.jpg)
ស្ពានឆ្លងកាត់ស្ទឹងព្រែកត្នោតក្នុងខេត្តកំពង់ស្ពឺកំពុងសាងសង់។ រូប ក្រសួងធនធានទឹក
ភ្នំពេញៈ ក្រសួងធនធានទឹក ដោយមានការគាំទ្រពីភាគីចិនបានធ្វើការស្ដារ និងពង្រីកនៅតាមទីតាំងមួយចំនួននៃស្ទឹងព្រែកត្នោត ដើម្បីត្រៀមបញ្ចៀសទឹកជំនន់ក្នុងរដូវវស្សានេះ ខណៈស្ថាប័នជំនាញបានសាងសង់ និងកំពុងមានគម្រោងសាងសង់អាងស្តុកទឹកបន្ថែមទៀត ដើម្បីរំដោះទឹកពីស្ទឹងព្រែកត្នោតនេះ។
លោក ម៉ៅ ប៊ុនធឿន ប្រធានមន្ទីរធនធានទឹក និងឧតុនិយម រាជធានីភ្នំពេញ ថ្លែងនៅថ្ងៃទី ៧ មិថុនា ថា ដើម្បីដោះស្រាយបញ្ហាទឹកជំនន់ស្ទឹងព្រែកត្នោត មន្ទីរធនធានទឹក និងអាជ្ញាធររាជធានីភ្នំពេញ ដោយទទួលបានការគាំទ្រពីភាគីចិន បានស្ដារស្ទឹងព្រែកត្នោត តាមតំបន់ដែលមានការកកស្ទះ និងមានស្ថានភាពរាក់ និងបានពង្រីកតំបន់ណាដែលរួមតូច។ ប៉ុន្ដែការងារស្ដារនេះមិនទាន់រួចរាល់ទាំងស្រុងទេ គឺត្រូវបន្តស្ដារបន្ថែមទៀតនៅរដូវប្រាំងឆ្នាំក្រោយ។
លោកថ្លែងថា៖ «ក្នុងឆ្នាំ ២០២២ នេះយើងបានសាងសង់រួចហើយនូវទំនប់សណ្ដស្ទឹង ដើម្បីទប់ទឹកជំនន់។ ទំនប់នេះយើងបានលើកឡើងដល់កម្ពស់ជាង ១ ម៉ែត្រ និងមានប្រវែង ៧ ៩០០ ម៉ែត្រ។ ទំនប់សណ្ដស្ទឹងនេះ យើងបានធ្វើចាប់ពីតំបន់កន្ទួតទៅដល់ស្ពានព្រែកជ្រៃ ស្ថិតក្នុងខណ្ឌដង្កោ។ ក្រៅពីនេះភាគីចិន ក៏បានជួយពង្រីកការរៀបសំណាញ់ថ្ម ការពារការបាក់ច្រាំងស្ទឹង ដើម្បីការពារជំនន់នារដូវវស្សានេះ»។
លោក ប៊ុនធឿន ឱ្យដឹងថា នារដូវវស្សានេះ អ្នកជំនាញចិននៅបន្តសហការជាមួយអាជ្ញាធរបន្តសង្កេតស្ថានភាពករណីមានទឹកជំនន់ជន់លិចនៅស្ទឹងព្រែកត្នោត ដើម្បីចាត់យន្តការដោះស្រាយនៅតាមទីតាំងដែលមានហានិភ័យខ្ពស់។ ចំណែកក្រសួងធនធានទឹកក៏បានត្រៀមសម្ភារ គ្រឿងចក្រ សម្រាប់ដោះស្រាយបញ្ហាទឹកជំនន់នៅស្ទឹងព្រែកត្នោតនេះរួចហើយដែរ។
លោក ចាន់ យុត្ថា រដ្ឋលេខាធិការ និងជាអ្នកនាំពាក្យក្រសួងធនធានទឹក និងឧតុនិយមបានប្រាប់ភ្នំពេញប៉ុស្ដិ៍កាលពីពេលថ្មីៗនេះថា ស្ទឹងព្រែកត្នោត មានការជន់លិចខ្លាំងតាំងពីដើមមកម្ល៉េះមិនមែនទើបតែមានការជន់លិចនោះទេ។
លោកឱ្យដឹងថា ដើម្បីបញ្ចៀសការជន់លិច នៅតាមស្ទឹងនេះកាលពីទសវត្សរ៍ឆ្នាំ ១៩៦០ មានអ្នកជំនាញរបស់ប្រទេសជប៉ុនបានចុះមកសិក្សា ដើម្បីរកទីតាំងសាងសង់ទំនប់អាងទឹក ដើម្បីរំដោះទឹកជំនន់ពីស្ទឹងនេះរួចហើយ ប៉ុន្ដែដោយសារសង្គ្រាមក៏អាក់ខាន ហើយទីតាំងដែលគ្រោងសាងសង់ទំនប់អាងទឹកស្ថិតនៅក្នុងស្រុកឱរ៉ាល់ ខេត្ដកំពង់ស្ពឺ។ ប៉ុន្តែនាពេលបច្ចុប្បន្ន ទីនោះក៏ត្រូវបានប្រជាពលរដ្ឋរាប់ម៉ឺនគ្រួសារចូលទៅរស់នៅ។ ដូច្នេះបច្ចុប្បន្នក្រសួងបានបង្វែរការសាងសង់ទំនប់អាងទឹកទៅទីតាំងផ្សេង។
