពលរដ្ឋ និងប្រជាពលរដ្ឋ ដើម្បីផ្សព្វផ្សាយឱ្យបញ្ឈប់ការប្រើប្រាស់ថ្នាំគីមី ដែលមានជាសារជាតិពុលរបស់សហគមន៍កសិករនៅខេត្ដគោលដៅមួយចំនួនដូចជា ខេត្ដព្រៃវែង ស្វាយរៀង ត្បូងឃ្មុំ តាកែវ កំពង់ស្ពឺ កោះកុង និងព្រះសីហនុជាដើម»។
លោកបន្តថា យុទ្ធនាការនេះ មានកិច្ចសហប្រតិបត្ដិការជាមួយបណ្ដាញអង្គការក្នុងតំបន់អាស៊ីអាគ្នេយ៍ដែលតែងតែជំរុញនូវការលើកកម្ពស់សិទ្ធិកុមារ ជាពិសេសបញ្ឈប់ការប្រើថ្នាំគីមីដែលមានសារជាតិពុលលើវិស័យស្បៀងអាហារដែលធ្វើឱ្យប៉ះពាល់ដល់ការលូតលាស់ និងសុខភាពរបស់កុមារ។
លោក សាវឿន បានឱ្យដឹងថា បច្ចុប្បន្ន CCFC មើលឃើញថា ការប្រើថ្នាំគីមីមានសារជាតិពុលលើស្បៀងអាហារ និងលើដំណាំមានច្រើននៅកម្ពុជា និងប្រទេសមួយចំនួនក្នុងតំបន់។
លោកថា៖ «យើងសង្ឃឹមថា តាមរយៈយុទ្ធនាការនេះ នឹងមានការចូលរួមពីពលរដ្ឋ ពិសេសប្រជាសិករ និងអ្នកពាក់ព័ន្ធក្នុងការចូលរួមផ្សព្វផ្សាយអំពីការបញ្ឈប់ការប្រើប្រាស់ថ្នាំគីមីដែលមានជាសារជាតិពុលនេះបន្ថែមទៀត»។
បើតាមលោក សាវឿន ផលប៉ះពាល់នៃថ្នាំសម្លាប់សត្វល្អិតអាចបំផ្លាញខួរក្បាល និងសរីរាង្គនៃការលូតលាស់ដំបូងរបស់កុមារ។ ដូច្នេះត្រូវរួមគ្នា លើកកម្ពស់សិទ្ធិកុមារ ដើម្បីសុខភាពល្អ និង
ពិភពលោកគ្មានថ្នាំសារជាតិពុល។
លោក ងិន ឆាយ អគ្គនាយកនៃអគ្គនាយកដ្ឋានកសិកម្មនៃក្រសួងកសិកម្មមិនអាចបកស្រាយបានទេ ដោយលោកថា កំពុងរវល់នៅខេត្ដ។
បើតាមក្រសួងកសិកម្ម រុក្ខាប្រមាញ់ និងនេសាទ សមាសភាពចង្រៃគឺឧបសគ្គចម្បងមួយដែលកសិករតែងខ្វល់ខ្វាយពីការបង្កបង្កើនផលដំណាំរបស់ពួកគាត់។ ការគ្រប់គ្រងសមាសភាពចង្រៃតាមបទដ្ឋានបច្ចេកទេសអាចជួយឱ្យកសិករកាត់បន្ថយការចំណាយលើផលិតកម្ម កាត់បន្ថយផលប៉ះពាល់លើសុខភាពអ្នកប្រើប្រាស់និងបរិស្ថាន ព្រមទាំងការពារការបាត់បង់ផលដំណាំពីសមាសភាពចង្រៃ។
ក្រសួងបញ្ជាក់ថា ក្រោមកិច្ចសហការជាមួយរដ្ឋាភិបាលអូស្ត្រាលី ក្រសួងបានរៀបចំគោលការណ៍គតិយុត្តស្តីពីការណែនាំសម្រាប់ស្លាកសញ្ញាព័ត៌មាន និងគំរូស្លាកសញ្ញាព័ត៌មាននៃថ្នាំ
កសិកម្ម ដើម្បីគ្រប់គ្រងថ្នាំកសិកម្មប្រកបដោយសុវត្ថិភាពស្របតាមច្បាប់។
លោក កែវ មុន្ធីវុធ ប្រធាននាយកដ្ឋានការពារដំណាំ អនាម័យ និងភូតគាមអនាម័យ ធ្លាប់បានលើកឡើងពីខែឧសភា ឆ្នាំមុនថា៖ «បញ្ហាប្រឈមមួយដែលប្រជាកសិករ តែងតែជួបប្រទះក្នុងការធ្វើកសិកម្ម គឺសមាសភាពចង្រៃកើតឡើងកាន់តែច្រើន ឬភាពធននឹងថ្នាំជាងមុន គឺដោយសារការប្រើប្រាស់ថ្នាំកសិកម្មមិនចំមុខសញ្ញា»។
លោក ភុំ រ៉ា ប្រធាននាយកដ្ឋាននីតិកម្មកសិកម្មក៏ធ្លាប់លើកឡើងពីឆ្នាំមុនដែរថា លោករដ្ឋមន្ដ្រីក្រសួងកសិកម្មបានឈ្វេងយល់ខ្លាំងលើបញ្ហានេះ និងបានចេញសេចក្ដីណែនាំពីការប្រើប្រាស់ឈ្មោះរបស់សមាសភាពចង្រៃលើដំណាំ នៅលើស្លាកសញ្ញាព័ត៌មានថ្នាំកសិកម្ម និងសម្ភារផ្សព្វផ្សាយតាំងពីខែមេសា ឆ្នាំ ២០១៨ មកម្ល៉េះ។
លោកថា៖ «ក្នុងសេចក្ដីណែនាំនេះ គឺបានណែនាំចំពោះការប្រើប្រាស់ថ្នាំកសិកម្មត្រូវដាក់យ៉ាងម៉េចឱ្យស្របគ្នាកុំឱ្យនិយាយថា សមាសភាពចង្រៃនោះខ្លះ ហៅមេត្នោត ចំណែកខ្លះទៀតហៅថា ក្រាភ្លើង ដូច្នេះយើងធ្វើឱ្យមានកុងសង់ស៊ីសគ្នាលើពាក្យនីមួយៗនេះទាំងអស់គ្នា»។
លោក គង់ រ័ត្ន កសិករម្នាក់នៅខេត្ដតាកែវ បានថ្លែងថា បញ្ហាប្រឈមខ្លាំងជាងគេក្នុងការធ្វើកសិកម្មនេះ គឺបញ្ហាសត្វចង្រៃផងនិងជំងឺលើដំណាំផង។
លោកថា៖ «បើយើងមកឃើញជំងឺក្នុងដំណាំរបស់យើង យើងត្រូវឡើងទៅវិញ ទៅដេប៉ូទិញថ្នាំឱ្យត្រូវនឹងជំងឺដែលកំពុងកើតឡើងលើដំណាំកសិកម្មរបស់យើង។ កសិករខ្លះបានទៅទិញថ្នាំ
កសិកម្មយកមកប្រើប្រាស់ មិនត្រូវនឹងជំងឺនាំឱ្យខាតទាំងលុយ ហើយមិនអាចកម្ចាត់សត្វចង្រៃ ក៏ដូចជំងឺលើដំណាំបានទៀត»៕