ភ្នំពេញៈ លោកនាយករដ្ឋមន្ត្រី ហ៊ុន សែន បានអនុញ្ញាតឱ្យក្រសួងការពារជាតិជ្រើសរើសមន្ត្រីទាហានថ្មីចំនួន ៦០០ នាក់ ខណៈអ្នកវិភាគគាំទ្រការជ្រើសរើសនេះពីព្រោះវាត្រូវនឹងទិដ្ឋភាពនៃប្រទេសកម្ពុជា និងពិភពលោកដែលត្រូវការវិស័យការពារជាតិខ្លាំងសម្រាប់ការពារជាតិ។
លោក ហ៊ុន សែន បានបញ្ជាក់ក្នុងសេចក្តីសេចក្តីសម្រេចចុះថ្ងៃទី ៩ ខែមិថុនាថា៖ «អនុញ្ញាតឱ្យក្រសួងការពារជាតិជ្រើសរើសពលទាហានថ្មីចំនួន ៦០០ នាក់ ដើម្បីបំពេញក្របខ័ណ្ឌឱ្យ៣កងវរសេនាតូចបង្កើតថ្មី ចំណុះបញ្ជាការដ្ឋានកាំភ្លើងធំ អគ្គបញ្ជាការដ្ឋាន»។
លោក ឈុំ សុជាត អ្នកនាំពាក្យក្រសួងការពារជាតិមិនអាចទាក់ទងបានដើម្បីសុំការបញ្ជាក់បន្ថែមបានទេ កាលពីថ្ងៃទី ៩ ខែមិថុនា។
លោក យង់ ពៅ អគ្គលេខាធិការរាជបណ្ឌិត្យសភាកម្ពុជាប្រាប់ ភ្នំពេញ ប៉ុស្តិ៍ កាលពីថ្ងៃទី ៩ ខែមិថុនាថា ការជ្រើសរើសនេះគឺវាសមស្របក្នុងដំណាក់កាលថ្មីនៃកំណែទម្រង់វិស័យកងទ័ពសម្រាប់កម្ពុជាដែលជាបរិបទដោយឡែកសម្រាប់កម្ពុជាក៏ដូចជាបរិបទទូទៅរបស់ពិភពលោកផងដែរ។ បរិបទទូទៅពិភពលោកមានន័យថា ប្រទេសទាំងឡាយ ឬរដ្ឋទាំងឡាយរស់នៅក្នុងសុខសន្តិភាពយ៉ាងណាក៏ដោយក៏ត្រូវតែត្រូវការវិស័យកងទ័ពខ្លាំងដែរ។
លោកគាំទ្រនូវការជ្រើសរើសនេះ ពីព្រោះវាត្រូវនឹងទិដ្ឋភាពនៃប្រទេសកម្ពុជា និងពិភពលោកដែលត្រូវការវិស័យការពារជាតិខ្លាំងសម្រាប់ការពារជាតិ ហើយវាក៏ជាបញ្ហាទាន់សម័យកាលផងដែរដែល យកទៅបណ្តុះបណ្តាលឲ្យសមស្របនឹងការវិវឌ្ឍថ្មីនៃសព្វាវុធក៏ដូចជាស្ថានការនយោបាយថ្មីរបស់ប្រទេសនិងពិភពលោក។
លោក យង់ ពៅ ថ្លែងថា៖ «នេះជាតថភាពយើងពិនិត្យមើលប្រទេសមហាអំណាចនិងប្រទេសរីកចម្រើនទាំងឡាយ គឺគេអភិវឌ្ឍវិស័យយោធានេះខ្លាំងណាស់ទាំងសព្វាវុធទាំងកងកម្លាំង។ ដោយឡែកសម្រាប់កម្ពុជាដូចគ្នាដែរ ការអភិវឌ្ឍវិស័យយោធា ដើម្បីការពារជាតិជាខឿនការពារជាតិយើងចាំបាច់ត្រូវការកម្លាំងថ្មីបន្ថែមទៅលើកម្លាំងចាស់ដែលចូលនិវត្តន៍ដែលចាស់ ដែលចំណេះដឹងមិនទាន់សម័យអីជាដើម»។
កាលពីថ្ងៃទី ២៦ ខែមេសា លោកនាយករដ្ឋមន្ត្រី ហ៊ុន សែន បានចុះហត្ថលេខាលើសេចក្តីសម្រេចដែលត្រូវបានផ្សព្វផ្សាយកាលពីខែមុនដោយបានអនុញ្ញាតឱ្យក្រសួងការពារជាតិ ជ្រើសរើសពលទាហានថ្មីចំនួន ៤០២ នាក់ដើម្បីរៀបចំកងកាំជ្រួច ការពារអាកាសរយៈកម្ពស់មធ្យម ចំណុះបញ្ជាការដ្ឋានការពារអាកាស។
លោកនាយករដ្ឋមន្ត្រី ហ៊ុន សែន កាលពីដើមខែមុនបានប្រកាសថា កម្ពុជាមិនត្រូវការចាំបាច់យកយន្តហោះទៅបាញ់គ្នាលើអាកាសទេ តែត្រូវការកម្លាំងការពារអាកាស ដែលលោកហៅថា «សំណាញ់មេឃ»។
ក្នុងឆ្នាំ ២០២២ នេះ រាជរដ្ឋាភិបាលបានយល់ព្រមជាគោលការណ៍ឱ្យជ្រើសរើសមន្ត្រីជាប់កិច្ចសន្យាជិត ៤៦ ០០០ នាក់ សម្រាប់បម្រើការងារនៅតាមក្រសួង ស្ថាប័ននានា ប៉ុន្តែមិនអនុញ្ញាតឱ្យជ្រើសរើសក្របខ័ណ្ឌថ្មីជំនួសអ្នកចូលនិវត្តន៍ឡើយ លើកលែងតែក្រសួងស្ថាប័នដែលមានគោលការណ៍ ដោយឡែកពីប្រមុខរាជរដ្ឋាភិបាល។ នេះបើតាមលិខិតចុះថ្ងៃទី ២៥ ខែ មីនា ឆ្នាំ ២០២២ ចុះហត្ថលេខាដោយរដ្ឋមន្ត្រីក្រសួងមុខងារសាធារណៈលោក ព្រុំ សុខា៕