លោកបញ្ជាក់ថា៖ «អ៊ីចឹងហើយ ទើបយើងធ្វើការស្ដារស្ទឹងព្រែកត្នោត និងពង្រីកបន្ថែម ដើម្បីបង្កើនសមត្ថភាពរំដោះទឹកនៅក្នុងពោះស្ទឹងនេះ។ ឥឡូវនេះ យើងកំពុងសហការជាមួយភាគីចិន ស្ដារស្ទឹងព្រែកត្នោតដែលខ្ញុំបានលើកឡើងនេះ ដែលហៅថា ប្រព័ន្ធការពារទឹកជំនន់ និងប្រព័ន្ធស្រោចស្រពស្ទឹងព្រែកត្នោត។ អាហ្នឹងគឺនៅផ្នែកខាងក្រោមនៃស្ទឹងព្រែកត្នោតចាប់ស្ដារផ្នែកខាងក្រោមទំនប់ ៧ មករា (កំពង់ទួល) តាមបណ្ដោយផ្លូវជាតិលេខ ៣ ក្នុងស្រុកកណ្តាលស្ទឹង»។
បើតាមលោក យុត្ថា គ្រាន់តែការសិក្សាលើលក្ខណៈបច្ចេកទេស សម្រាប់ដោះស្រាយបញ្ហាជំនន់ស្ទឹងព្រែកត្នោតនេះទាមទារយ៉ាងហោចណាស់រយៈពេល ៣ ឆ្នាំ នេះសម្រាប់ក្រុមជំនាញជាខ្មែរ។ ប៉ុន្ដែបើក្រុមអ្នកជំនាញជប៉ុន និងកូរ៉េខាងត្បូងជាអ្នកសិក្សាលើបញ្ហាបច្ចេកទេសនេះវិញ គឺត្រូវការពេលវេលាចាប់ពី ៦ ទៅ ៧ ឆ្នាំ។
លោកបានឱ្យដឹងថា កាលពីដើមឡើយ តំបន់នេះមានលំហូរទឹកដោយសេរី ពេលទឹកជន់លិចទឹកហូរទៅក្នុងតំបន់សណ្តស្ទឹងនោះល្វឹងល្វើយគ្មានការកកស្ទះទេ។ ប៉ុន្ដែបច្ចុប្បន្ន តាមសណ្តស្ទឹងមានសំណង់វត្ដអារាម ហេដ្ឋារចនាសម្ព័ន្ធ និងផ្ទះរបស់ប្រជាពលរដ្ឋ ចំណែកទឹកហូរបានតែនៅពោះស្ទឹងប៉ុណ្ណោះ។ បើតាមលោក យុត្ថា ដើម្បីរំដោះទឹកជំនន់នៅស្ទឹងព្រែកត្នោតនេះ ក្រសួងបានបង្វែរការសាងសង់ទំនប់អាងទឹកចំនួន ៣ ស្ថិតក្នុងស្រុកឱរ៉ាល់ ខេត្ដកំពង់ស្ពឺនោះរួមមាន ទី១ ទំនប់អាងទឹកតាសាល ស្ថិតក្នុងឃុំតាសាល មានលទ្ធភាពស្តុកទឹកបានប្រមាណ ១៥៤ លានម៉ែត្រគុបត្រូវបានក្រសួងធនធានទឹក ធ្វើការសាងសង់ឡើងក្នុងឆ្នាំ ២០១១ និងបានបញ្ចប់ការងារជំហានទី ១ កាលពីខែកក្កដា ឆ្នាំ ២០១៤។ ចំណែកទី២ ទំនប់អាងទឹកស្វាហាប់ ឬអាងទឹកស្វាស្លាប់ ស្ថិតក្នុងភូមិសាស្ត្រទំនប់ចម្លងទីវ ឃុំចំបក់ ស្រុកភ្នំស្រួច។ ទំនប់អាងនេះអាចស្តុកទឹកបានប្រមាណ ១៣០ លានម៉ែត្រគុប។ ទី៣ ទំនប់អាងទឹកស្ទឹងឃ្លាច នៅស្រុកឱរ៉ាល់ដែរ។ ទំនប់អាងទឹកនេះ អាចស្តុកទឹកបានប្រហាក់ប្រហែលនឹងទំនប់អាងទឹកតាសាលដែរ។ គម្រោងទំនប់អាងទឹកស្ទឹងឃ្លាចនេះ កាលពីពេលថ្មីៗនេះក្រុមការងារជំនាញក្រសួង និងអភិបាលខេត្ដកំពង់ស្ពឺបានចុះពិនិត្យទីតាំងរួចហើយ បច្ចុប្បន្នក្រុមការងារកំពុងរៀបចំនីតិវិធី ដើម្បីស្វែងរកថវិកាសាងសង់ទំនប់អាងទឹកនេះ៕
វីដេអូ៖
