ពោធិសាត់ៈ លោក កែវ សារិ អធិការនគរបាលក្រុងពោធិសាត់ឱ្យដឹងនៅថ្ងៃទី ៧ មិថុនាថា នគរបាលក្រុងពោធិសាត់កំពុងស្រាវជ្រាវស្វែងរកចាប់ខ្លួនជនសង្ស័យពាក់ព័ន្ធកាប់មន្ត្រីនគរបាលម្នាក់ឱ្យរបួសដៃទាំងសងខាងកាលពីយប់ថ្ងៃទី ៥ មិថុនា ឆ្នាំ ២០២២ ស្ថិតក្នុងភូមិ ពាលញែកទី២ សង្កាត់ ផ្ទះព្រៃ ក្រុង ពោធិសាត់។ ប៉ុន្តែក្មេងទំនើងប្រុសស្រីចំនួន ១០ នាក់ដែលសមត្ថកិច្ចរបស់លោកឃាត់ខ្លួនបណ្តោះអាសន្ននោះត្រូវបានអនុញ្ញាតឱ្យពួកគេវិលត្រឡប់ទៅផ្ទះវិញអស់ ហើយនៅថ្ងៃទី ៦ មិថុនា។
លោកប្រាប់ថា៖ «ក្មេងៗប្រុសស្រីទាំង ១០ នាក់នោះយើងអនុញ្ញាតឱ្យពួកគេវិលត្រឡប់ទៅផ្ទះវិញអស់ហើយដោយយើងតម្រូវឱ្យឪពុកម្តាយរបស់ក្មេងទាំងនោះមកធានា និងធ្វើកិច្ចសន្យាឈប់ឱ្យបង្កជាក្រុមពេលយប់អធ្រាត្រទៀត»។
លោកបានរៀបរាប់ថា កាលពីវេលាម៉ោងជាង ៧ យប់ ថ្ងៃទី ៥ មិថុនា ឆ្នាំ ២០២២ លោក ស៊ុន កុសល ជានាយរងផ្នែកនគរបាលយុត្តិធម៌ នៃអធិការដ្ឋាននគរបាលក្រុងពោធិសាត់បានចេញទៅរកហូបអីប៉ុន្តែគាត់មិនបានស្លៀកពាក់ជាឯកសណ្ខានកងកម្លាំងនគរបាលទេ។នៅពេលយប់នោះ ខណៈគាត់កំពុងតែជិះម៉ូតូតាមផ្លូវស្រាប់តែគាត់ឃើញមានជម្លោះកាប់គ្នាបង្កឡើងដោយមនុស្ស ២ ក្រុម។ ដោយឃើញសភាពបែបនេះ គាត់បានចុះពីលើម៉ូតូដើម្បីចូលទៅជួយធ្វើអន្តរាគមតែក៏ត្រូវគេកាប់គាត់ បណ្ដាលឲ្យរងរបួសដៃទាំងសងខាងយ៉ាងធ្ងន់ បន្ទាប់មកជនបង្កបាននាំគ្នាគេចខ្លួនបាត់អស់ទៅ។
បើតាមលោក សារិ បន្ទាប់ពីមានហេតុការណ៍នេះកើតឡើងមក លោកបានដឹកនាំកម្លាំងចេញប្រតិបត្តិការដើម្បីស្វែងរកក្រុមជនដៃដល់ហើយក៏ជួបក្រុមក្មេងទំនើង ១ ក្រុម ដែលសង្ស័យថាពាក់ព័ន្ធនឹងអំពើហិង្សានេះទើបសមត្ថកិច្ចរបស់លោកហៅមកធ្វើការសាកសួរនៅអធិការដ្ឋាននគរបាលក្រុងពោធិសាត់។ ប៉ុន្តែពេលសមត្ថកិច្ចសាកសួរទៅក្រុមក្មេងប្រុសស្រីទាំង ១០ នាក់នោះ មិនឃើញមានតម្រុយណាពាក់ព័ន្ធនឹងបទល្មើសកាប់មន្ត្រីនគរបាលទើបសមត្ថកិច្ចរបស់លោកធ្វើការអញ្ចើញឪពុកម្តាយរបស់ក្មេងៗទាំងនោះមកធ្វើកិច្ចសន្យាឱ្យបញ្ឈប់ការដើរលេងយប់ហួសម៉ោងហួសវេលាតទៅទៀត។
លោកប្រាប់ថា៖ «ក្រុមក្មេងទំនើងទាំង ១០ នាក់នោះ គ្មានកាំបិតដាវអីជាប់នឹងខ្លួនទេ តែពួកគេនាំគ្នាដើរលេង យប់ជ្រៅដែលអាចបង្កគ្រោះថ្នាក់ដល់អ្នកដទៃឬក៏ខ្លួនឯង។ ពួកគេជិះម៉ូតូប្រមូលផ្តុំវាអាចពាក់ព័ន្ធបង្កអសន្តិសុខដល់ប្រជាពលរដ្ឋ»។
លោកអធិការ កែវ សារិ លើកឡើងថា ចំពោះជនសង្ស័យដែលបានបង្កបទល្មើសកាប់មន្ត្រីនគរបាលក្រុងពោធិសាត់នោះ សមត្ថកិច្ចរបស់លោកកំពុងស្រាវជ្រាវហើយហើយសមត្ថកិច្ចក៏បានកំណត់មុខសញ្ញាជនដៃដល់បានអស់ហើយដែរ។ ពេលនេះជនរងគ្រោះបានធូរស្បើយច្រើនហើយដោយសារគ្រូពេទ្យខេត្តពោធិសាត់ធ្វើការវៈកាត់តសសៃបានជោគជ័យ៕