.jpg)
អ្នកគ្រូបាញ់អាល់កុលឱ្យសិស្សនៅក្នុងថ្នាក់រៀនសាលាបឋមសិក្សាចតុមុខពីខែមករាឆ្នាំ ២០២១។ ហេង ជីវ័ន
ភ្នំពេញៈ ក្រសួងអប់រំ យុវជន និងកីឡាបាននិងកំពុងបន្តអនុវត្តការរៀន និងបង្រៀនផ្ទាល់ពេញលេញនៅសាលាទូទាំងប្រទេសដោយបន្តអនុវត្តគោលការណ៍ប្រតិបត្តិស្តង់ដារបស់ក្រសួង ដើម្បីធានាសុវត្ថិភាពសុខភាពសិក្សា នៃដំណើរការគ្រឹះស្ថានសិក្សាសាធារណៈ និងឯកជនតាមគន្លងប្រក្រតីភាពថ្មីនៃវិស័យអប់រំ។ នេះបើតាមលោក រស់ សុវាចា អ្នកនាំពាក្យក្រសួងអប់រំ។
លោក រស់ សុវាចា ថ្លែងប្រាប់ ភ្នំពេញ ប៉ុស្ដិ៍ នៅថ្ងៃទី ៧ មិថុនាថា ក្រសួងអប់រំ បាននិងកំពុងបន្តអនុវត្តការរៀន និងបង្រៀនពេញលេញនៅទូទាំងប្រទេស ដោយបន្តអនុវត្តគោលការណ៍ប្រតិបត្តិស្តង់ដា ដើម្បីធានាសុវត្ថិភាពសុខភាពសិក្សានៃដំណើរការគ្រឹះស្ថានសិក្សាសាធារណៈ និងឯកជនតាមគន្លងប្រក្រតីភាពថ្មីនៃវិស័យអប់រំ ជាពិសេសបន្តអនុវត្តវិធានការ ៣ ការពារ ៣ កុំ។
លោកថា៖ «នេះជាការយោងតាមស្មារតីសន្និបាតបូកសរុបការងារអប់រំ យុវជន និងកីឡាឆ្នាំសិក្សា ២០២០-២០២១ និងលើកទិសដៅការងារ នៅឆ្នាំសិក្សា ២០២១-២០២២ កាលពីថ្ងៃ ២៥-២៧ មេសា ២០២១ ស្របតាមប្រសាសន៍ដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី»។
បើតាមលោក ហង់ជួន ណារ៉ុន រដ្ឋមន្ដ្រីក្រសួងអប់រំបានថ្លែងពេលបើកសន្និបាតបូកសរុបការងារអប់រំកាលពីថ្ងៃទី ២៥ ខែមេសាថា គិតត្រឹមឆ្នាំសិក្សា ២០២១-២០២២ សាលាមត្តេយ្យសិក្សា និងគ្រឹះស្ថានសិក្សាចំណេះទូទៅទាំងសាធារណៈ និងឯកជននៅទូទាំងប្រទេសមានចំនួន ១៨ ៤៣០ ក្នុងនោះ មត្តេយ្យសិក្សាសហគមន៍ចំនួន ៣ ០៨៣ កន្លែង គ្រឹះស្ថានសិក្សាចំណេះទូទៅសាធារណៈ ១៣ ៦៨១ និងគ្រឹះស្ថានសិក្សាឯកជន ១ ៦៦៦ កន្លែង។ សិស្សសរុបមានចំនួន ៣ ៥៨៩ ០២៥ នាក់ សិស្សស្រី ៥០,៤ ភាគរយ ក្នុងនោះសិស្សមត្តេយ្យសិក្សាសហគមន៍ ៧១ ៣៩៩ នាក់ ស្រី ៥១,៧ ភាគរយ សិស្សគ្រឹះស្ថាន-សិក្សាចំណេះ ទូទៅសាធារណៈ ៣ ២៧៧ ០៧៦ នាក់ ស្រី ៥០,៤ ភាគរយ និងសិស្សគ្រឹះស្ថានសិក្សាឯកជន ២៤០ ៥៥០ នាក់ ស្រី ៤៩,០ ភាគរយ។ នេះបើតាមលោក ណារ៉ុន។
ចំណែកគ្រឹះស្ថានឧត្តមសិក្សាសរុបមានចំនួន ១៣០ ក្នុងនោះគ្រឹះស្ថានឧត្តមសិក្សាសាធារណៈ ៤៨ និងគ្រឹះស្ថានឧត្តមសិក្សាឯកជន ៨២។ និស្សិតកំពុងសិក្សានៅកម្រិតឧត្តមសិក្សាសរុបមានចំនួន ១៩៨ ៣៦៣ នាក់ស្រី ៤៩,៧ ភាគរយ។
លោកថ្លែងថា៖ «ថ្វីដ្បិត ដំណើរការរៀន និងបង្រៀនក្នុងរយៈពេល ២ ឆ្នាំកន្លងមកត្រូវបានអាក់ខានដោយអន្លើ ដោយសារវិបត្តិកូវីដ ១៩ ក្រសួងអប់រំ បានបន្តអនុវត្តកម្មវិធីកំណែទម្រង់ និងបានប្រែក្លាយវិបត្តិកូវីដ ១៩ ទៅជាឱកាស»។
ក្រសួងបានបន្តធ្វើបច្ចុប្បន្នកម្មក្រុមប្រឹក្សាកុមារកម្ពុជា និងក្រុមប្រឹក្សាយុវជនកម្ពុជានៅតាមគ្រឹះស្ថានសិក្សា ដើម្បីជំរុញចលនា “បីល្អ កូនល្អ សិស្សល្អ មិត្តល្អ ដែលជាយន្តការដ៏មានសារៈសំខាន់ក្នុងការលើកកម្ពស់ការសិក្សាការងារស្វ័យគ្រប់គ្រងសាលារៀនគាំទ្រសកម្មភាព ក្លិប ការងារស្ម័គ្រចិត្ត និង ជួយបំប៉នបន្ថែមដល់សិស្សត្រៀមប្រឡងថ្នាក់ទី ១២។
លោក យី គីមថាន នាយករងប្រចាំប្រទេសនៃអង្គការភ្លែនអន្តរជាតិកម្ពុជា សង្កេតឃើញថា បច្ចុប្បន្ននេះកុមារភាគច្រើនបានត្រឡប់មកចូលរៀនវិញ ហើយសាលារៀននីមួយៗនៅតាមរាជធានី ខេត្ដ ក៏បានអនុវត្ដការរៀន និងការបង្រៀនទៅតាមកម្មវិធីសិក្សារបស់ក្រសួងអប់រំ។
លោកថ្លែងថា៖ «យើងឃើញថា វាមិនសូវជាមានផលអវិជ្ជមាន ឬផលជះច្រើនទៅលើកុមារទេ ដោយសារយើងមានកម្មវិធីច្រើនក្នុងការជួយលើកទឹកចិត្ដ និងជំរុញឱ្យកុមារត្រឡប់មករៀនវិញ»។
លោកបញ្ជាក់ថា អង្គការភ្លែននឹងបន្តជួយគាំទ្រដល់គ្រួសារដែលក្រីក្រនៅក្នុងខេត្ដគោលដៅ ដើម្បីជួយឱ្យកុមារបានត្រឡប់មករៀនសូត្រនៅសាលារៀនវិញ៕
