ភ្នំពេញៈ បច្ចុប្បន្នមានជនជាប់ឃុំប្រមាណ ៣៨ ០០០ នាក់ កំពុងជាប់ឃុំនៅតាមពន្ធនាគារ និងមណ្ឌលអប់រំកែប្រែទាំង ២៨ នៅទូទាំងប្រទេស ដោយក្នុងនោះមានជនជាប់ឃុំប្រមាណ ៥៤ ភាគរយជាប់ពាក់ព័ន្ធនឹងគ្រឿងញៀន ខណៈអគ្គនាយកពន្ធនាគារ គឺជាអ្នកធ្វើសមាហរណកម្មជនជាប់ឃុំ ទៅក្នុងសង្គមវិញ និងទប់ស្កាត់ការប្រព្រឹត្ដល្មើសសាជាថ្មី។
តាមច្បាប់ស្ដីពីពន្ធនាគារ ជនជាប់ឃុំ សំដៅដល់ជនត្រូវចោទ ឬជនជាប់ចោទ ឬពិរទ្ធជន ឬទណ្ឌិតដែលត្រូវបានបញ្ជូនមកឃុំខ្លួននៅក្នុងពន្ធនាគារ តាមលិខិតឃុំខ្លួនចេញដោយអាជ្ញាធរតុលាការ។
ជនជាប់ឃុំត្រូវបានគ្រប់គ្រងដោយអគ្គនាយកដ្ឋានពន្ធនាគារ ដើម្បីឱ្យធានាបានសន្ដិសុខសុវត្ថិភាព សុខភាព មនុស្សធម៌ ស្របតាមច្បាប់ជាតិ គោលការណ៍អន្តរជាតិ និងវិធានការសហប្រជាជាតិ សម្រាប់ការពារអនីតិជនដែលត្រូវបានដកហូតសិទ្ធិសេរីភាព។
ដើម្បីឱ្យធានាបានសន្ដិសុខសុវត្ថិភាព សុខភាព មនុស្សធម៌ ស្របតាមច្បាប់ស្ដីពីពន្ធនាគារ និងគោលការណ៍អន្តរជាតិ និងវិធានការសហប្រជាជាតិ សម្រាប់ការពារអនីតិជន ដែលត្រូវបានដកហូតសិទ្ធិសេរីភាព អគ្គនាយកដ្ឋានពន្ធនាគារ បានអនុវត្ដនូវស្ដងដារអប្បរិមា ក្នុងការផ្ដល់សេវាផ្សេងៗដល់ជនជប់ឃុំ ក្នុងនោះមានសេវារស់នៅប្រចាំថ្ងៃ សេវាសុខភាព សេវាបន្សាបគ្រឿងញៀន និងការបណ្ដុះបណ្ដាលជំនាញវិជ្ជាជីវៈ មុខរបរទៅដល់ជនជាប់ឃុំ។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារ ថ្លែងប្រាប់ ភ្នំពេញ ប៉ុស្ដិ៍ កាលពីពេលថ្មីៗនេះថា ជាទូទៅការផ្ដល់សេវាផ្សេងៗដល់ជនជាប់ឃុំ អគ្គនាយកដ្ឋានពន្ធនាគារបានអនុវត្ដស្ដង់ដារអប្បរិមា ក្នុងការកំណត់ ក៏ដូចជាចែងនៅក្នុងលិខិតបទដ្ឋានរបស់រាជរដ្ឋាភិបាល និងក្រសួងមហាផ្ទៃ និងច្បាប់ស្ដីពីពន្ធនាគារ។
លោកបានឱ្យដឹងថា នៅពន្ធនាគារ និងមណ្ឌលអប់រំកែប្រែទាំងអស់ នៅកម្ពុជា រាជរដ្ឋាភិបាលបានផ្ដល់របបអាហារសម្រាប់ជនជាប់ឃុំ ក្នុង ១ នាក់ ទទួលបាន ៣ ៥០០ រៀល ក្នុង១ថ្ងៃ សម្រាប់ចំណាយលើរបបអាហារ។ ក្រៅពីនេះ ពន្ធនាគារក៏អនុញ្ញាតឱ្យក្រុមគ្រួសារជនជាប់ឃុំ យកអាហារឱ្យបន្ថែមមួយចំនួនផងដែរ។
