ភ្នំពេញៈ គណបក្សប្រជាជនកម្ពុជា នឹងរៀបចំសន្និបាតគណៈកម្មាធិការកណ្តាលវិសាមញ្ញរយៈពេល ២ ថ្ងៃ នៅខែកក្កដា ឆ្នាំ ២០២២ ដើម្បីវាយតម្លៃពីលទ្ធផលនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ និងត្រៀមដាក់ចេញនូវយុទ្ធសាស្ត្របន្តសម្រាប់ការបោះឆ្នោតជ្រើសរើសតំណាងរាស្ត្រឆ្នាំ ២០២៣។ យោងតាមអ្នកនាំពាក្យគណបក្សកាន់អំណាច។
យោងសេចក្តីជូនដំណឹងរបស់ប្រធានខុទ្ទកាល័យគណបក្សប្រជាជនកម្ពុជា ចុះថ្ងៃទី ៧ ខែមិថុនានេះ បានឱ្យដឹងថា គណៈអចិន្ត្រៃយ៍នៃគណៈកម្មាធិការកណ្តាល បានសម្រេចកោះប្រជុំសន្និបាតគណៈកម្មាធិការកណ្តាលវិសាមញ្ញរបស់គណបក្សប្រជាជនកម្ពុជា នៅថ្ងៃទី ៩-១០ ខែ កក្កដា ឆ្នាំ ២០២២ នៅវិមាន ៧ មករា រាជធានីភ្នំពេញ។
អ្នកនាំពាក្យគណបក្សប្រជាជនកម្ពុជាលោក សុខ ឥសាន ប្រាប់ ភ្នំពេញ ប៉ុស្តិ៍ នៅថ្ងៃទី ៨ ខែមិថុនានេះថា លោកមិនទាន់បានទទួលនូវរបៀបវារៈនៃកិច្ចប្រជុំនោះនៅឡើយទេ។ ប៉ុន្តែលោកថា តាមការប៉ាន់ស្មាន កិច្ចប្រជុំនោះ នឹងផ្តោតសំខាន់ទៅលើការវាយតម្លៃដកពិសោធ អំពីលទ្ធផលនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ ថ្មីៗកន្លងទៅនេះ ដើម្បីដាក់ទិសដៅយកជ័យជម្នះ សម្រាប់ការបោះឆ្នោតថ្នាក់ជាតិនៅឆ្នាំ ២០២៣ ជ្រើសតាំងតំណាងរាស្ត្រ។
លោកថា៖ «តាមតួរលេខនៃការបោះឆ្នោតកន្លងទៅថ្មីនេះៗ ជាតួរលេខដែលមានសូចនាល្អ ហើយយើងវាតម្លៃថាការបោះឆ្នោតនេះ ជាជោគជ័យរបស់ប្រជាជនកម្ពុជាទូទាំងប្រទេស ដែលប្រជាជនបានសម្តែងឆន្ទៈក្នុងការជ្រើសរើសគណបក្សប្រជាជនកម្ពុជា ដែលមានកម្មវិធីនយោបាយត្រឹមត្រូវល្អ ដើម្បីបម្រើប្រទេសជាតិ និងប្រជាជនឱ្យមានការរីកចម្រើនតទៅមុខទៀត»។
លោកបានគូសបញ្ជាក់ថា លោកមិនទាន់ដឹងពីរបៀបវារៈផ្សេងនោះទេ ក៏ប៉ុន្តែជាសំខាន់ គឺចៀសមិនផុតអំពីការវាយតម្លៃចំណុចខ្លាំង និងចំណុចខ្សោយ និងជ័យជម្នះ ដែលគណបក្សបានទទួលយ៉ាងធំធេងចំពោះការបោះឆ្នោតឃុំ-សង្កាត់កន្លងទៅថ្មីៗនេះ។
លោកបានបន្តថា ចំពោះចំណុចខ្សោយមិនមែនជាគោលនយោបាយ ឬកម្មវិធីនយោបាយរបស់គណបក្សទេ ប៉ុន្តែចំណុចខ្សោយកើតឡើងចំពោះមន្ត្រីមួយចំនួនតូចដែលមានការយល់ដឹងទាប ដែលយកគោលនយោបាយរបស់បក្សទៅប្រើខុសគោលដៅ។
លោកថា៖ «ព្រោះយើងដឹងហើយថាមន្ត្រីយើងរាប់ពាន់ រាប់សែននាក់ របស់គណបក្សប្រជាជន មិនមានការយល់ដឹងដូចៗគ្នាទេ ដូច្នេះការអនុវត្ត យកកម្មវិធីនយោបាយរបស់គណបក្សប្រែក្លាយទៅជាការអនុវត្តជាក់ស្តែង ក៏មានលក្ខណៈខុសៗគ្នាដែរ ចំណុចខ្សោយទាំងនេះហើយ ដែលគណបក្សនឹងលើកបញ្ហានេះ ដកពិសោធ និងកែលម្អឡើងវិញចំពោះអ្នកដែលមានសកម្មភាពខ្វះខាតទៅលើចំណុចមួយចំនួនតូចនោះ»។
