.jpg)
ទីតាំងផ្ទះកើតហេតុ។ រូបថត ហ្វេសប៊ុក
ស្វាយរៀងៈ បុរសជាឪពុកវ័យចំណាស់ម្នាក់ដែលស្រវឹងស្រា បានដុតផ្ទះបណ្តាលឱ្យឆេះស្លាប់ និងធ្វើឱ្យកូនប្រសារប្រុសរបស់គាត់ រងរបួសធ្ងន់ នៅចំណុចភូមិបឹងអណ្តែង ឃុំតាសួស ស្រុកស្វាយជ្រំ ខេត្តស្វាយរៀង កាលពីវេលាម៉ោង ៧ យប់ថ្ងៃទី ៧ ខែ មីនា ឆ្នាំ ២០២២។
លោក ពិន អាន អធិការស្រុកស្វាយជ្រុំ បានប្រាប់ ភ្នំពេញ ប៉ុស្តិ៍ នៅថ្ងៃទី ៨ មិថុនាថា បុរសរងគ្រោះជាឪពុក ដែលបានស្លាប់នៅក្នុងគ្រោះថ្នាក់ភ្លើងឆេះផ្ទះនោះឈ្មោះ ម៉ម យ៉ាវ អាយុ ៧២ ឆ្នាំ រស់នៅផ្ទះជាមួយកូនប្រុស របស់គាត់ឈ្មោះ នឹម និត អាយុ ៣២ ឆ្នាំ ជាកម្មករសំណង់ មានទីលំនៅ ក្នុងភូមិ-ឃុំ កើតហេតុខាងលើ។
ចំណែកកូនប្រសារប្រុសរបស់គាត់ ដែលរងរបួសធ្ងន់ នៅក្នុងហេតុការណ៍ភ្លើងឆេះផ្ទះនោះដែរ ឈ្មោះ ឈួន សារី អាយុ ៥០ ឆ្នាំ មានមុខរបរជាកសិករ និងមានទីលំនៅក្បែរផ្ទះកើតហេតុ។
លោកបានបញ្ជាក់ថា៖ «តាមសម្ដីជនរងគ្រោះជាកូនប្រសារ ករណីអគ្គិភ័យនេះ បណ្ដាលមកពីបុរសជាឪពុកក្មេក ស្រវឹងស្រា ហើយមានចេតនាដុតផ្ទះចោលក្នុងគោលបំណងធ្វើអត្តឃាត»។
លោកបានបន្តថា នៅពេលបុរសជាឪពុក ធ្វើសកម្មភាព កូនប្រុសគាត់ឈ្មោះ នឹម និត និងកូនប្រសារស្រី ដែលជាប្រពន្ធរបស់ នឹម និតនោះ នៅមិនទាន់ត្រឡប់ពីធ្វើការវិញទេ គឺមានតែចៅរបស់គាត់ ២-៣ នាក់តូចៗប៉ុណ្ណោះ។
យោងទៅលើការបំភ្លឺរបស់ក្មេងៗ ដែលបានឃើញហេតុការណ៍នោះផ្ទាល់ភ្នែក ដំបូងបុរសរងគ្រោះឈ្មោះ ម៉ម យ៉ាវ បានផឹកស្រាស្រវឹង ហើយឡើងលើផ្ទះចាក់សោរទ្វារផ្ទះ មិនឱ្យចៅៗរបស់គាត់ឡើងនោះទេ បន្ទាប់មកគាត់បានកេះដែកកេះដុតក្រមា និងសម្លៀកបំពាក់ចាស់ៗរបស់គាត់ ហើយបន្តដុតខ្នើយ ភួយ មុង និងកន្ទេល ដែលគាត់ដេក បណ្ដាលឱ្យឆេះរនៀបក្ដារផ្ទះ បង្កជាអគ្គិភ័យឆេះផ្ទះ តែម្ដង។
បន្ទាប់ពីឃើញភ្លើងឆេះផ្ទះ ក្មេងៗបានរត់ទៅប្រាប់ឪពុកធំរបស់គេ គឺលោក ឈួន សារី ឱ្យមកជួយ។
លោកបានបន្ថែមថា៖ «លោកសារី បានទៅជួយទំលាយទ្វារផ្ទះ ចូលទៅជួយឪពុកក្មេករបស់គាត់ដែរ តែជួយមិនបាន ថែមទាំងធ្វើឱ្យគាត់ឆេះរលាកពេញទាំងខ្លួនទៀត ព្រោះពេលដែលគាត់ទៅដល់ អណ្ដាតភ្លើងឆាបឆេះយ៉ាងពេញទំហឹង ហើយឪពុកក្មេករបស់គាត់ បានថប់ដង្ហើមស្លាប់បាត់ទៅហើយ។ បច្ចុប្បន្នគាត់ កំពុងសម្រាកព្យាបាលនៅមន្ទីរពេទ្យនៅឡើយ»។
បើតាមលោក ពិន អាន ក្រៅពីបង្កឱ្យមានអ្នកស្លាប់ និងរងរបួស អគ្គិភ័យនោះ បានបង្កការខាតបង់ផ្ទះសង់អំពីឈើទំហំ ៧ ម៉ែត្រ X ៨ ម៉ែត្រ ដំបូលប្រក់ស័ង្កសី ក្រាលក្ដារ អស់ជាង៦០ភាគរយ ខាតបង់មាស ៥ ជី ប្រាក់ដុល្លារ ៦០០ ដុល្លារ ស្រូវ ១៥ បាវ ទូដាក់ខោអាវ១ និងឯកសារប្លង់ដីចំនួន២ប្លង់ក្បាលដី អត្តសញ្ញាណប័ណ្ណ សំបុត្រកំណើត សៀវភៅ ក២.ក៤ និងសម្ភារប្រើប្រាស់មួយចំនួនធំ។ ប៉ុន្តែមិនបានឆេះរាលដាលដល់ផ្ទះអ្នកដទៃនោះទេ៕
