.jpg)
ដើមបណ្ដឹងរដ្ឋប្បវេណីករណីបាក់អគារនៅខេត្តព្រះសីហនុ ពេលចេញពីតុលាការកំពូលពីថ្ងៃទី៨ មិថុនា ។ រូបថត គឹម សារុំ
ភ្នំពេញៈតុលាការកំពូលនៅថ្ងៃទី ៨ មិថុនា បានលើកយកសំណុំរឿងបាក់រលំអគារស្លាប់កម្មករ ២២ នាក់ និងរបួស ២៤ នាក់នៅខេត្តព្រះសីហនុ កាលពីឆ្នាំ ២០១៩ មកជំនុំជម្រះ ខណៈបុរសជាប់ចោទជនជាតិចិនម្នាក់ជាម្ចាស់អគារ ព្រមសងទៅដើមបណ្ដឹងរដ្ឋប្បវេណីចំនួន ៥៣ នាក់ សរុបត្រឹមតែ ៣ ម៉ឺនដុល្លារ។
នៅក្នុងបន្ទប់សវនាការនៅថ្ងៃទី ៨ មិថុនា លោក គង់ តារាឆាត ដែលត្រូវបានផ្តល់សិទ្ធិពីលោក ជីវ កេង ប្រធានក្រុមប្រឹក្សាជំនុំជម្រះនៃតុលាការកំពូល បានអានអង្គហេតុនៅចំពោះមុខដើមបណ្តឹងរដ្ឋប្បវេណីប្រុសស្រីចំនួន ៣០ នាក់់ថា សំណុំរឿងនេះមានជនជាប់ចោទ ៤ នាក់។ ជនជាប់ចោទទី១- ឈ្មោះ CHENG KUN ភេទប្រុស អាយុ ៤២ ឆ្នាំ ជាជនជាតិចិន និងជាម្ចាស់អគាររលំ។ ទី២- ឈ្មោះ DENG XIN GUL ជនជនជាតិចិន ជាម្ចាស់ក្រុមហ៊ុនម៉ៅការសំណង់។ទី៣- ឈ្មោះGAO YU ភេទប្រុស ជាជនជាតិចិន និងជាអ្នកមើលការខុសត្រូវជាងសំណង់ និងឈ្មោះ XIE YA PING ភេទស្រី ជាជនជាតិចិន ហើយក៏ជាអ្នកមើលការខុសត្រូវក្នុងការដ្ឋានសំណង់ផងដែរ។
លោកបន្តថា ម្ចាស់អគារត្រូវបានសាលាដំបូងខេត្តព្រះសីហនុបើកសវនាការជំនុំជម្រះនិងប្រកាសសាលក្រមនៅថ្ងៃទី ៣០ កក្កដា ឆ្នាំ ២០២០ ផ្តន្ទាទោសដាក់ពន្ធនាគារ ៣ ឆ្នាំ ចោទពីបទមនុស្សឃាតដោយអចេតនា បង្កឱ្យមានរបួសស្នាមដោយអចេតនានិងបទធ្វើឱ្យខូចខាតមានស្ថានទម្ងន់ទោសដោយសារការបង្ករបួសស្នាមដល់អ្នកដទៃ។ ការចោទប្រកាន់នេះផ្អែកតាមមាត្រា ២០៧ មាត្រា ២៣៦ មាត្រា ២៩ នៃក្រមព្រហ្មទណ្ឌ។
ចំណែកឈ្មោះ ដេង ហ្ស៊ីនហ្គុល (DENG XIN GUL)ឈ្មោះ ហ្គៅ យូ (GAO YU) និងឈ្មោះហ្ស៊ី យ៉ាពីង (XIE YA PING) ឱ្យជាប់ពន្ធនាគារ៣ឆ្នាំដូចគ្នា ចោទពីបទសមគំនិតក្នុងអំពើមនុស្សឃាតដោយអចេតនា បង្កឱ្យមានរបួសស្នាមដោយអចេតនានិងបទធ្វើឱ្យខូចខាតមានស្ថានទម្ងន់ទោស ដោយសារការបង្ករបួសស្នាមដល់អ្នកដទៃ ។
