.jpg)
លោក ទៀ បាញ់ ក្នុងកិច្ចប្រជុំ ១ កាលពីចុងខែឧសភា។ រូបថត SPS
ភ្នំពេញៈ ប្រមុខការពារជាតិ លោក ទៀ បាញ់ ក្នុងកិច្ចប្រជុំកំពូលសន្តិសុខអាស៊ី នាចុងសប្តាហ៍នេះនឹងថ្លែងការណ៍អំពី «ទំនើបកម្មយោធា និងសមត្ថភាពការពារជាតិថ្មីៗ» ដោយផ្តោតលើទស្សនៈ និងបញ្ហាប្រឈមនានា ដែលអាចបង្កឡើងដោយការអភិវឌ្ឍវិស័យយោធាយ៉ាងលឿននៅក្នុងតំបន់ និងមុខងារដែលសមត្ថភាពថ្មីៗទាំងនោះអាចដើរតួនាទីក្នុងការរក្សាតុល្យភាពស្ថិរភាពតំបន់។ នេះបើតាមសេចក្ដីប្រកាសព័ត៌មាន។
សេចក្ដីប្រកាសព័ត៌មានរបស់ក្រសួងការពារជាតិ ពីថ្ងៃទី ៧ មិថុនា ឱ្យដឹងថា តបតាមការអញ្ជើញរបស់លោកបណ្ឌិត ចន ឈីបមែន អគ្គនាយក និងជាប្រធានប្រតិបត្តិនៃវិទ្យាស្ថានអន្តរជាតិសម្រាប់សិក្សាយុទ្ធសាស្ត្រ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ លោក ទៀ បាញ់ នឹងដឹកនាំគណៈប្រតិភូជាន់ខ្ពស់នៃកងយោធពលខេមរភូមិន្ទទៅចូលរួមកិច្ចប្រជុំកំពូលសន្តិសុខអាស៊ីលើកទី ១៩ (កិច្ចសន្ទនាសាំងហ្គីឡា) ដែលនឹងប្រព្រឹត្តទៅនៅថ្ងៃទី ១០-១២ មិថុនា ឆ្នាំ ២០២២ នៅប្រទេសសិង្ហបុរី។
កិច្ចប្រជុំកំពូលឆ្នាំ ២០២២ នេះនឹងមានកិច្ចពិភាក្សាក្នុងសម័យប្រជុំពេញអង្គចំនួន ៧ លើប្រធានបទ ដូចជា ទី ១ ជំហានបន្ទាប់នៃយុទ្ធសាស្ត្រឥណ្ឌូប៉ាស៊ីហ្វិកសហរដ្ឋអាមេរិក។ ទី ២ ការគ្រប់គ្រងការប្រកួតប្រជែងភូមិសាស្ត្រនយោបាយក្នុងតំបន់ពហុប៉ូល។ ទី ៣ ការបង្កើតទម្រង់ថ្មីនៃកិច្ចសហប្រតិបត្តិការសន្តិសុខ។ ទី ៤ ទំនើបកម្មយោធា និងសមត្ថភាពការពារជាតិថ្មីៗ។ ទី ៥ ចក្ខុវិស័យរបស់ប្រទេសចិនទៅលើសណ្តាប់ធ្នាប់តំបន់។ ទី ៦ បញ្ហាប្រឈមតាមអ៊ីនធឺណិត និងការវិវឌ្ឍនៃបច្ចេកវិទ្យាការពារជាតិ និង ទី ៧ គំនិតថ្មីសម្រាប់ការធានាស្ថិរភាពក្នុងតំបន់។
កិច្ចប្រជុំកំពូលនេះ ក៏នឹងមានក្រុមពិភាក្សាតូចៗក្នុងសម័យប្រជុំពិសេសចំនួន ៤ ផងដែរ ក្នុងនោះមានទី ១ សន្តិសុខអាកាសធាតុ និងវិស័យការពារជាតិបៃតង ទី ២ តួនាទីអាវុធនុយក្លេអ៊ែរក្នុងសន្តិសុខតំបន់។ ទី ៣ បញ្ហាមីយ៉ាន់ម៉ា (ការស្វែងរកវិធីសាស្ត្រឆ្ពោះទៅមុខ) និងទី ៤ សន្តិសុខលម្ហសមុទ្រ (ពីក្រមសីលធម៌ឈានទៅទំនាក់ទំនងនៅពេលមានវិបត្តិ)។ នេះបើតាមសេចក្ដីប្រកាសព័ត៌មាន។
សេចក្ដីប្រកាសឱ្យដឹងថា ក្នុងឱកាសចូលរួមក្នុងកិច្ចប្រជុំកំពូលសន្តិសុខអាស៊ីលើកទី ១៩ លោក ទៀ បាញ់ នឹងអញ្ជើញថ្លែងសេចក្តីថ្លែងការណ៍ប្រកបដោយអត្ថន័យខ្លឹមសារក្នុងសម័យប្រជុំពេញអង្គទី ៤ ស្តីពី «ទំនើបកម្មយោធា និងសមត្ថភាពការពារជាតិថ្មីៗ» ដោយផ្តោតលើទស្សនៈលើបញ្ហាប្រឈមនានា ដែលអាចបង្កឡើងដោយការអភិវឌ្ឍវិស័យយោធាយ៉ាងលឿននៅក្នុងតំបន់ និងមុខងារដែលសមត្ថភាពថ្មីៗទាំងនោះអាចដើរតួនាទីក្នុងការរក្សាតុល្យភាពស្ថិរភាពតំបន់។
ក្នុងនាមជាប្រធានកិច្ចប្រជុំរដ្ឋមន្ត្រីការពារជាតិអាស៊ាន (ADMM) និងកិច្ចប្រជុំពាក់ព័ន្ធឆ្នាំ ២០២២ នេះ លោក ទៀ បាញ់ ក៏នឹងថ្លែងបញ្ជាក់អំពីគោលជំហរ របស់កម្ពុជាក្នុងកិច្ចខិតខំប្រឹងប្រែងលើកកម្ពស់តួនាទី និងសាមគ្គីភាពអាស៊ានរួមគ្នាដោះស្រាយបញ្ហាប្រឈមសន្តិសុខនានា ស្របតាមមូលបទកិច្ចប្រជុំរដ្ឋមន្ត្រីការពារជាតិ-អាស៊ាន «សាមគ្គីភាព ដើម្បីសន្តិសុខប្រកបដោយភាពសុខដុម»។ នេះបើតាមសេចក្ដីប្រកាសដដែល។
សេចក្ដីប្រកាសបញ្ជាក់ថា៖ «ក្រៅពីចូលរួមក្នុងកិច្ចប្រជុំកំពូលខាងលើ សម្តេចពិជ័យសេនា [ទៀ បាញ់] ក៏នឹងមានជំនួបពិភាក្សាការងារទ្វេភាគីជាមួយរដ្ឋមន្ត្រីការពារជាតិនៃបណ្តាប្រទេសមួយចំនួន ដូចជា អូស្ត្រាលី ចិន សិង្ហបុរី និងសហរដ្ឋអាមេរិក ក៏ដូចជា ទទួលការចូលជួបសម្ដែងការគួរសមពីសំណាក់ឥស្សរជនសំខាន់ៗ រួមមាន នាយកគណៈកម្មាធិការកាកបាទក្រហមអន្តរជាតិប្រចាំតំបន់អាស៊ីប៉ាស៊ីហ្វិកផងដែរ»៕