បន្ថែមពីនេះដើម្បីផ្គត់ផ្គង់ម្ហូបអាហារសម្រាប់ជនជាប់ឃុំបរិភោគ ពន្ធនាគារមួយចំនួន ក៏បានដាំបន្លែខ្លះៗ នៅក្នុងពន្ធនាគារ ដើម្បីផ្គត់ផ្គង់បន្ថែម។ លោក សវនា បញ្ជាក់ថា ថ្វីដ្បិតតែបច្ចុប្បន្នទំនិញឡើងថ្លៃ ប៉ុន្ដែស្ដង់ដានៃការផ្ដល់សេវាម្ហូបអាហារដល់ជនជាប់ឃុំ មិនមានការធ្លាក់ចុះឡើយ គឺបានខិតខំរក្សាស្ដង់ដា អប្បរិមាលើការផ្ដល់សេវានេះដល់ជនជាប់ឃុំ។
លោកថ្លែងថា៖«ការចម្អិនម្ហូបអាហារ សម្រាប់ជនជាប់ឃុំបរិភោគ គឺយើងមានការរៀបចំជាកាឡូរី ដែលបានកំណត់ដោយក្រុមការងារត្រួតពិនិត្យម្ហូបអាហាររបស់ជនជាប់ឃុំ។ ក្រុមការងារត្រួតពិនិត្យម្ហូបអាហាររបស់ជនជាប់ឃុំ បានចុះពិនិត្យដោយផ្ទាល់នៅតាមផ្ទះបាយ និងកន្លែងចម្អិនអាហារនានាក្នុងពន្ធនាគារ»។
ក្រៅពីការផ្ដល់ម្ហូបអាហារ ដែលមានស្ដង់ដារ អគ្គនាយកដ្ឋានពន្ធនាគារ ក៏បានផ្ដល់ពេលវេលា សម្រាប់ការហាត់ប្រាណ ហាត់កីឡា ដល់ជនជាប់ឃុំផងដែរ។ លោក សវនា បានបញ្ជាក់ថា ពន្ធនាគារក៏អនុញ្ញាតឱ្យជនជាប់ឃុំមានពេលចេញមកក្រៅដើម្បីហាត់ប្រាណ លេងកីឡា អានសៀវភៅ នៅតាមបណ្ណាល័យ និងធ្វើកិច្ចការផ្សេងៗ និងជួបជាមួយគ្រួសារដែលទទួលបន្ទុកដែលបានសុំការអនុញ្ញាតមកលេងផងដែរ។
សម្រាប់ការងារបណ្ដុះបណ្ដាលជំនាញវិជ្ជាជីវៈដល់ជនជាប់ឃុំ លោក សវនា បានឱ្យដឹងថា អ្នកដែលត្រូវបានតុលាការកាត់ទោសរួចហើយ ពន្ធនាគារបានអនុញ្ញាតឱ្យពួកគេ រៀនជំនាញវិជ្ជាជីវៈផ្សេងៗ ក្នុងនោះមានជំនាញផ្នែកអគ្គិសនី ជំនាញជួសជុលបរិក្ខាម៉ាស៊ីនត្រជាក់ ជំនាញជួសជុលម៉ូតូ ជំនាញបាញ់ថ្នាំឡាន ជំនាញចម្លាក់ និងបច្ចេកទេសដាំបន្លែផ្សេងៗផងដែរ។
លោកថ្លែងថា៖ «នៅក្នុងពន្ធនាគារ និងមណ្ឌលសុខភាព មានសេវាច្រើនសម្រាប់ផ្ដល់ដល់ជនជាប់ឃុំ ក្នុងនោះមានទាំងសេវាសុខភាព សេវាអប់រំផ្លូវចិត្ដ សេវាបណ្ដុះបណ្ដាលវិជ្ជាជីវៈ មុខរបរ ជាដើម។ ពេលខ្លះបើមានអតិថិជនគេកម្មង់ឱ្យធ្វើការងារលើជំនាញដែលជនជាប់ឃុំចេះធ្វើ ពួកគាត់ក៏ទទួលបានកម្រៃខ្លះៗដែរ ពីកម្លាំងពលកម្មរបស់ពួកគាត់»។
