ភ្នំពេញៈ ក្រុមហ៊ុន Meta នឹងដាក់ដំណើរការយុទ្ធនាការរយៈពេល ៣ ថ្ងៃ ដោយចាប់ផ្តើមនៅថ្ងៃសុក្រសប្តាហ៍នេះ នៅរាជធានីភ្នំពេញ ដោយប្រមូលផ្តុំសិល្បករ វិចិត្រករគំនូរ និងអ្នកបង្កើតមាតិកាលើបណ្តាញសង្គមផ្សេងទៀត ដើម្បីលើកកម្ពស់ការយល់ដឹងអំពីឯកជនភាព តាមរយៈគេហទំព័រ «ប្រូហ្វាលរបស់អ្នក ផ្ទះរបស់អ្នក (Your Profile, Your Home)។
យុទ្ធនាការដែលនឹងដាក់ដំណើរការនៅថ្ងៃទី ១០ ខែមិថុនា និងបញ្ចប់នៅថ្ងៃទី ១២ ខែមិថុនា នៅ Factory Phnom Penh នៅរាជធានីភ្នំពេញ នឹងមានការចូលរួមពីវិចិត្រករ ដែលមានទេពកោសល្យ ក្នុងស្រុក ២ រូប គឺលោក Fonki និងលោកកេត មុន្នីរ័ក្ស ដែលនឹងដាក់បង្ហាញស្នាដៃសិល្បៈដ៏អស្ចារ្យរបស់ពួកគាត់ ដូចដែលមានបង្ហាញក្នុងគេហទំព័រ «ប្រូហ្វាលរបស់អ្នក ផ្ទះរបស់អ្នក»។
ព្រឹត្តិការណ៍នេះ ក៏នឹងមានការចូលរួមផងដែរ ពីអ្នកបង្កើតមាតិកាលើបណ្តាញសង្គមមួយចំនួន ដែលមានអ្នកតាមដាន ច្រើនក្នុងប្រទេសកម្ពុជា ដែលនឹងជួយផ្សព្វផ្សាយសារឯកជនភាពអនឡាញនេះ។ គេហទំព័រនេះអនុញ្ញាតឱ្យអ្នកទស្សនាជ្រើសរើសចំណង់ចំណូលចិត្តឯកជនភាព របស់ពួកគេ តាមរយៈការរចនាអន្តរទំនាក់ទំនង (interactive design)។ ជម្រើសឯកជនភាពមានភាពខុសគ្នា រាប់ចាប់ពី ឯកជនខ្លាំង (very private) រហូតដល់ បើកចំហខ្លាំង (very open)។
អ្នកចូលមើលគេហទំព័រ ក៏អាចស្វែងយល់អំពីប្រភេទផ្សាយពាណិជ្ជកម្ម និងការកំណត់ (Settings) ផងដែរ ដើម្បីជួយពួកគេធ្វើឱ្យ Profile របស់ខ្លួន មានលក្ខណៈឯកជន តាមដែលពួកគេចង់បាន។ នៅពេលដែលអ្នកចូលមើលគេហទំព័របានធ្វើការជ្រើសរើសជម្រើសរបស់ខ្លួនហើយ បញ្ជីត្រួតពិនិត្យសុវត្ថិភាពមួយត្រូវបានបង្ហាញឱ្យពួកគេឃើញ ដើម្បីរំឭកពួកគេពីអ្វីដែលពួកគេត្រូវការ ដើម្បីរក្សាសុវត្ថិភាពនៅលើអ៊ីនធឺណិត។
លោកស្រី Arianne T. Jimenez ប្រធានផ្នែកគ្រប់គ្រងឯកជនភាព និងគោលនយោបាយសាធារណៈរបស់ក្រុមហ៊ុន Meta ប្រចាំតំបន់អាស៊ីប៉ាស៊ីហ្វិក ថ្លែងថា ការធានាឯកជនភាពរបស់មនុស្ស គឺសំខាន់ណាស់សម្រាប់អាជីវកម្ម និងផលិតផល។ ការការពារឯកជនភាពរបស់មនុស្ស គឺជាចំណុចសំខាន់នៃចក្ខុវិស័យរបស់ក្រុមហ៊ុន Meta ក្នុងពេលអនាគត។
លោកស្រីថ្លែងថា៖ «យើងនឹងដាក់ដំណើរការយុទ្ធនាការ “ប្រូហ្វាលរបស់អ្នក ផ្ទះរបស់អ្នក”។ នេះជាមួយព្រឹត្តិការណ៍ផ្ទាល់នៅភ្នំពេញ ដើម្បីជួយប្រជាពលរដ្ឋកម្ពុជាឱ្យស្វែងយល់អំពីឧបករណ៍ឯកជនភាពផ្សេងៗ ដែលមាននៅលើភ្លែតហ្វម (Platform) របស់ក្រុមហ៊ុន Meta ដូចជា Facebook ជាដើម»។