ប្រធានវិទ្យាស្ថានប្រជាធិបតេយ្យកម្ពុជាលោក ប៉ា ចន្ទរឿន ថ្លែងថា សន្និបាតនោះ គឺជាកិច្ចការផ្ទៃក្នុងរបស់គណបក្ស ដោយលោកមិនទាន់ទទួលបានព័ត៌មានលម្អិតថា គណបក្សកាន់អំណាចនឹងលើកយកចំណុចសំខាន់ៗអ្វីខ្លះមកពិភាក្សានោះទេ។ ប៉ុន្តែការកោះប្រជុំនាពេលនេះ គណបក្សប្រជាជននឹងផ្តោតសំខាន់លើជុំវិញលទ្ធផលបោះឆ្នោត ដើម្បីដាក់ចេញនូវគោលយោបាយបន្តបន្ទាប់។
លោកថា៖ «មើលជារួមថា អាចប្រជុំបូកសរុបអំពីដំណើរការនៃការចូលរួមប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ ក៏ដូចជាឆ្លុះបញ្ចាំងទៅលើលទ្ធផល និងគិតអំពីយុទ្ធសាស្ត្រត្រៀមសម្រាប់បោះឆ្នោតថ្នាក់ជាតិនៅឆ្នាំក្រោយ»។
លោកថ្លែងថា សម្រាប់គោលនយោបាយទាំងប៉ុន្មានចំណុចរបស់គណបក្សប្រជាជន មិនមានអីប្លែកខ្លាំងខុសពីអ្វីដែលរដ្ឋាភិបាលក៏ដូចជាស្ថាប័ន ឃុំ-សង្កាត់ ដែលស្ថិតនៅក្រោមការងារគ្រប់គ្រងរបស់គណបក្សប្រជាជនដែលជាគណបក្សកាន់អំណាចទេ។ ប៉ុន្តែអ្វីដែលគណបក្សខ្វះខាតនោះ គឺការសន្យារបស់គណបក្សដែលមិនទាន់បំពេញបានត្រឹមត្រូវជូនម្ចាស់ឆ្នោត បើទោះបីជាគណបក្សមានគោលនយោបាយល្អក៏ដោយ។
លោកថា៖ «ឧទាហរណ៍ជាក់ស្តែង ទាក់ទងរឿងភូមិ-ឃុំ មានសុវត្ថិភាព ការថែរក្សាបរិស្ថាន ឬការដោះស្រាយនៅមូលដ្ឋានជូនប្រជាពលរដ្ឋទាន់ពេលវេលា និងបញ្ហាជាច្រើនដែលនៅមិនទាន់ដោះស្រាយបាន។ អ្វីដែលជាបញ្ហាគឺកង្វះការត្រួតពិនិត្យតាមដានអំពីការឆ្លើយតប និងការបំពេញពាក្យសន្យារបស់គណបក្ស ដែលបានដាក់ចូលទៅក្នុងគោលនយោបាយ»។
យ៉ាងណាក៏ដោយអ្នកនាំពាក្យគណបក្សប្រជាជនកម្ពុជា លោក សុខ ឥសាន បានលើកឡើងថា គណបក្សប្រជាជនកម្ពុជាមិនមានការកែប្រែកម្មវីធីនយោបាយបក្សធំដុំទេ ព្រោះគណបក្សមានបទពិសោធរួចមកហើយទើបធ្វើឱ្យគណបក្សនៅតែទទួលបានការគាំទ្រពីប្រជាជនទូទាំងប្រទេស។
លោកថាបន្តថា កម្មវីធីនយោបាយរបស់គណបក្សប្រជាជនកម្ពុជា មានលក្ខណៈត្រឹមត្រូវ ល្អប្រសើរ ដែលផ្សារភ្ជាប់នឹងផលប្រយោជន៍ជាតិ និងប្រជាជន។ បក្សមានបទពិសោធដោយសារមន្ត្រី គ្រប់ជាន់ថ្នាក់របស់គណបក្សធ្វើការដោយដាក់ខ្លួនដាក់កាយបម្រើប្រជាជន ដោយសារស្មោះត្រង់ ដើម្បីគិតគូរជាធំផលប្រយោជន៍របស់ប្រជាជន ត្រង់នេះហើយដែលធ្វើឱ្យប្រជាជន មានមនោសញ្ចេតនាយ៉ាងជ្រាលជ្រៅចំពោះមន្ត្រីគ្រប់ជាន់ថ្នាក់ របស់គណបក្ស។ បក្សបានខិតខំកសាងនូវបណ្តាសមិទ្ធផលនានាទូទាំងប្រទេសតាំងពីជនបទរហូតដល់ទីក្រុង ឃើញថា សុទ្ធតែជាសមិទ្ធផលដែលជាស្នាដៃរបស់គណបក្សប្រជាជន។
លោកគូសបញ្ជាក់ថា៖ «ចំណុច (ខាងលើនេះ) ហើយដែលជាគន្លឹះ ធ្វើឱ្យប្រជាជនមើលឃើញយ៉ាងច្បាស់ថា កម្មវិធីនយោបាយត្រឹមត្រូវ ឆ្លុះបញ្ចាំងអំពីផលប្រយោជន៍ប្រជាជន ការដាក់ខ្លួនដាក់កាយបម្រើប្រជាជនដោយស្មោះត្រង់ ក៏វាផ្សារភ្ជាប់ទៅនឹងផលប្រយោជន៍ជាតិ និងប្រជាជន ទាំងនេះហើយដែលធ្វើឱ្យប្រជាជននៅបន្តគាំទ្រគណបក្សប្រជាជនភ្លូកទឹកភ្លូកដី ចំពោះការដឹកនាំរបស់គណបក្ស៕