ទាក់ទងនឹងបញ្ហាសុខភាព លោក សវនា បានឱ្យដឹងថា បើមានករណីជនជប់ឃុំ មានបញ្ហាសុខភាពហើយត្រូវការថ្នាំប្រើប្រាស់ គឺអនុញ្ញាតឱ្យមានការបញ្ជូនថ្នាំពីខាងក្រៅមក ដើម្បីព្យាបាលដល់ជនជាប់ឃុំ។ ក្រៅពីនេះនៅតាមមណ្ឌលអប់រំកែប្រែ និងពន្ធនាគារ ក៏មានប៉ុស្ដិ៍សុខភាពនៅទីនោះស្រាប់សម្រាប់ពិនិត្យ ព្យាបាលលើបញ្ហាសុខភាពស្រាលៗ។ បើជនជាប់ឃុំមានជំងឺ ជាករណីចាំបាច់ ត្រូវបញ្ជូនទៅព្យាបាលនៅខាងក្រៅ ពន្ធនាគារនឹងគិតគូររៀបចំបន្ថែមទៀតដល់ពួកគេ។
លោកបញ្ជាក់ថា៖ «យើងដឹងថា ទណ្ឌិតភាគច្រើន ប្រព្រឹត្ដបទល្មើសដោយសារបញ្ហាជីវភាព ក៏ដូចជាការសេពគប់មនុស្សខិលខូចខុសនៅក្នុងសង្គម ទើបបណ្ដាលឱ្យគាត់ធ្លាក់ខ្លួនមកជាអ្នកទោស។ អ៊ីចឹង យើងព្យាយាមដោះស្រាយយ៉ាងម៉េចដើម្បីធ្វើឱ្យជនជាប់ឃុំ ទទួលបានជំនាញ ពេលរួចទោសចេញទៅកាន់គ្រួសារ និងសហគមន៍វិញពួកគាត់អាចប្រកបរបរ រកស៊ីសុច្ចរិតត្រឹមត្រូវបាន»។
ទាក់ទងនឹងការផ្ដល់សេវាដល់ជនជាប់ឃុំ ក្នុងពន្ធនាគារនេះ លោក អំ សំអាត នាយកទទួលបន្ទុកកិច្ចការទូទៅនៃអង្គការលីកាដូ លើកឡើងថា ពន្ធនាគារនៅទូទាំងប្រទេសកម្ពុជា នាពេលបច្វុប្បន្ននេះ មានភាពចង្អៀតណែនខ្លាំង ដែលធ្វើឱ្យចំនួនមន្ត្រីនៅតាមពន្ធនាគារ មិនសមាមាត្រ និងចំនួនអ្នកជាប់ឃុំ។ មូលហេតុនេះ ក៏ធ្វើឱ្យប៉ះពាល់ដល់ការផ្តល់សេវាដល់ជនជាប់ឃុំរួមមានទាំងអនាម័យ ម្ហូបអាហារ សម្ភារប្រើប្រាស់ រួមទាំងសេវាសុខភាព ក៏ដូចជាការអប់រំ និងការបណ្តុះបណ្តាលវិជ្ជាជីវៈផ្សេងៗ។
លោកថា ពន្ធនាគារជាកន្លែងមួយ ដែលទទួលយកអ្នកជាប់ឃុំ ដែលតុលាការចោទប្រកាន់សម្រាប់ការឃុំខ្លួនបណ្តោះអាសន្ន និងអ្នកជាប់ឃុំ ដែលមានសាលក្រមឬសាលដីកាស្ថាពរទៅអប់រំ និងការបណ្តុះបណ្តាលវិជ្ជាជីវៈផ្សេងៗឱ្យពួកគេកែប្រែខ្លួនឈប់ប្រព្រឹត្តបទល្មើសបន្តទៀត ពេលដែលពួកគេ អនុវត្តទោសជាប់ពន្ធនាគារចប់ ឬត្រូវបានដោះលែងពីពន្ធនាគារវិញ។