តាមអង្គហេតុរបស់តុលាការកំពូលបង្ហាញថា ក្រៅពីការផ្តន្ទាទោសនេះ គឺតុលាការបង្គាប់ឱ្យជនជាប់ចោទទាំង ៤ នាក់ រួមគ្នាសងសំណងទៅជនរងគ្រោះស្លាប់ទាំង ២២ នាក់ ដែលក្នុងសពម្នាក់ត្រូវសងជំងឺចិត្ត ៦០ លានរៀល។ រីឯអ្នករបួសទាំង ២៤ នាក់ ត្រូវចេញសំណង ២០ លានទៅ ២០០ លានរៀល។
តាមអង្គហេតុដដែលបង្ហាញទៀតថា ដោយមិនសុខចិត្តនឹងសាលក្រមរបស់សាលាដំបូងខេត្តព្រះសីហនុ ជនជាប់ចោទទាំង៤នាក់បានប្តឹងឧទ្ធរណ៍ខេត្តព្រះសីហនុ ហើយត្រូវបានសាលាឧទ្ធរណ៍ព្រះសីហនុបើកសវនាការ និងប្រកាសសាលក្រមនៅថ្ងៃទី ៦ ឧសភា ឆ្នាំ ២០២១ ដោយបានតម្កល់ទោសនោះដដែល។
លោកចៅក្រម តារាឆាត បានថ្លែងថា៖ «តុលាការបានសម្រេចថា ប្រសិនបើជនជាប់ចោទគ្មានប្រាក់ក្នុងការសងសំណងជំងឺចិត្តទៅជនរងគ្រោះទេនឹងត្រូវឃុំខ្លួនបន្តទៀតដោយគិតទូទាត់នឹងថ្លៃសំណង។ជនជាប់ចោទបើទោះជាផុតកំណត់ទោសជាប់ពន្ធនាគារក៏ដោយក៏មិនអនុញ្ញាតឱ្យត្រឡប់ទៅប្រទេសចិនវិញដែរ បើមិនទាន់ទូទាត់សំណងអស់ទៅជនរងគ្រោះ»។
ជនជាប់ចោទ CHENG KUN បាននិយាយប្រាប់ចៅក្រមក្នុងបន្ទប់សវនាការតុលាការកំពូលនៅថ្ងៃទី ៨ មិថុនា តាមរយៈអ្នកបកប្រែថា គាត់សុខចិត្តទទួលខុសនូវអ្វីដែលបានកើតឡើងកាលពីទៀបភ្លឺថ្ងៃទី ២២ ខែ មិថុនា ឆ្នាំ ២០១៩។ ប៉ុន្តែគាត់មានលទ្ធភាពសងសំណងទៅដើមបណ្តឹងរដ្ឋប្បវេណីទាំង ៥៣ នាក់តែ ៣ ម៉ឺនដុល្លារទេ។
ជនជាប់ចោទនិយាយថា៖ «ខ្ញុំបានអនុវត្តទោសក្នុងពន្ធនាគារផុតកំណត់៣ឆ្នាំហើយហេតុអ្វីខ្ញុំនៅតែជាប់គុកទៀត? ខ្ញុំសុំឱ្យតុលាការកំពូលដោះលែងខ្ញុំបានទៅប្រទេសចិនវិញ»។
លោកស្រី ទន់ គីមហ៊ួយ ជាមេធាវីការពារសិទ្ធិឱ្យជនជាប់ចោទ CHENG KUN បានសន្និដ្ឋានក្នុងពេលសវនាការនៅថ្ងៃទី ៨ មិថុនាថា កូនក្តីរបស់លោកស្រីបានចុះកិច្ចសន្យាជាមួយអ្នកម៉ៅការសំណង់ត្រឹមត្រូវ ហើយលោកស្រីបានទាក់ទងទៅស្ថានទូតចិននៅកម្ពុជាដែលខាងទូតចិនប្រាប់លោកស្រីថា លោកនាយករដ្ឋមន្ត្រីបានឧបត្ថម្ភប្រាក់ដល់ជនរងគ្រោះអស់ហើយ។
