សៀមរាបៈ នគរបាលក្រុងសៀមរាប នឹងបញ្ជូនយុវជន ២ នាក់ ទៅស្នងការដ្ឋាននគរបាលខេត្តសៀមរាប នៅថ្ងៃ ៩ មិថុនា ក្រោយពីចាប់ខ្លួនបាន ២ ថ្ងៃ ករណីកែច្នៃរំសេវផាវបំផ្ទុះដាក់ភាគីទំនាស់ម្ខាងទៀត ប្រព្រឹត្តនៅយប់ថ្ងៃទី ៣ មិថុនា ឆ្នាំ ២០២២ នៅភូមិស្វាយដង្គំ សង្កាត់ស្វាយដង្គំ ក្រុងសៀមរាប។
លោក ដា ចំរើន អធិការនគរបាលក្រុងសៀមរាបឱ្យដឹងនៅថ្ងៃទី ៨ មិថុនាថា ជនសង្ស័យមានឈ្មោះ សេង សុកន ភេទប្រុស អាយុ ១៨ ឆ្នាំ ជាសិស្សរៀនជួសជុលម៉ូតូ ស្នាក់នៅបណ្តោះអាសន្ន បន្ទប់ជួលក្នុងភូមិតាភុល សង្កាត់ស្វាយដង្គំក្រុង-ខេត្តសៀមរាប និងឈ្មោះ រ៉ន ដារ៉ុង ហៅហ៊ីង ភេទ ប្រុស អាយុ ២០ ឆ្នាំ ជាសិស្សរៀនជួសជុលម៉ូតូ រស់នៅភូមិព្រៃស្រមោច ឃុំកំពង់ឃ្លាំង ស្រុកសូទ្រនិគម ខេត្តសៀមរាប។
លោកថ្លែងថា៖ «សមត្ថកិច្ចក្រុងសៀមរាប បានបញ្ចប់នីតិវិធីស៊ើបសួរជនសង្ស័យហើយនៅថ្ងៃនេះ (ថ្ងៃទី ៨ មិថុនា) ហើយខ្ញុំនឹងបញ្ជូនបន្តទៅស្នងការដ្ឋាននគរបាលខេត្តសៀមរាប នៅថ្ងៃស្អែក (ថ្ងៃទី ៩ មិថុនា)។ ក្រុមជនសង្ស័យសង្ស័យគ្រាន់តែបំផ្ទុះរំសេវផាវទេ»។
លោក ដា ចំរើន រៀបរាប់ថា កាលពីវេលាម៉ោងជិត ៨ យប់ថ្ងៃទី ៣ មិថុនា ឆ្នាំ ២០២២ សមត្ថកិច្ចរបស់លោកទទួលបានសេចក្តីរាយការណ៍ ពីសមត្ថកិច្ចមូលដ្ឋានថា មានជនមិនស្គាល់អត្តសញ្ញាណបានបំផ្ទុះគ្រាប់រំសេវនៅលើផ្លូវបេតុង ស្ថិតនៅខាងកើតស្នាក់ការគណបក្សប្រជាជនកម្ពុជា ក្នុងភូមិស្វាយដង្គំ សង្កាត់ស្វាយដង្គំ ក្រុង-ខេត្តសៀមរាប បង្កឡើងដោយជនសង្ស័យ មិនស្គាល់អត្តសញ្ញាណជិះម៉ូតូមួយគ្រឿង ។
លោកបន្តថា ក្រោយពីទទួលបានសេចក្តីរាយការណ៍មក កម្លាំងសមត្ថកិច្ចរបស់លោក បានចុះដល់ទីតាំងកើតហេតុ និងបានឆែកមើលតាមកាមេរ៉ាសុវត្ថិភាពអស់រយៈពេល ៣ ថ្ងៃ ទើបកំណត់បានមុខសញ្ញាជនសង្ស័យ និងចាប់បាននៅថ្ងៃទី ៧ ខែ មិថុនា ឆ្នាំ ២០២២។
ជនសង្ស័យបានឆ្លើយសារភាពថា មិត្តរបស់គាត់ប្រាប់ថា ត្រូវគេវាយ ហើយគាត់ប្រាប់ទៅមិត្តរបស់គាត់ថា គាត់ចេះផលិតគ្រាប់រំសេវផ្ទុះ។
បន្ទាប់មកគាត់ បានទៅរកទិញផាវគ្រាប់បាល់យកមកផលិតជាគ្រឿងផ្ទុះ ដោយយករំសេវផាវគ្រាប់បាល់ មកលាយជាមួយនឹងថ្មខ្មៅម៉ិច រួចដាក់ចូលក្នុងថង់ ហើយរុំស្គុតឱ្យណែនធ្វើបាន ៥គ្រាប់។
បន្ទាប់មកជននេះ ក៏ជិះម៉ូតូទៅបោកតែម្តងតែមិនបណ្តាលឱ្យនរណាម្នាក់រងគ្រោះថ្នាក់ទេ៕