.jpg)
តារាងបាល់ទាត់ដែលបាក់រលំដោយសារភ្លៀងលាយ ខ្យល់កន្ត្រាក់នៅភ្នំពេញ ពីល្ងាចថ្ងៃទី៧ មិថុនា ។ រូបថត សហការី
ភ្នំពេញៈ តារាងបាល់ទាត់ហ្វូតសាល ១ កន្លែង នៅភូមិគោកចំបក់ក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ បានដួលរលំខូចខាតជាខ្លាំង បន្ទាប់ពីមានភ្លៀងខ្យល់ ១ មេធំ កាលពីល្ងាចថ្ងៃទី ៧ ខែមិថុនា ប៉ុន្តែមិនបង្កគ្រោះថ្នាក់ដល់មនុស្សឡើយ។ នេះបើតាមសម្ដីមន្ត្រីនគរបាលមូលដ្ឋាន។
លោក សាយ ចំរើន នាយប៉ុស្ដិ៍នគរបាលសង្កាត់ចោមចៅទី១ បានប្រាប់ ភ្នំពេញ ប៉ុស្តិ៍ នៅថ្ងៃទី ៨ មិថុនាថា មុនពេលមានភ្លៀងខ្យល់កើតឡើង មានយុវជន ២ ក្រុមបាននាំគ្នាលេងទាត់បាល់នៅក្នុងតារាបាល់នោះ។ លុះដល់កន្លះម៉ោងក្រោយពីពួកគេឈប់លេងក៏មានភ្លៀង ១ មេធំកើតឡើងព្រមទាំងមានខ្យល់កន្ត្រាក់បក់បោកចំទីតាំងតារាងបាល់ទាត់នោះបណ្ដាលឲ្យដួលរលំខូចខាតជាខ្លាំង។
លោកបានបញ្ជាក់ថា៖ «វាពិតជាគួរខ្លាចព្រោះសូម្បីតែបង្គោលតារាងបាល់នោះសង់ពីដែក និងចាក់សាបជាប់ទៅនឹងដីហើយក្ដី ក៏ខ្យល់កន្ត្រាក់នោះបក់កញ្ឆក់ទាញផ្ដួលរំលំបាន។ វាក៏ជាសំណាង ១ ដែរ ដែលក្រុមយុវជនទាំង ២ ក្រុមនោះ បាននាំគ្នាឈប់លេងមុនហេតុការណ៍កើតឡើងដែលមិនបង្កឲ្យមានអ្នករងរបួស និងស្លាប់»។
ជុំវិញករណីភ្លៀងលាយឡំខ្យល់កន្ត្រាក់នេះ ក្រសួងធនធានទឹកនិងឧតុនិយមនៅថ្ងៃ ៧ ខែមិថុនា បានចេញសេចក្ដីជូនដំណឹងថា ក្នុងសប្ដាហ៍នេះនឹងមានភ្លៀងធ្លាក់ច្រើន ដោយអន្លើនិងមានលាយឡំខ្យល់កន្ត្រាក់និងផ្គររន្ទះកើតឡើងផងដែរ ជាពិសេសនៅតាមតំបន់វាលទំនាបកណ្ដាល និងតំបន់ទីទំនាបជាប់ជួរភ្នំក្រវាញ ភាគពាយព្យ។
ផ្អែកតាមការពិនិត្យអំពីស្ថានភាពអាកាសធាតុប្រចាំថ្ងៃឃើញថា ឥទ្ធិពលពីជ្រលងសម្ពាធទាប ដែលអូសបន្លាយនៅលើភាគខាងជើងប្រទេសឡាវ និងវៀតណាមព្រមជាមួយខ្យល់មូសុងនិរតីបក់ក្នុងល្បឿនមធ្យមផងនោះ ក្រុមមន្ត្រីជំនាញផ្នែកឧតុនិយមបានព្យាករថា ប្រទេសកម្ពុជា ចាប់ពីថ្ងៃទី ៨ ដល់ថ្ងៃទី ១៤ ខែមិថុនា ខាងមុខនេះ នឹងមានភ្លៀងធ្លាក់ច្រើនលាយឡំទៅដោយផ្គរ រន្ទះ និងខ្យល់កន្ត្រាក់បក់បោកខ្លាំង។
សេចក្ដីជូនដំណឹងនោះបានបញ្ជាក់ថា៖ «តំបន់វាលទំនាបកណ្ដាល និងភាគពាយព្យរួមទាំងតំបន់វាលទំនាបជាប់ខ្ពង់រាបឦសាននឹងមានភ្លៀងធ្លាក់ច្រើនដោយអន្លើព្រមទាំងមានខ្យល់កន្ត្រាក់ និងផ្គររន្ទះកើតមានច្រើនផងដែរ។ ពលរដ្ឋដែលរស់នៅក្នុងភូមិសាស្ត្រនៃតំបន់ទាំងនេះគប្បីបង្កើនការប្រុងប្រយ័ត្ន»។
គ្រោះធម្មជាតិភ្លៀងលាយឡំខ្យល់កន្ត្រាក់ និងផ្គររន្ទះក្នុងរយៈពេល ៥ ខែ ដើមឆ្នាំ ២០២២ បានបណ្ដាលឲ្យមនុស្សយ៉ាងហោចណាស់ ២៥ នាក់ស្លាប់ និង ៣៣ នាក់ទៀតបានរងរបួសធ្ងន់ និងស្រាល។ នេះបើតាមទិន្នន័យរបស់គណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម) ដែល ភ្នំពេញ ប៉ុស្តិ៍ ទទួលបាននៅថ្ងៃទី ៨ ខែ មិថុនា ឆ្នាំ ២០២២។
ទិន្នន័យនោះបានបង្ហាញថា បាតុភូតភ្លៀងលាយឡំខ្យល់កន្ត្រាក់បានកើតឡើងចំនួន ៧៩ លើក បង្កប៉ះពាល់ និងខូចខាតផ្ទះប្រជាពលរដ្ឋសរុប ២ ៣២៥ ខ្នង ក្នុងនោះផ្ទះចំនួន ៥៣៧ ខ្នង បានដួលរលំខូចខាតទាំងស្រុង ព្រមទាំងខូចខាតដំបូលអគារសាលារៀនចំនួន ១៨ អគារ ហើយ «មនុស្សចំនួន ៣ នាក់បានស្លាប់ និង ១៦ នាក់ទៀតបានរងរបួសធ្ងន់ និងស្រាលដោយករណីបាក់រលំផ្ទះសង្កត់លើ» ។
តាមរយៈទិន្នន័យដដែលនោះបាតុភូតផ្គររន្ទះ ឬបាតុភូតរន្ទះបាញ់បានកើតឡើងចំនួន ៤៦ លើក បណ្ដាលឱ្យ «មនុស្សចំនួន ២២ នាក់ស្លាប់ និង ១៧ នាក់ទៀតរងរបួសព្រមទាំងបណ្ដាលឲ្យងាប់សត្វគោក្របីប្រជាពលរដ្ឋសរុបចំនួន ៥៣ ក្បាល»៕