លោកបន្តថា៖«ប៉ុន្តែតាមការសង្កេតរបស់ខ្ញុំ បច្ចុប្បន្ននេះ អ្នកជាប់ឃុំ មិនទាន់បានទទួលសេវាតាមគោលការណ៍ និងតាមច្បាប់ស្តីពីការគ្រប់គ្រងពន្ធនាគារពេញលេញនោះទេ ហើយក៏មិនទាន់បានការអនុវត្តតាមបទដ្ឋានស្តង់ដារនោះដែរ។ បញ្ហាទាំងអស់នេះហើយ ដែលយើងបានឃើញអ្នកជាប់ឃុំមួយចំនួន ដែលអនុវត្តទោសចប់ត្រូវបានដោះលែង គឺបានប្រព្រឹត្តបទល្មើសដដែលៗ»។
លោក សំអាត បញ្ជាក់ថា៖«យើងជាអង្គការសិទ្ធិមនុស្សចង់ឃើញការដោះស្រាយភាពចង្អៀតណែនក្នុងពន្ធនាគារ ដើម្បីផ្តល់ឱកាសដល់មន្រ្តីអាចអនុវត្តបានពេញលេញ នូវបទដ្ឋានស្តង់ដារ ក្នុងការគ្រប់គ្រងអ្នកជាប់ឃុំនិងការផ្តល់សេវាផ្សេងៗស្របតាមស្តង់ដារ និងច្បាប់ស្តីពីការគ្រប់គ្រងពន្ធនាគារ ដែលជាកន្លែងអប់រំ កែប្រែអ្នកជាប់ឃុំ និងមានជំនាញវិជ្ជាជីវៈខ្លះសម្រាប់ពេលគាត់ត្រូវបានដោះលែង ហើយវិលត្រលប់ទៅរស់នៅជួបជុំគ្រួសារ និងសហគមន៍ដោយសុខដុមរមនា មិនប្រព្រឹត្តបទល្មើសតទៅទៀត »។
លោក សវនា បានឱ្យដឹងថា បើសិនជាជនជាប់ឃុំ មានជាប់ពាក់ព័ន្ធនឹងបញ្ហាគ្រឿងញៀន អគ្គនាយកដ្ឋានពន្ធនាគារក៏មានកម្មវិធីបន្សាបគ្រឿងញៀន នៅតាមមណ្ឌល និងតាមពន្ធនាគារដែរ។
លោកថា៖ «កម្មវិធីនេះ ឋិតនៅក្នុងកម្រិតមួយ មិនមែនថា អស្ចារ្យជាលក្ខណៈអាជីពទេ គ្រាន់តែយើងតាមដានមើលទៅកម្មវិធីបន្សាបគ្រឿងញៀន យើងវាមានប្រសិទ្ធភាព ក្នុងកម្រិតមួយដែរ»។
លោកបន្តថា៖ «អ៊ីចឹងយើងព្យាយាមធ្វើម៉េចឱ្យពួកគាត់មានការកែប្រែ ពាក្យថា អប់រំ កែប្រែនេះ គឺកែប្រែពីខូចមកល្អនេះជាទិសដៅចម្បងរបស់អគ្គនាយកដ្ឋានពន្ធនាគារយើង»។
បើតាមលោក សវនា បច្ចុប្បន្ននៅកម្ពុជាមាន ពន្ធនាគារ និងមណ្ឌលអប់រំកែប្រែ សរុបចំនួន ២៨ កន្លែងក្នុងនោះមណ្ឌលអប់រំកែប្រែចំនួន ៤ កន្លែង ប៉ុន្ដែទៅថ្ងៃមុខ អគ្គនាយកដ្ឋានពន្ធានាគារ មានគម្រោងពង្រីកបន្ថែមជាបន្តបន្ទាប់ទៀត។
បច្ចុប្បន្នមានជនជាប់ឃុំនៅតាមពន្ធនាគារ និងមណ្ឌលអប់រំកែប្រែសរុបប្រមាណ ៣ ៨០០០ នាក់ ក្នុងនោះជនជាប់ឃុំប្រមាណ ៥៤ ភាគរយជាប់ពាក់ព័ន្ធនឹងគ្រឿងញៀន ខណៈមន្ត្រីពន្ធនាគារនៅទូទាំងប្រទេសមានចំនួន ២ ៩៧៥ នាក់។
លោកសវនាបញ្ជាក់ថា៖ «អត្រាអ្នកប្រព្រឹត្តបទល្មើស មិនរាងចាល ក្នុងចំណោមជនល្មើស ១០០ នាក់ អាចមានក្នុងរង្វង់ប្រមាណ ១៥ នាក់៕
វីដេអូ៖