លោក អែម ប៊ុន្នី ជាមេធាវីម្នាក់ក្នុងចំណោម ២ នាក់ ដែលការពារសិទ្ធិឱ្យជនរងគ្រោះនិងគ្រួសារសពជាដើមបណ្តឹងរដ្ឋប្បវេណីទាំង ៥៣ នាក់បានថ្លែងថា ជនជាប់ចោទមានប្រាក់តែ ៣ ម៉ឺនដុល្លារទេ សងទៅជនរងគ្រោះ ប៉ុន្តែប្រាក់ ៣ ម៉ឺនដុល្លារនេះ មិនសមនឹងការខូចខាតនិងបាត់បង់ជីវិតមនុស្សដល់ទៅ ២២ នាក់ទេ រួមនឹងរបួស ២៤ នាក់ផង។
លោកបានបន្តថា តាមពិតសំណង់អគារនោះគ្មានច្បាប់ពីអាជ្ញាធរដើម្បីឱ្យសាងសង់ទេ ហើយជនជាប់ចោទ CHENG KUN ជាម្ចាស់សំណង់អគារមានសិទ្ធិចេញចូលត្រួតពិនិត្យសំណង់អគារនោះ ព្រោះមុនកើតហេតុខាងវិស្វករថា តួអគារនោះបានទ្រេតចេញពីជំហរដើម ២ តឹក ចុះហេតុអ្វីនៅតែឱ្យជាងសង់បន្ថែម ២ ជាន់ទៀត?
លោកបានបញ្ជាក់ថា៖ «សំណង់នេះមិនសមនឹងការបាត់បង់ជីវិតមនុស្សទេ ហើយកុំយកជំនួយមនុស្សធម៌របស់សម្តេច ហ៊ុន សែន ទៅជាសំណង់រដ្ឋប្បវេណីអី។ ករណីនេះខ្ញុំស្នើសុំតុលាការកំពូលពិចារណា»។
លោក ប៉ែន សារ៉ាត តំណាងមហាអយ្យការនៃតុលាការកំពូលបានសន្និដ្ឋានថា ករណីនេះក្នុងនាមលោកជាតំណាងមហាអយ្យការ លោកស្នើសុំតម្កល់សាលដីការបស់សាលាឧទ្ធរណ៍ព្រះសីហនុទុកនៅដដែល។
កញ្ញា សូ ម៉ី អាយុ ២១ ឆ្នាំ រស់នៅភូមិព្រៃទទឹង ឃុំអង្គសុភី ស្រុកកំពង់ត្រាច ខេត្តកំពត ដែលមានបងប្រុស ឈ្មោះ សូ សំណាង អាយុ ២៦ ឆ្នាំ និងប្អូនប្រុសឈ្មោះ សូ ភ័ត្រា ភេទប្រុសអាយុ ១៦ ឆ្នាំស្លាប់ក្នុងហេតុការណ៍នោះ បាននិយាយក្រោយចេញពីអង្គសវនាការក្នុងចំណោមគ្រួសារជនរងគ្រោះទាំង ៣០ នាក់ថា ជនជាប់ចោទព្រមសងតែ ៣ ម៉ឺនដុល្លារទៅជនរងគ្រោះទាំងអស់ តែនាងមិនយល់ព្រមទេ។
កញ្ញាថ្លែងថា កាលពីបងប្អូននាងស្លាប់ភ្លាម គ្រួសាររបស់នាងទទួលបានប្រាក់ឧបត្ថម្ភពីលោកនាយករដ្ឋមន្រ្តី ហ៊ុន សែន ក្នុងសពម្នាក់ ១ ម៉ឺនដុល្លារ៖ «កាលពីដំបូងឪពុកខ្ញុំដាក់ពាក្យបណ្តឹងទារសពម្នាក់ ៦ ម៉ឺនដុល្លារ ហើយខ្ញុំមកនេះគឺចង់ទាមទារសំណងនេះឯង»។
ក្រោយជំនុំជម្រះប្រមាណ ២ ម៉ោងមក លោក ចៅក្រម ជីវ កេង ប្រធានក្រុមប្រឹក្សាជំនុំជម្រះថ្លែងថា សាលដីកានេះនឹងប្រកាសនៅថ្ងៃទី ១៥ មិថុនា ខាងមុខនេះ៕