លោកស្រីបន្តថា៖ «តាមរយៈយុទ្ធនាការនេះ យើងសង្ឃឹមថា ពលរដ្ឋកម្ពុជារាប់លាននាក់ ដែលប្រើ Facebook នឹងយល់កាន់តែច្បាស់ អំពីមុខងារឯកជនភាពទាំងនេះ ដែលពួកគេអាចរកបាន ដែលអាចជួយរក្សាព័ត៌មាន របស់ពួកគេឱ្យមានសុវត្ថិភាព»។
វិចិត្រករក្នុងស្រុក នឹងបង្ហាញការបកស្រាយ របស់ពួកគេ ដែលតំណាងឱ្យកម្រិតផ្សេងៗគ្នា នៃឯកជនភាព នៃប្រូហ្វាល Facebook ដែលកម្រិតឯកជនភាពនេះ មានចាប់ពី ឯកជនខ្លាំង (very private) រហូតដល់ សាធារណៈខ្លាំង (very public)។
លោក ហេង ភក្តី ប្រធានគ្រប់គ្រងផ្នែកគោលនយោបាយសាធារណៈ Facebook ប្រចាំនៅកម្ពុជាថ្លែងថា ក្នុងនាមជាអ្នកតំណាងនៅកម្ពុជា របស់ក្រុមហ៊ុន Meta លោកមានមោទនភាពណាស់ ដែលបាននាំយកយុទ្ធនាការ«ដ៏មានអត្ថន័យ»នេះមកកម្ពុជានិងធ្វើការជាមួយវិចិត្រករក្នុងស្រុក ដើម្បីផ្សព្វផ្សាយសារអំពីឯកជនភាព។
លោកថ្លែងថា៖«ដោយក្រុមហ៊ុន Meta ក្នុងប្រទេសកម្ពុជា ទទួលបានការនិយមប្រើប្រាស់ច្រើន យើងចង់ផ្តល់សិទ្ធិអំណាចដល់ប្រជាជនកម្ពុជាក្នុងការជ្រើសរើសកម្រិតឯកជនភាព និងសុវត្ថិភាពផ្ទាល់របស់ពួកគេ»។
ក្រុមហ៊ុន Meta នៅកម្ពុជាអំពាវនាវដល់សាធារណជនកុំស្ទាក់ស្ទើរ ក្នុងការចូលរួមព្រឹត្តិការណ៍ជាសាធារណៈលើកដំបូងមិនធ្លាប់មានរបស់ក្រុមហ៊ុន Meta នៅកម្ពុជា ដើម្បីស្វែងយល់បន្ថែមអំពីឯកជនភាពអនឡាញ របៀបភ្ជាប់ទំនាក់ទំនងប្រកបដោយសុវត្ថិភាពជាមួយមិត្តភក្តិ និងក្រុមគ្រួសារ ជួបជាមួយវិចិត្រករ និងអ្នកបង្កើតមាតិកាលើបណ្តាញសង្គមផ្សេងទៀត។ ការតាំងពិព័រណ៍ និងសកម្មភាពទាំងអស់នេះចូលរួមដោយមិនគិតថ្លៃ។
វិចិត្រករគំនូរតាមដងផ្លូវដ៏ឆ្នើម Fonki បានទទួលជោគជ័យក្នុងអាជីព ជាវិចិត្រករគំនូរ នៅលើឆាកអន្តរជាតិ មុនពេលមកដល់ប្រទេសកម្ពុជា។ Fonki កើតនៅប្រទេសបារាំងដែលមានឪពុកម្តាយជាជនជាតិខ្មែរ។ សិល្បៈរបស់លោកគឺជាគំនូរបែបប្រពៃណីខ្មែរ។
លោក កេត មុន្នីរ័ក្ស បានទាក់ទាញឱ្យមានការតាមដាន (Followering) នៅលើ Instagram ដោយសារស្នាដៃការងាររចនារបស់លោកសម្រាប់ម៉ាកយីហោ និងស្ថាប័នល្បីៗមួយចំនួននៅក្នុងប្រទេស។ លោក មុន្នីរ័ក្ស និងលោក Fonki នឹងបង្ហាញចំណាប់អារម្មណ៍សិល្បៈរបស់ពួកគាត់ ដើម្បីពន្យល់បង្ហាញពី “ប្រូហ្វាលរបស់អ្នក ផ្ទះរបស់អ្នក”៕