.jpg)
សាលាឧទ្ធរណ៍រាជធានីភ្នំពេញ។ រូបថត ភ្នំពេញ ប៉ុស្តិ៍
ភ្នំពេញៈ សាលាឧទ្ធរណ៍រាជធានីភ្នំពេញនៅថ្ងៃទី ៧ ខែមិថុនា បានយកសំណុំរឿងជនជាប់ចោទ ២ នាក់ ដែលសាលាដំបូងខេត្តពោធិ៍សាត់បានកាត់ទោសឱ្យជាប់ពន្ធនាគារ ៣០ ឆ្នាំ ក្នុងសំណុំរឿងអំពើអាបធ្មប់ បង្កឱ្យមនុស្សម្នាក់ស្លាប់ និងម្នាក់រងរបួស។
ជនជាប់ចោទទាំង ២ នាក់ក៏ត្រូវបានតុលាការបង្គាប់ឱ្យសងប្រាក់ទៅក្រុមគ្រួសារជនរងគ្រោះម្នាក់ៗ ៨ លានរៀលផងដែរ។ ជនជាប់ចោទទាំង ២ នាក់ ឈ្មោះ ឃុន ដារ៉ា អាយុ ៥៣ ឆ្នាំ និងឈ្មោះ ប៊ុន ចាន់ថន អាយុ ៥០ ឆ្នាំ ជាបងប្អូនបង្កើត ត្រូវបានសាលាដំបូងខេត្តពោធិ៍សាត់សម្រេចផ្ដន្ទាទោសកាលពីថ្ងៃទី ២០ ខែមីនា ឆ្នាំ ២០២០ ពីបទចោទឃាតកម្មគិតទុកជាមុន និង ហិង្សាមានស្ថានទម្ងន់ទោស ក្រោយពីកូនស្រីរបស់ជនជាប់ចោទ ឈ្មោះ ឃុន ដារ៉ា ស្លាប់ដោយសារជំងឺប្រចាំកាយ។
អំពើឃាតកម្មនេះ បានកើតឡើងនៅក្នុងភូមិ-ឃុំបឹងបត់កណ្ដាល ស្រុកបាកាន ខេត្តពោធិ៍សាត់ កាលពីចុងខែវិច្ឆិកា ឆ្នាំ ២០១៨។ កូនរបស់ជនជាប់ចោទមុនស្លាប់បានស្រែកថា អា ធូ ធន បានធ្វើអំពើអញបន្ទាប់មកនៅថ្ងៃដដែល ស្រាប់តែមានមនុស្សមួយក្រុមចូលទៅវាយឈ្មោះ ធូ ធន បណ្តាលឱ្យស្លាប់ និងប្រពន្ធរបស់គាត់ រងរបួស។
លោក ចៅក្រម ងួន រតនា ប្រធានក្រុមប្រឹក្សាជំនុំជម្រះក្រោយប្រើពេលជំនុំជម្រះជិត ២ ម៉ោងបានថ្លែងថា សាលដីកានេះនឹងប្រកាសនៅថ្ងៃទី ២៧ មិថុនា។
ទោះយ៉ាងណាក៏ដោយជនជាប់ចោទបានបដិសេធនៅចំពោះមុខសវនាការថា ពួកគេមិនបានប្រព្រឹត្តដូចការចោទប្រកាន់ទេ ហើយបានទាមទារដល់អង្គសវនាការឱ្យដោះលែងពួកគេឱ្យមានសេរីភាពឡើងវិញ។ រីឯមេធាវីជនជាប់ចោទមួយរូបក៏បានធ្វើសេចក្តីសន្និដ្ឋាន ក្នុងអង្គសវនាការថា សមត្ថកិច្ចចាប់ខ្លួនកូនក្តីរបស់លោកដោយគ្មានភ័ស្តុតាងគ្រប់គ្រាន់ ហើយទាមទារឱ្យមានការដោះលែងជនជាប់ចោទដែរ៕
